Ölkə futbolu
Bu rüsvayçılıqlara son qoyun!
1-ci divizion. Gözdən-qulaqdan uzaq, heç kimin diqqətini…
1-ci divizion. Gözdən-qulaqdan uzaq, heç kimin diqqətini çəkməyən çempionat. Qalibi olana medal verilir, iştirakçılarından istənilənə Premyer Liqaya vəsiqə. Büdcələri bəlli olmayan, bəzən məşqçisi belə olmayan komandalar “öz şirələrində qaynayır”. “Gözün üstə qaşın var” deyən yoxdu. Bəlkə var? Varsa da, “qaş” axtaranlar öz mənafeləri üçün bu təhqiqatı aparırlar.
Azərbaycanda indiyə qədər bir dəfə də danışılmış oyunlara dair fakt rəsmi sübutunu tapmayıb. Uzun illər ölkə mətbuatı “İnter”lə “Simurq”un “bir bulaqdan su içdiyi”ni bar-bar bağırsa da, AFFA “iki ayağını bir başmağa dirəyərək”, “belə şey yoxdu” deyirdi. Başqa sözlə, Zaqatala təmsilçisinin “böyük qardaşı”nı doyunca xalla təmin etməsinə don geyindirib, gözdən pərdə asırdı. Yalnız Cahangir Hacıyevin “vurulduğu” xəbərini aldıqdan sonra assosiasiyasın baş katibi Elxan Məmmədov “sən demə, hər iki kluba Azərbaycan Beynəlxalq Bankı himayədarlıq edirmiş” dedi. Elə məşhur “Turan” – “Neftçi” oyunu barədə də eyni səpkili açıqlama yalnız özünə sərf edən vaxt üzə çıxdı.
Ötən mövsüm futbolinfo.az “Bakılı” – “Göyəzən” qarşılaşasmında ilk yarının qonaqların minimalhesablı üstünlüyü, qarşılaşmanın isə 2:1 “Bakılı”nın xeyrinə başa çatacağını əvvəlcədən yazdı. Nəticə və ssenari nöqtə-vergülünə qədər təsdiqini tapsa da, AFFA yenə də “ağzına su aldı” və “sübut yoxdu” dedi. Dünyanın 4 tərəfində minimal şübhələri belə araşdırıb, daim günahkarları cəzalandırırlar. Elə bir neçə gün əvvəl “Bakı”nın sabiq müdafiəçisi İbrahim Karqbonun Hollandiya çempionatında oyun alqı-satqısında iştirak etməsini boynuna almasını xatırlatmaq kifayətdi ki, müxtəlif ölkələrin federasiyalarının bu mərəzlə necə mübarizə apardığının şahidi olaq. Tək Azərbaycanda hər şey “aydan arı, sudan duru”du.
Budu, daha bir əndrabadilik. Və əlbəttə ki, yenidən Azərbaycanda. “Şərurspor” “Bayıl Arena”da keçirilən “Göyəzən”lə qarşılaşmada 0:3 məğlub olub. Əlbəttə, AFFA ənənəvi olaraq, “futbolumuz inkişaf edir, istənilən oyunda favorit uduza bilər” deməklə məsələni ört-basdır etməyə çalışa bilər. Ancaq gəlin bir neçə şübhəli faktlara xüsusi diqqət yetirək.
Fakt 1. Birinci dövrədə bu komandalar arasında Qazaxda baş tutan qarşılaşmada “Şərurspor” 5:0 (!) hesablı qələbə qazanıb. Qonaqların 5 qolunun hamısını Rəhman Musayev vurub!
Fakt 2. “Göyəzən” çempionat ərzində yalnız ilk turda qələbə qazanmışdı. Özü də bu, ötən mövsüm nəticəsi əvvəlcədən müəyyənləşdirilən “Bakılı”yla qarşılaşmada baş tutub.
Fakt 3. Meydan sahiblərinin qapısına vurulan ilk qola gözucu baxın.
Elə AFFA da qoy gözucu baxsın. Amma “xüsusi eynək”lə yox ha! Çünki assosiasiyanın təyin etdiyi komissiyalar dərhal “xüsusi eynəklər”lə də təchiz olunur. Yekunda nə “Bakılı” – “Göyəzən” matçındakı faktları görürlər, nə Xaqani Məmmədovun “15 dənə verirlər”i eşidirlər. İndi də növbəti faktlar. Bəlkə heç olmasa Hesabat-Seçki Konfransı öncəsi “ört-basdır metodologiyası”ndan əl çəkələr?
CEYHUN ƏLİYEV
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-23 08:00
“Səbail” “Sabah”a uduzsa…