Premyer-liqa
"Qadan alım" və ya beton üzərində azarkeş
Gəncə. Futbola baxmağa başladığım uşaqlıq illərimdə Kirovob…
Gəncə. Futbola baxmağa başladığım uşaqlıq illərimdə Kirovobad adlanan Nizami yurduna daha bir səfərim başa çatır. Neçənci olduğunu xatırlaya bilmərəm. Ancaq hər dəfə olduğu kimi, bu dəfə də fərqli hisslər, fərqli duyğularla qayıdıram. Dəyişməyən bir ifadə qalıb. Yerli əhalidən kimə müraciət etməyindən asılı olmayaraq, cavabının girişində "qadan alım" eşidirsən. Qatar yavaş-yavaş Bakıya doğru sürət yığır…
***
Oturacaqlar quraşdırılmayan stadionun tribunalarında azarkeş tapmaq? Kreslolu stadionlarımızın oturacaqlarının 99 faizinin boş qalmasının şahidi olan bir jurnalistin beton üzərində komandasına təmənnasız dəstək olan gəncəlilərin futbol sevgisi haqda uzun-uzadı yazmayacam. Reallıq budu ki, onlar betonun üstündə oturmağa razıdılar, təki "Kəpəz" yaşasın. Ancaq gəncəlilər üçün "yaşasın" sözü tam fərqli məna kəsb edir. Onlar üçün istənilən rəqibə qarşı heç-heçə məğlubiyyətdi. Dəxli yoxdu qarşılarına çıxan "Qarabağ"dı, yoxsa "Xəzər Lənkəran". Bu, Gəncə futbolsevərinin optimist mövqeyidirsə, onların çatışmazlığını da qeyd etməyə zərurət var. Gəncəli azarkeş futbolu anlayır, elə anlamaları da komandalarına mane olur. Onlar oyunu lal-dinməz izləyirlər. Hər epizodu peşəkar səviyyədə təhlil edirlər. Ancaq bu, sevimli komandalarına ziyan vurur.
Maraqlıdı ki, ən çılğın azarkeş toplumu VİP-lojada toplaşmışdı. Gəncənin icra başçısı Elmar Vəliyevin komandasını irəli səsləməsi, ətrafındakıları da onun səsinə səs verməsini təmin edirdi…
***
Dünən "Zirə"yə qarşı oyundan sonra yerli azarkeşlərin üzünə baxanda adamın yazığı gəlirdi. Hamı sanki matəm içində idi. Fikirlərini ümumiləşdirsək, belə qələmə almaq mümkündü: "Bu qədər qol şansımız oldu, ancaq udmadıq". Ancaq bir və bəlkə də, əsas məqamı unudurdular. "Kəpəz" 70-75 dəqiqədən sonra yorulmuşdu. Komandaya mənəvi dəstək lazım idi. Azarkeşlər isə bunu unutmuşdu. Onlar yenə öz təhlillərini aparmaqda idilər. Komandaya ruh yüksəkliyi vermədilər və bəlkə də, "Zirə" ilə oyunda xal itkisini şərtləndirən başlıca məqam da elə bu oldu. Şahin Diniyevin yetirmələri tükəndi, azarkeşlər isə (bilərəkdən fanat sözünü işlətmirəm. Gəncədə fanat yoxdu, peşəkar azarkeşlər toplumu var) belə bir anda sevimlilərinə dəstək olmadılar. Saat 18:30-da başlayan oyunu 90 dəqiqə eyni tempdə nə cür keçirmək mümkündü? 40 dərəcə istidə yorulmamaq mümkünsüzdü. Özü də hücum edən komanda həmişə daha çox enerji sərf edir. "Kəpəz" isə bir nəfəsə hücum edir, rəqib qapısı ağzında çoxsaylı qol epizodları yaradırdı. Yaratdığı kimi də, sağa-sola xərcləyirdi…
***
Diniyev döyüşkən kollektiv formalaşdıra bilib. Onun komandası meydanda nə etdiyini bilir. Junior Da Silvanın tədricən komandanın liderinə çevrilməsi də göz önündədi. Oyunu üzərinə götürən braziliyalı yarımmüdafiəçi qeyri-adi hərəkətləri ilə rəqibləri çaş-baş salmağı bacarır. Amma… Aleksandr Sitnikin əzmkarlığı səviyyəsi ilə uzlaşmır. Forvard çox çalışqandı, amma faydalı iş əmsalı, yumşaq desək, ürəkaçan deyil. Çox, lap çox səhvlərə yol verir, Sitnik. Ümumiyyətlə, komandanın yaratdığı qol fürsətlərini bu cür biganəliklə xərcləməsi Diniyevi düşündürməlidi. Təcrübəli mütəxəssis bu problemə əlac tapmalıdı.
***
"Zirə" dünənki oyunda meydan sahiblərinə bütün komponentlərdə uduzurdu. Yalnız qapısında qol gördükdən sonra Adil Şükürovun komandası hücumlar qurmağa başladı. Hətta bunu da qonaqların aktivinə yazmaq düzgün deyil. Çünki "Kəpəz" təşəbbüsü rəqibinə öz əli ilə bağışladı. Cəmi bir real şans yaxalayan qonaqların vurduğu qolu bəlkə də, ədalətsiz adlandırmaq olar. Ancaq belədə "Futbol İlahəsi"ni unutmuş olarıq. Axı "vurmayana vurarlar". Ondan çox qol imkanınını boşa verən Gəncə təmsilçisi hesabı açdıqdan sonra heç olmasa topu sağa-sola vurmaqla məşğul olmasaydı, bəlkə qapısında qol görməzdi. Ancaq müdafiəçilərin bərbad şəkildə "məndən uzaq olsun" taktikasına üstünlük vermələri ədalətli cəzanı rəsmiləşdirdi. Belə deyək, "Zirə" heç-heçəyə layiq deyildi, ancaq "Kəpəz" qalib gəlmək istəmədi.
***
Oyun bitdi. Klub prezidenti Mehman Allahverdiyevlə ayaqüstü iki kəlmə kəsdik. Dialoqumuzu olduğu kimi diqqətinizə çatdırıram.
– Heyf, heyf bu cür oyunda xal itirdik.
– Mehman müəllim, "Kəpəz" futbol oynadı.
– Qadan alım, bilirəm e, amma udmalı idik, axı.
– Bərbad futbolla 3 xal qazanmaqdansa, vuruşub, heç-heçə etmək daha ümidvericidi.
– Yox e, yox, udmalı idik.
– Mehman müəllim, "Kəpəz" futbol oynadı.
– Qadan alım, bilirəm e, amma udmalı idik, axı.
– Bərbad futbolla 3 xal qazanmaqdansa, vuruşub, heç-heçə etmək daha ümidvericidi.
– Yox e, yox, udmalı idik.
Allahverdiyevi başa düşmək olar. Alovlu başla danışırdı. Yəqin ki, bu gün dediklərimizlə razılaşacaq.
***
…Qatar yavaş-yavaş Bakıya yaxınlaşır. Kim bilir qədim Nizami yurduna bir də nə vaxt baş çəkəcəm. Ancaq növbəti dəfə mütləq məşhur Gəncə dovğasından dadacam… lap qatara gecikməli olsam da.
CEYHUN ƏLİYEV, Bakı – Gəncə – Bakı
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 17:10
Klublar çətin vəziyyətdə: AFFA yardımları dondurub
- Ölkə futbolu2024-04-26 08:00
Juninyo – Avropanın ən yaxşı braziliyalısı