Ölkə futbolu
"Qəbələ"nin həkimi zədəlilərinin durumundan danışdı
"Qəbələ"nin ukraynalı qapıçısı Dmitri Bezotosn…
"Qəbələ"nin ukraynalı qapıçısı Dmitri Bezotosnı çıxışını Topaz Premyer Liqasında qış fasiləsi başlamamış bitirməli olub. Futbolinfo.az xəbər verir ki, ayaq pəncəsində barmaq sümüyü sınan legioner bir neçə gündür vətənindədir.
"Qırmızı-qaralar"ın əsas komandasının həkimi Roman Jolobaylyuk "Qəbələ İK" qəzetinə açıqlamasında Bezotosnının təkrar müayinə olunacağını bildirib: “Ona gips qoyulub. Bu həftə təkrar müayinə olunacaq və nəticəsini Ukraynadan bizə göndərəcək. Dmitrinin qış fasiləsinədək sağalacağını gözləyirik”.
Jolobaylyuk əyalət təmsilçisinin müdafiəçisi Ruslan Abışovun zədəsiylə bağlı alman həmkarlarına müraciət etdiklərini bildirib. Onun sözlərinə görə, Münhendən aldıqları cavaba əsasən müalicə kursunu müəyyənləşdiriblər: “Köhnə zədə Ruslanı neçə vaxtdır narahat edir. Bu problemi birdəfəlik həll etməkdə futbolçuya kömək etmək istəyirik. Almaniyanın Münhen şəhərindəki klinikada həkim tanışlarım var. Alman həmkarlarımla məsləhətləşməyə ehtiyac vardı. Rentgen müayinəsinin nəticəsini onlara göndərdik və artıq cavab almışıq. Məlum oldu ki, problem Abışovun diz nahiyəsində yox, onurğa sütunundadır. Bu il oyunlarımız bitəndən sonra futbolçunu Almaniyaya müalicəyə göndərməyi nəzərdə tutmuşuq. Müayinənin nəticələrini bilmədən onu risk qarşısında qoya bilməzdik. Hələliksə Ruslan komandanın oyunlarında iştirak edir”.
Qeyd edək ki, Ruslanla yanaşı, estoniyalı hücumçu Sergey Zenyov da zədə üzündən “Neftçi”ylə Qəbələdəki matçı tribunadan izləməli olub.