Ölkə futbolu
Qlazqoda ümidverici futbol və "axsayanlar"
“Qarabağ”ın Çempionlar Liqasının 3-cü təs…
“Qarabağ”ın Çempionlar Liqasının 3-cü təsnifat mərhələsinin ilk oyununda qeydə alınan nəticəsini qənaətbəxş hesab etmək olar. Ağdam təmsilçisi Şotlandiya “Seltik”i ilə səfər qarşılaşmasından 0:1 hesablı məğlubiyyətlə qayıtması dünyanın sonu deyil. Bu cür düşünməyə dünənki görüşdə Qurban Qurbanovun yetirmələrinin sərgilədiyi futbol əsas verir.
Azərbaycan çempionunun heyətində ən yaxşıları qeyd etdikdə, ilk növbədə Cavid Tağıyevin adını çəkməliyik. Sol cinah yarımmüdafiçisi dəfələrlə vizavilərindən sıyrılmaqla, kəskin ötürmələri ilə yadda qaldı. İlk yarının son dəqiqəsində isə Tağıev əks cinahda peyda oldu. Vircil van Diykin başını gicəlləndirən vinger nəticədə hollandiyalını qayda pozuntusuna vadar etdi. Bu epizodu sarı vərəqə kimi dəyərləndirən referinin təyin etdiyi cəriməni ustalıqla yerinə yetirən Riçard Almeydanın zərbəsini isə Kreyq Qordon çətinliklə də olsa dəf etdi.
Cavidin birdən-birə sağ cinahda peyda olmasına isə təəccüblənməyə dəyməz. Çünki Əlhərbi Əl Jadeyauinin meydanda varlığı ilə yoxluğunun heç bir fərqi yox idi. Buna görə də “Qarabağ”ın sağ cinahı sahibsiz qalmışdı. İlqar Qurbanovun çoxsaylı mövqe səhvlərinin kökündə də mərakeşlinin yarımmdüfəçi funksiyalarının öhdəsindən gəlməməsi dayanmışdı. Buna görə də “Qarabağ” həm hücumların təşkilində, həm də müdafiə olunarkən bu cinahda çətinliklərlə üzləşirdi. Nəticədə, Bədavi Hüseynov mərkəz müdafiəçisi mövqeyini tez-tez tərk etməli və sağ cinahdakı boşluqları qapatmaq yolunda fədakarlıq göstərməli olurdu.
Reynaldonu bağlamağı bacaran britaniyalılar hücum planında qeyri-adi heç nəylə yadda qalmadılar. Yalnız standart vəziyyətlər zamanı şotlandlar nələrəsə nail olurdular ki, bunu da onların əlahiddə bacarığı ilə bağlamaq düzgün deyil. Sadəcə, Azərbaycan klublarının “Axilles dabanı” olan “2-ci mərtəbə” “Qarabağ”da özünü qabarıq şəkildə büruzə verirdi. Elə İbrahim Şehiçin kobud səhvindən sonra vurulan qol da məhz standart vəziyyətdən sonra qeydə alındı. Doğrudu, bosniyalı əlcək sahibinə qədər daha 2 “qəhrəmanlıq” oldu. Əvvəlcə, Qara Qarayev topu cərimə meydançasından uzaqlaşdırmaq istəyərkən, “mərmi”ni qapının üstündən aşırdı və nəticədə künc zərbəsi təyin olundu. Oyuna yenicə daxil olmuş Kris Kommonsun ötürməsindən sonra Dedrik Boyata qapıçı meydançasında gecikmiş Şehiçi qabaqlayaraq, boş qapını nişan aldı. Belçikalını saxlayan Bədavinin ötürmə zamanı birdən-birdən nəyə görə van Deykin mühafizəsini yerinə yetirməyə getdiyini heç cür anlamaq olmur.
Yalnız vurulan qoldan sonra “keltlər” fəallaşdılar. Amma son 6-7 dəqiqə real qol fürsəti yaxalaya bilmədilər.
Maraqlıdı ki, qonaqların oyunda ən real qol imkanında Əl Jadeyauinin rolu oldu. Cərimə meydançasında yarımmüdafiəçiyə qarşı aşkar kobudluq baş hakimin gözü qarşısında olsa da, avstriyalı Robert Şergenhoferin fiti susdu. Əslində buna təəccüblənməyə dəyməz. Nəyə görə? Bu, başqa mövzunun yazısıdı. Qısaca, onu bildirək ki, UEFA “Seltik”in irəliyə getməsində daha çox maraqlıdı, nəinki Azərbaycan çempionunun.
İlk oyunun rezümesi olaraq, qeyd edək ki, bu rəqibə qarşı oynamaq da olar, qalib gəlmək də. Ancaq unutmayaq ki, bir həftə sonra baş tutacaq oyunda fərqli “Seltik” görəcəyik: “ikinci nömrə”ylə oynayan “Seltik”. Çətin olacaq, lakin “Qarabağ” Avropa nəhəngləri sırasına daxil olmaq istəyirsə, Şotlandiya çempionu səviyyədə komandaları keçməlidi.
CEYHUN ƏLİYEV