Ölkə futbolu
Sa Bun Çu həqiqətləri – IV YAZI
Dəhşətdi vallah! Yozef Blatter özünü dünyaya ta…
Dəhşətdi vallah! Yozef Blatter özünü dünyaya tanıtdıqdan sonra, həyasız-həyasız Azərbaycana qara yaxmağa çalışmasını deyirəm. Rusiyaya dünya çempionatının ev sahibliyini satan isevçrəli işbaz, utanmaz-utanmaz Azərbaycana qarşı qərəz işlədir. Sa Bun Çu “Xəzər Lənkəran”ın vitse-prezidenti Tuyqun Nadirovun həmin mətbuat konfransında olmasa da, hər şeydən halidi. Dostlarım sağ olsun. Şimali Koreyada olsam da, “göyərçin poçtu” vasitəsi ilə həmin konfransın audioyazısını göndəriblər.
Tuyqun Nadirovun monoloqunu dinləyərkən, 3-4 dəfə halım pisləşdi, hər dəfə də 35 damcı korvalol içməklə birtəhər sakitləşirdim. Nə gizlədim, “Xəzər Lənkəran”ın vitse-prezidentini dinləyərkən göz yaşlarımı saxlaya bilmədim. FİFA-da çalışanlar nə qədər nadürüst insanlardı! Açıq deyəcəm, onlar indiyə qədər klub büdcəsinə daxil olan 1 qəpiyə belə göz dikməyən Mais Mənsimov və Tuyqun Nadirova qarşı bilərəkdən bu cür təxribat işlədiblər. Niyəsini indi izah edərəm.
Heç kimə sirr deyil ki, Yozef Blatter növbədənkənar seçkilərdən sonra FİFA-dan kənarlaşdırılacaq. Belədə, o, özünə yeni iş yeri tapmalıdı. Çox götür-qoy etdikdən sonra hiyləgər qoca gözünü “Xəzər Lənkəran”ın prezident kreslosuna dikib. “Niyə də olmasın?” düşünən Blatter indi var gücü ilə Mais Mənsimov – Tuyqun Nadirov cütlüyünü nüfuzdan salmağa çalışır. Amma vaxtında keçirilən mətbuat konfransı Yozef babaya layiqli cavab oldu: “QƏRƏZ”! Əlbəttə, Blatter hələ mübarizəsini davam etdirəcək. O, var gücü ilə çalışacaq ki, Mais Mənsimov və Tuyqun Nadirovun növbəti fırıldaqlarını tapıb ortaya çıxarsın.
Amma “mehriban cütlük” qədər şəffaf mühasibata sahib olan klub rəhbərləri yoxdu. Elə Eder Bonfim, Qalin İvanov və onlarla bu cür halları xatırlasaq, “Xəzər Lənkəran” rəhbərliyinin nə dərəcədə dəqiq işlədiklərini görərik. Sa Bun Çu komandanın son 3 ildə medalçılar sırasına düşməməyinə də aydınlıq gətirməyə zərurət duyur. Buyurun, dinləyin.
Təsəvvür edin, “Xəzər Lənkəran” hər il medal qazanır, avrokuboklara vəsiqə əldə edir. Xatırlayın görüm, qitəmiqyaslı yarışlarda ən uğursuz çıxış edən komandalarımız hansılardı? Bəli! Öncüllər sırasında məhz Mais Məmmədovun apardığı uğurlu strateji xəttin nəticəsi olaraq, “Xəzər Lənkəran” dayanıb. İndiyədək eşitmisiniz ki, bu komanda avrokuboklarda iki mərhələ adlasın? Yox! Ona görə adlamırlar ki, “Qarabağ” kimi qrupa düşüb, sonra millətin əhvalını korlamasınlar. Nə vaxt ki, Avropa Liqasının qalibi olmağa hazır olarlar, onda da, mərhələləri keçərlər. Nəyə görə xərcə düşüb, “Fransa sənin, Almaniya mənim” desinlər. Gül kimi oturublar evlərində. Son 3 ildə heç olmasa, bircə dəfə eşitmisiniz ki, “Xəzər Lənkəran”ı avrokuboklardakı uğursuzluğa görə danlayan olsun? Eşitməzsiniz də! Elə bilirsiniz klub prezidenti olmaq asan məsələdi? Mais Mənsimov gecəsini-gündüzünə qatıb, hesablayıb ki, avrokuboklara vəsiqə qazanmasalar yaxşıdı. Bax, buna görə də cənublular ən doğru seçimi edibər. Hələ 3 il nədi, artıq 2015-2016 mövsümündə də eyni strateji planın həyata keçməsi üçün əməli addımlar atılıb. İndi qoy UEFA prezidenti Mişel Platini baş sındırsın görək, “Xəzər Lənkəran”a qarşı hansı təxribatı törədə bilər.
Nadirovun mətbuat konfransında daha bir tarixi hadisə baş verib. Vitse-prezident bildirib ki, hər 30 transferdən 3-ü, yəni, 10 faizi qalmaqalla nəticələnməlidi. Bunu futbol kitablarında mündərəcat əvəzi vermək lazımdı. Üstəlik məlum olub ki, Azərbaycanın digər klublarına qarşı FİFA heç bir sanksiyanı ona görə tətbiq etmir ki, onların heç biri legioner transfer reallaşdırmır. Doğrudu, hörmət əlaməti olaraq, Nadirov bütün klubların yox, bəzilərinin əcnəbilərin xidmətindən yararlanmadığını qeyd edib. Düz demir ki? Məsələn, “Göyəzən”, “Mil-Muğan”, MOİK. Bax, bu komandalardan heç vaxt FİFA-ya şikayətçi olan olmayıb. Nə olsun ki, vitse-prezident Premyer Liqa klubları deyib. Kişinin oğlu “skromnı”dı da, ona görə də Premyer Liqanın adını tutub. Amma…
Olan-olub, keçən-keçib. İndi hamı bilir ki, Blatter Mais Mənsimovun kreslosuna göz dikib. Bununla bağlı Şimali Koreyanın 1-ci kanalında da reportaj təqdim olunub. Axı biz – şimali koreyalılar demokratiyanın beşiyi olan ölkənin vətəndaşıyıq. Çətin bu cür kəskin etirazdan sonra Blatter “Xəzər Lənkəran”da prezident ola. Ona ən yaxşı halda futbolçu olmağı təklif edə bilərlər. Axı belədə, FİFA-ya çətin ki, şikayət edə. Təki “10 faiz” sırasına düşməsin…