Ölkə futbolu
“Qəbələ”: israfçılıq, yoxsa peşəkarlıq?
Topaz Premyer Liqasının bürünc mükafatçısı &…
Topaz Premyer Liqasının bürünc mükafatçısı “Qəbələ” yay “transfer pəncərəsi”ndə hamıdan fəaldı. Roman Qriqorçuk heyətə 10 yeni futbolçu cəlb edib. Nəzərə alsaq ki, start heyətində 11 oyunçu yer alır, demək olar, ukraynalı mütəxəssis heyəti tamamilə yeniləyib. Ancaq bu cür düşünənləri məyus etməli olacağıq….
Andrey Popoviç (qapıçı), Vojislan Stankoviç (Serbiya), Vitali Vernidub (Ukrayna), Arif Daşdəmirov, Məhəmməd Mirzəbəyov (hamısı müdafiəçi), George Floresku (Rumıniya), Asif Məmmədov və Samir Zərgərov (hamısı yarımmüdafiəçi), Sergey Zenyov (Estoniya, hücumçu), Aleksey Antonov (Ukrayna, hücumçu), – bu, komandaya yeni cəlb edilən oyunçuların siyahısıdı.
Cavidan Hüseynzadə (qapıçı), Mixal Sivakov (Belarus), Pavol Farkaş (Slovakiya), Aleksandru Benqa (Rumıniya), Tərzin Cahangirov, Sadiq Quliyev, Ruslan Tağızadə, Ruslan Abışov (hamısı müdafiəçi), Adrian Ropotan, Ekiqo Ehiosun (Nigeriya), Bəxtiyar Soltanov (hamısı yarımmüdafiəçi), Viktor Mendi (Seneqal), Ruslan Fomin (Ukrayna), hər ikisi hücumçu) – bu da “Qəbələ”dən ayrılan futbolçuların siyahısıdı.
Əvvəlcə gedənlərin siyahısına nəzər yetirək. Xüsusilə, Mixail Sivakov və Ruslan Fominin personaları diqqəti cəlb edir. Hər iki futbolçunu komandaya gətirən Qriqorçuk olub. Ancaq saatın əqrəbini tərsinə fırlatmaq lazım deyil. Ukraynalı çalışdırıcı şəxsi mənafeyini güdsəydi, sözügedən oyunçularla uzunmüddətli müqaviləyə imza atılmasını tələb edərdi. Mövsümün sonunacan özlərini göstərə bilməyən futbolçulara qapını göstərməsi Qriqorçukun məşqçi savadından xəbər verir.
İndi də gedənlərin sayına diqqət yetirək. Yola salınan 13 futbolçunun əvəzinə yeni 10 oyunçu alınıb. Yəni, 50 yaşlı mütəxəssisin israfçılığa yol verdiyini də söyləmək doğru olmaz. Axı gedən 13 futbolçunu 10-u ilə əvəz edib. Şərti olaraq belə demək mümkündü: Qriqorçukun hələ 3 oyunçu transfer etmək üçün kvotası var.
Üstəlik gedənlərin siyahısına nəzər yetirdikdə, yalnız Ruslan Abışovun komandadan ayrılmasını xüsusi qabartmaq olar. Burada da vəziyyət başadüşüləndi. Tərəflər maliyyə məsələsində ortaq məxrəcə gələ bilməyiblər və futbolçu daha sərfəli təklifi dəyərləndirib. Viktor Mendinin gedişinin səbəbi isə bəllidi. Gedənlərin siyahısına nəzər yetirdikdə, əksəriyyətini “əvəzedici” adlandıra bilərik. Gələnlər isə… Əlbəttə, bunu zaman göstərəcək. Ancaq Andrey Popoviçi çıxmaq şərti ilə, digərlərini hansısa cəbhədə mütləq görəcəyik. Məsələn, Premyer Liqa və ölkə kuboku yarışlarında legioner limiti səbəbindən bir sıra yerli futbolçuların xidmətindən faydalanmaq məcburəyyəti yaranacaq. Avrokuboklarda isə daha çox əcnəbilərə bel bağlamaq mümkündü.
Daha bir məqama da diqqət yetirək. Əvvəlcə, klubun prezidenti Tale Heydərov “Qəbələ”nin çempionluğa oynamaq arzusundan danışdı. Bundan sonra Qriqorçuk ona çempionluqla bağlı ünvanladığımız suala “niyə də olmasın?”, cavabını vermişdi. Nəhayət, bu gün, Toni Adams “Qəbələ”nin qızıl medallara sahib çıxması iddiasında olduğunu bildirib. Çempionluqdan dəm vuran komandanın isə ən azı iki eynisəviyyəli heyəti olmalıdı ki, bütün cəbhələrdə mübarizə apara bilsin.
Bütün faktorları cəm halına gətirdikdə, görürük ki, “Qəbələ”nin siması heç də dəyişməyib. Sadəcə, klub peşəkarlıq yolunda tələb olunan addımı atıb. Hətta növbəti mövsüm fiaskoya uğrasa belə, transfer bazarında göstərdiyi fəallıq ancaq alqışlanmalıdı.
CEYHUN ƏLİYEV
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 17:10
Klublar çətin vəziyyətdə: AFFA yardımları dondurub