Premyer-liqa
PFL-dən Gəncəyə "yaşıl işıq"
“Kəpəz” ev oyunlarını Gəncədə keçirəcək. B…
“Kəpəz” ev oyunlarını Gəncədə keçirəcək. Bu barədə futbolinfo.az saytına məlumatı PFL-in Texniki İdman Şöbəsinin rəisi Zamiq Hüseynov verib.
Bu gün stadiona baxış keçirən PFL-in xüsusi komissiyası Gəncə stadionunun durumunu qənaətbəxş hesab edib. Hüseynovun sözlərinə görə, stadionun ot örtüyü ideal vəziyyətdədi: “Gördüklərimizə əsasən deyə bilərəm ki, Gəncədəki qazonun vəziyyəti hazırda ölkədəki digər meydanların hamısını qabaqlayır. Bəzi çatışmazlıqlar var və bu barədə klub rəhbərliyini məlumatlandırdıq. Onlar da öz növbələrində qısa zaman kəsiyində bu qüsurları aradan qaldıracaqlarına söz verdilər. Bildiyiniz kimi, “Zirə” ilə keçiriləcək oyundan sonra “Kəpəz” səfərdə oynayacaq. Bundan sonra millimizin oyunu ilə əlaqədar çempionatda fasilə yaranacaq. Bu müddət kəsiyində bütün çatışmazlıqları aradan qaldırmaq mümkündü”.
PFL rəsmisi komissiyaya neçə nəfərin daxil olduğuna və konkret hansı çatışmazlıqları müşahidə etdiklərinə dair sualımızı da cavablandırdı: “Komissiya 3 nəfərdən ibarət idi. Təftiş qrupuna mən başçılıq edirdim. O ki qaldı çatışmazlıqlara, bu, xırda məsələlərdi. Əksəriyyəti də kosmetik işlərlə bağlıdı. Məhz buna görə də, Gəncədə baş tutan ikinci görüşədək bütün qüsurların aradan qalxacağına ümid böyükdü”.
Qeyd edək ki, Topaz Premyer Liqasının 2-ci turunda “Kəpəz” Gəncədə “Zirə”ni qəbul edəcək. Avqustun 16-da keçiriləcək qarşılaşmaya saat 18:30-da start veriləcək.