Ölkə futbolu
“Topaz”da maya vergisi
Azərbaycanda idman mərc oyunlarından əldə edilən uduşlar gəlir…
Azərbaycanda idman mərc oyunlarından əldə edilən uduşlar gəlir vergisinə cəlb olunmağa başlayıb. Futbolinfo.az xəbər verir ki, bu, "Azərbaycan Respublikasının Vergi Məcəlləsində dəyişikliklər edilməsi haqqında" 2015-ci il 20 oktyabr tarixli qanunda əksini tapıb.
Bu ildən etibarən “Topaz”da udan vətəndaşlar 10 faiz vergi ödəyəcəklər. Maraqlıdı ki, adı “gəlir vergisi” qoyulsa da, vətəndaşlar udduqları vəsaitin deyil, yatırılan məbləğlə uduşun cəminin 10 faizini ödəyir.
Bunu misalla izah edək. Deyək ki, hansısa vətəndaş meydan sahibinin qalib gələcəyinə inanaraq, 1,20 əmsalına 1000 manat yatırım edib. Onun təxmini özünü doğruldub və oyunçu yatırdığı vəsaitin 20 faizi həcmində gəlir əldə edib. Yəni, onun gəliri 200 manat təşkil edib. Bunun da 10 faizi 20 manat edir. Amma Vergilər Nazirliyi ümumi məbləğin 10 faizini tutur. Yəni, 1200 manatdan 120-ni vətəndaşın əlindən alırlar. Deməli, 1000 manatını riskə atan vətəndaş yekunda 80 manat gəlirlə qalır.
Hələ bu, harasıdı? Bəs uduş əmsalı 1,10 olsa necə? Təsəvvür edirsiniz, “stavka”sı udan insan pulunu aldıqda mənfi saldoya məruz qalacaq!? Yəni, 1000 manat yatırım edən şəxs 1100 manatla evə qayıtmaq əvəzinə, 110 manat vergi ödəyib, yekunda 990 manatla qalacaq. Təsəvvür edirsiniz, insan guya udub, əslində isə udduğu məbləğin üstünə 10 manat da qoyub, vergi ödəyir! Yekunda 1000 manat pul qoyub, guya udan vətəndaş 990 manatını geri aldığına görə “sevinir”.
Daha bir məqama diqqət yetirmək gərəkdi. Deyək ki, həmin vətəndaş 1200 manat maaş alır və vergi kimi 200 manat ödəyib. Bu, onun gəlir vergisi idi. İndi Vergilər Nazirliyi qalan məbləğin daha bir “gəlir vergisi”ni istəyir. Əlbəttə, bu, qeyri-qanunidi!
Məsələyə münasibət öyrənmək üçün Vergilər Nazirliyinin “Qaynar xətt”i ilə əlaqə saxladıq. Yuxarıdakı qeydlərimizi həmsöhbətimizə izah etdik. O da öz növbəsində dediklərimizi təsdiqlədi: “Bəli, bu, gəlir vergisidi. Qeyd etdiyiniz 1000 manatlıq misala gəlincə, biz ümumi uduşu 1100 manat kimi hesablayırıq. Əlbəttə, mənim cavabım sizi qane etməyə bilər. Zəhmət olmasa, yazılı şəkildə nazirliyə müraciət edin. Düşünürəm ki, daha müfəssəl cavab alarsınız”.
Heç kim “ayranına turş deməz”. Ancaq fakt budu ki, nazirlik təmsilçisi nə dediyimizi gözəl anlasa da, gəlirin 100 manat kimi deyil, 1100 manat kimi hesablandığını söylədi. Amma bununla faktiki olaraq, “Topaz”ın evini yıxdı. Niyə? Çünki bu hesablamaları tək biz aparmırıq. Pul yatıran insan da “gəlir-çıxar”ını görür və indi innovasiya texnologiyaları ilə az-çox tanış olan insan internetdə özünə hesab açır və əcnəbi bukmeker kontorlarına yatırım edir. Belədə, onlardan faiz tutan da olmur, verilən əmsallar da “Topaz”dakından xeyli üstün olur. Bunu bacarmayanlar isə, “qara bazar”a üz tutacaq. Hər halda, orada da əmsallar “Topaz”ı kölgədə qoyur. 10 faizlik “gəlir vergisi”ndən isə söhbət belə getmir. Üstəlik, nəzərə almaq lazımdı ki, bir məbləğdən iki dəfə vergi tutmaq olmaz! “Topaz” gəlir vergisi ödəyir. Bu şirkətin gəliri sırf vətəndaşların uduzduqları pullardan əmələ gəlir. Ancaq “Topaz”ın “net debet”i (təmiz gəliri) həmin vətəndaşların uduşları ödəndikdən sonra hesablanır.
Və yenə də “analoqu olmayan”… Dünya praktikasında bu cür hala rast gəlmək mümkün deyil. Əksinə, bukmeker kontorları oyunçulara müxtəlif şirnikləndirici lotereyalar təşkil edirlər. Məsələn, ay ərzində 10 min dollarlıq dövriyyə edən oyunçuya müəyyən faiz geri qaytarılır. Bizdə isə… Axı, “analoqu olmayan”ıq.
Məsələylə bağlı “Topaz”ın da mövqeyini öyrənməyə çalışdıq. Danışdıq, rəsmi sorğu istədilər göndərdik. Cavabı hələ də gözləyirik…
CEYHUN ƏLİYEV
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Ölkə futbolu2024-04-29 20:00
“Baku Sportinq”dən növbəti darmadağın
- Dünya futbolu2024-04-29 18:32
Palladino iddialı komandadan dəvət gözləyir