Ölkə futbolu
Sadıqov: "Əl-Jadeyui Leroy Cocru əvəz edə bilmir"
Dünən Çempionlar Liqasında 3-cü təsnifat mərhəə…
Dünən Çempionlar Liqasında 3-cü təsnifat mərhəəsi çərçivəsində "Qarabağ" Şotlandiyada "Seltik"lə qarşılaşdı. Futbolinfo.az xəbər verir ki, Azərbaycandakı futbolsevərlərin izləyə bilmədiyi qarşılaşma təmsilçimizin 0:1 hesablı məğlubiyyəti ilə başa çatıb. Sözügedən oyunu izləmiş mütəxəssis Vaqif Sadıqovla əlaqə saxladıq. AFFA Məşqçilər Komitəsinin sədri qarşılaşma ilə bağlı saytımıza bu sözləri dedi:
"Təmsilçimiz bu görüşdə məğlub olsa da, cavab matçında müsbət nəticə əldə edə bilər. "Qarabağ"da bunu dərk edib başa düşür. Hesab edirəm ki, Ağdam təmsilçisi hər birimizi sevindirəcək. Mən bu oyuna baxa-baxa "Seltik"i "Qarabağ"ın ötən il avroliqanın qrup mərhələsində qarşılaşdığı rəqiblərlə müqayisə edirdim. Fikrimcə, həmin komandalar "Seltik"dən üstündü. Ötən mövsüm "Qarabağ" bizi necə sevindirirdisə, düşünürəm ki, avqustun 5-də də ən yaxşı oyunlarından birini keçirib, mərhələni adlayacaq. Çox adam "Qarabağ"ın standart vəziyyətlərdə ehtiyatlı olmağını bildirirdi. "Seltik" tək belə vəziyyətlərdə güclü deyildi, topa da çox gözəl nəzarət edir, yaxşı hücumlar qururdu. Həm də rəqib öz meydanında oynayırdı və komandaya azarkeş dəstəyi də güclü idi. Şotlandlar ilk dəqiqələrdən pressinq tətbiq etməyə başlamışdı. Bu təzyiqlər meydanın rəqibə aid olan hissəsində idi. Ağdamlılar buna hazır idi, lakin irəli çıxmaqda bir az problemlər yaşayırdı. Amma sonradan "Qarabağ" tədricən özünə gəlməyə başladı. Statistikaya nəzər salsaq, görərik ki, komandalar arasında aşkar fərq yoxdu. Ümumi oyun onu göstərdi ki, "Seltik" keçiləsi bir rəqibdi. İnanıram ki, hamımız cavab matçında "Qarabağ" ətrafında birləşib, azarkeşlik edib, dəstək olacağıq. Onlar da ən yaxşı oyunlarını sərgiləyib, qələbə qazanacaqlar".
56 yaşlı mütəxəssis həmçinin qol epziodunu da şərh edib. O, buraxılan qolda konkret kimisə günahlandırmayaraq, ehtiyatlı danışmağ üstün tutub: "Qol epizodu ilə bağlı onu deyə bilərəm ki, bu futbolçulara verilən tapşırıqdan asılıdı: Təkbətək və ya zona müdafiəsi oynanılır. Qoldan öncə də qapımıza bir neçə künc zərbəsi təyin edilmişdi və həmin epizodlarda müdafiəçilər çox dəqiq oynamışdı. Baxmayaraq ki, rəqibin üstün cəhətlərindən biri standart vəziyyətlərdən yaxşı istifadə etməsidi. Günahkar axtarmaq lazım deyil. Əgər komanda məğlub olubsa, bütün kollektiv məğlub olub. Əgər əvvəl Britaniya futbolu deyiləndə cinah keçidləri yada düşürdü. İndi tamamilə fərqli, hərtərəfli hücum qurmağı bacaran "Seltik" gördük. Bəli, rəqib çox güclüdü. Ancaq biz də üstün olduğumuzu belə rəqiblərə qarşı göstərməliyik".
Sadıqov komandanın yeni transferi Əlhərbi Əl-Jadeyuinin və ümumilikdə sağ cinahının oyununa münasibət bildirib: "Bəzi futbolçular var ki, komandaya gec alışır və ya əksinə dəst-xətti tez qavrayırlar. Bu futbolçu daimi olaraq, start heyətində yer alır. Bəlkə də, hamı ondan daha artığını gözləyir. Ancaq indi o, hələ ki, Leroy Corcu tam əvəz edə bilmir. İlqar Qurbanov "Qarabağ"a lazım olan futbolçulardan biridi. Məncə, o öz oyununu göstərdi. Fikrimcə, hansısa futbolçuya fərdi şəkildə irad bildirməyə ehtiyac yoxdu. Biz öyrəşmişik ki, "Qarabağ" həmişə rəqibdən asılı olmayaraq, inamlı təsir bağışlasın. Lakin dünənki matçda komanda matça ehtiyatlı başladı".
Vaqif bəyin fikrincə, komanda cavab matçında həmişəki oyun tərzində çıxış etməlidi: "Komanda oturuşmuş heyətə və oyun modelinə malikdi. Məncə, çox dəyişiklik etməyə ehtiyac yoxdu. Fikrimcə, "Qarabağ" güclü azarkeş dəstəyi altında hücuma atılacaq. Mən bunu hər dəfə qeyd etmişəm ki, hücuma atılanda rəqibin əks-hücumlarından qorunmaq lazımdı. "Seltik"də əks-hücumlarda uğur qazansa, sonra oyunu çevirmək çox çətin olacaq. Səfərdəki matç qolsuz bərabərliklə də başa çatsaydı, biz yenə də Bakıda qol vurmağa çalışacaqdıq. 1:0 hesablı məğlubiyyətdən sonra da biz yenə çalışıb, qol vurmalı və matçın sonunadək üstünlüyümüzü qorumalıyıq. Fikrimcə, "Qarabağ"ın Avropada uğur qazanmış heyəti və oyun modelindən kənara çıxmaq lazım deyil. Bir az aqresseiv və inamlı oyun sərgiləmək lazımdı".
ELMAR ABDULLA-ZADƏ