Premyer-liqa
“Müdriklər” və “bildi”yə həsrətlər
Hindistan qadınlarının alnında qırmızı xal gördünsə,…
Hindistan qadınlarının alnında qırmızı xal gördünsə, bil ki, o, ərdədi. Bu adətin başlama tarixini heç hindlilər özləri də bilmir, amma məqsədi barədə az da olsa, məlumat verim.
Bu xala “bindi” deyilir. Tərcümədə “damla” mənasını verir.
Rəvayətə görə, “bindi” pak ay anlamına gəlir. Hindularda ay müdriklik əlamətidi. Qadın pak şəkildə ailə həyatına qədəm qoyur və həmin gündən müdrikləşir. Bu xalın iki qaş arasında qoyulması da təsadüfi deyil. Hindistanlılar qadın düşüncəsinin onurğa sütünundan başlayaraq, bütün bədən üzrə hərəkət etdiyini və sonda iki qaşın arasında cəmləşdiyini bildirir. Onlar buna “altıncı çakra” deyir. “Bindi”nin başlıca məqsədi qadın enerjisinin qorunmasıdı.
Gördüyünüz kimi, “xal” məsələsi” Hindistanda dərin məna kəsb edir. Elə Azərbaycan Premyer Liqasının bir suyu da hindistanlıların xallarına bənzəyir. Ancaq hindistanlı xanımlar ərə gedərkən cəmi 1 xal qoyurlarsa, Topaz Premyer Liqasının sakinləri çempionat başlayar-başlamaz xalları itirməklə məşğuldu. Kimisi 1 xal qoyub, ailə qurur Hindistanda, kimiləri də dəstə-dəstə xallar paylayır.
Hələ ki, “xallı” və “xalsız” yarışmasında AZAL “müdrikləşməyib”. Siftə etməyən “təyyarəçilər” əvvəlcə debütant “Zirə”ni “müdrikləşdirib”, ardınca isə “Qəbələ”ni. AZAL bu gedişlə çempionat iştirakçılarının əksəriyyətini “müdrikləşdirmək”lə məşğul olacaq.
“Neftçi” AZAL-dan 1 “bindi” “müdrik” olsa da, komandaların çəki dərəcələri fərqlidi. Startdaca iki oyuna itirilən 5 xal finişdə həlledici rol oynaya bilər. Doğrudu, “Rəvan” da “ağ-qaralar” qədər “müdrikləşib”. Ancaq Emin Quliyevin rəhbərlik etdiyi 2-3 həftəlik komanda ilə ambisiyaları aşıb-daşan “Neftçi”ni tərəzinin bir gözünə qoymaq doğru deyil.
Ötən mövsümü titulsuz başa vuran Çingiz Abdullayevin komandası 3-cü turda da qələbə qazanmasa, tüstü göyə duman olacaq. Ancaq 3 xal əldə etmək üçün ilk növbədə rəqib qapısının torunu silkələmək lazımdı. Nəzərə alsaq ki, Samir Əliyevin drijinasının rəqibi çempionatın “ən sülhsevər” iki komandasından biridi, “Sumqayıt”ın müqavimətini öz gücü hesabına bu heyətin qıracağı inandırıcı görünmür.
“Müdrik” üçlük çempionat start götürməmişdən əvvəl də proqnozlaşdırılırdı. Ancaq “Qarabağ” və “Qəbələ”dən fərqli, “Xəzər Lənkəran”ın yeni transferləri heyətə qatmadan liderlər qurupunda qərarlaşması xüsusi qeyd edilməlidi. Baş məşqçi Yunis Hüseynov gənclərlə 4 dəfə “müdrikləşməyi” bacarıbsa, aparıcı fiqurların xidmətindən yararlandıqdan sonra hansı “bindi”lərlə fanatlarını sevindirəcəyini təxmin etmək olar.
İlk iki tur aldadıcı mənzərə yarada bilər. Amma əvvəlcədən gözlənilən nəticələr demək olar ki, özünü döğruldur. “Zirə”nin 4 “bindi”si aldadıcı xarakter daşıyır. Premyer Liqanın debütantının turnir cədvəlinin alt sıralarında qərarlaşacağını sərgilədikləri futbola əsasən söyləmək olar. Əlbəttə, “cücəni payızda sayarlar”. Amma reallıq budu ki, yayda itirilən xalları yazda geri qaytarmaq mümkün olmayacaq.
CEYHUN ƏLİYEV
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- I Liqa2024-04-30 14:45
“Araz Saatlı”nın məşqçisinə 2 oyunluq cəza
- I Liqa2024-05-01 11:25
I Liqada 24-cü turun təyinatları müəyyənləşdi
- Milli komanda2024-05-01 18:44
Milli komandamızın baş məşqçi postuna əsas namizəd bəlli oldu