Ölkə futbolu
Klublar Komitəsinə sədri seçərkən…
Sabah Klublar Komitəsinin növbəti iclası keçiriləcək….
Sabah Klublar Komitəsinin növbəti iclası keçiriləcək. “Saxla tatı – vur tatı” öz yerində, tədbirdə 2016-cı il üçün sədr vəzifəsinə seçki də keçiriləcək. Əldə etdiyimiz məlumata görə, 2015-də olduğu kimi, sədr postunda yenə də “Xəzər Lənkəran”ın vits-prezidenti Tuyqun Nadirov saxlanılacaq.
Bu, baş versə, tragikomediya zirvə həddinə çatacaq. Mübariz Mənsimovun kluba ayırdığı pulları balta kəsmədiyi bir vaxtda beynəlxalq arenada “Xəzər Lənkəran”a heç bir uğur qazandırmayan, Azərbaycan futbolunun imicini ləkələyən funksioner “10 komandanın ağsaqqalı” postuna sahib çıxacaq. Cənub təmsilçisinin FİFA-nın onlarla sanksiyasına məruz qalmasında günah sahibi deyilmi Nadirov? Lap deyək ki, Mais Mənsimovun özbaşnalığına qarşı çıxa bilməyib. Birncisi, bu hoqqalara qarşı çıxa bilmirsənsə, kreslodan ikiəlli yapışma. İkincisi də bir özbaşnalığa göz yuman, digərinə də haqq səsi ucaltmaq cürətinə malik ola bilməz. Deyan Blajevski, Qalin İvanov, Eder Bonfim, Veldin Muharemoviç və digər futbolçularla müqavilə şərtlərinə riayət etməyən bir klubun vitse-prezidenti digərlərinə nə öyrədə bilər, necə rəhbərlik edə bilər?
Gəlin müqayisə aparaq. “Neftçi”nin vitse-prezidenti Elnur Məmmədov, “Sumqayıt”ın prezidenti Kamran Quliyev, “Qəbələ”nin vitse-prezidenti Fariz Nəcəfov, “Qarabağ”ın prezidenti Tahir Gözəl. Adlara baxın! Gördükləri işlərə baxın! Müqayisə aparın.
Sadıq Sadıqov dövrü başa çatdıqdan sonra “Neftçi”də bir yeyinti hadisəsinə rast gəlmisinizmi? 1,6 milyon manatlıq büdcəylə turnir cədvəlinin ortalarında qərarlaşan Kamran Quliyevli “Sumqayıt” səltənət içərisində üzən, lakin turnir cədvəlinin zirzəmisində qərarlaşan Tuyqun Nadirovlu “Xəzər Lənkəran”la müqayisə oluna bilərmi? Bəs “Qəbələ”nin vitse-prezidenti Fariz Nəcəfov? Bəs “Qarabağ”ın prezidenti Tahir Gözəl? Çox maraqlıdı, onlar Nadirovun namizədliyinin lehinə necə əl qaldıracaqlar?
Adını “demokratik seçki” qoyub, əvvəlcədən sədri tapşırıqla qəbul edirsinizsə, edin! Amma heç olmasa bu klresloya layiq olan şəxsin namizədliyini qəbul edin. Seçim hüququ əlinizdədi. Sabah bu təklifin əleyhinə çıxsanız, ictimaiyyət arxanızda dayanacaq. Yox, əgər “intizam qaydaları”na uyğun hərəkət etsəniz, çətin ki, nə vaxtsa özünüzə bu seçimi bağışlayasınız.
CEYHUN ƏLİYEV
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”
- Ölkə futbolu2024-04-23 08:00
“Səbail” “Sabah”a uduzsa…