Ölkə futbolu
Futbolumuzun müalicə məkanı – Hindistan
Xal. Hindistanda adətən qırmızı xal qoymuş qadın ərə getmə s…
Xal. Hindistanda adətən qırmızı xal qoymuş qadın ərə getmə simvolunu nümayiş etdirir. O, ailə qurduğu gün qırmızı xal – bindiyə qovuşur.
Hindistanda bu ritual qadının müdrikləşməsi anlamına gəlir və ailə qurduğu gün onun alnında “3-cü gözü peyda olur”. Rəvayətə görə, ərə gedən gündən qadına ömür-gün yoldaşına yaxşı qulluq etmək üçün 2 göz kifayət etmir və belədə daha biri – bindi əlavə olunur. Özü də bu, “müdriklik gözü”dü…
Azərbaycan futbolunda “xal” fərqli anlama gəlir. Hindistanlı qadınlar xala qovuşmaqla “müdrikləşirsə”, bizimkilərin xalları silinə-silinə gedir. “Rəvan”la “Bakı” nə qədər “müdrikləşmək” istəsə də, “alınlarına xalları keyfiyyətsiz vurulur”. Elə ona görə ali futbol qurumları başlarına vurub, xallarını əllərindən alırlar. Onlardan geri qalmayan “Xəzər Lənkəran” da yaz aylarında 6 dəfə “müdrikləşdiriləcək”. Əlbəttə, xal silindikdən sonra cənubluların vitse-prezidenti Tuyqun Nadirov çıxıb bir mətbuat konfransı təşkil edib, FİFA-nı qərəzdə günahlandıracaq. Hətta sadəlövhlərin başının altına yastıq da qoyacaq ki, gələn mövsüm möhtəşəm “Xəzər Lənkəran” görəcəklər. Əlbəttə, sadəlövhlərin…
Amma hindistanlılara inansaq, bu ritualı mütləq AFFA-nın binasına köçürmək lazımdı. Məsələn, Hakimlər Komitəsinin sədri Xaqani Məmmədovun alnına bindi vurulsa, o, bir daha rüşvətə meyl göstərməz. “İnter”lə “qatar əhvalatı”ndan sonra Məmmədovun hakimlik qazanına qayıdacağı özlüyündə rüsvayçılıq idi. Sonradan “15 dənə” də üzə çıxdı. Amma AFFA “halal xoşun” deyib, bu məsələni də ört-basdır elədi. İndi müdrikləşmək üçün mütləq AFFA-dakıları Hindistana ezam etmək lazımdı. Gedib, alınlarına bir xal qoydursunlar. Ki, bəlkə özləri də rüşvətdən uzaq dayanarlar, Hakimlər Komitəsinin sədri də.
Dünən AFFA-nın baş katibi Elxan Məmmədov da xal qazanmaq eşqinə düşdü. Jurnalistləri toplayıb, “müdrikləşdiyini” nümayiş etdirmək istədi. Məmmədov tədbirli adamdı. Elə-belə xal qazanmaq eşqinə düşməz. Görünür, yaxşı şahmat oynamağı var. Elə buna görə də bir neçə gedişi qabaqcadan hesablayıb. Ancaq nəyə hesablandığını indidən qətiyyətlə deyə bilmərəm. Bütün hallarda bir şeyə əmin olduq: çoxsaylı səfərlər arasında baş katib Hindistana da baş çəkməyə macal tapıb. Çünki indi o, idman mediasıyla dost olmaq istədiyini nümayiş etdirib. Kişi əməlli-başlı müdrikləşib.
Yanvar yavaş-yavaş sona çatır. Futbol olmasa da, futbol hadisələri kifayət qədər oldu. Ancaq nədənsə bu toplumu birləşdirən hindistanlı qadınların müqəddəs xalı – bindi oldu. Ümid edək ki, fevralda alnına bindi vurulası futbol funksionerlərinin sayı azalacaq. Ancaq ümid. Çünki sonuncu ölən məhz anası ölmüş ümid olur.
CEYHUN ƏLİYEV
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?