Layihə
“Böyük oyun”: qadağanın götürülməsi üçün rəsmi müraciət lazımdı – LAYİHƏ
Son illərdə ölkə çempionatının ən önəmli hadis…
Son illərdə ölkə çempionatının ən önəmli hadisələrindən biri heç şübhəsiz ki, “Xəzər Lənkəran” və “Neftçi” arasında keçirilən görüşlər olub. Söhbət əlbəttə ki, tribunalara toplaşan hər iki tərəfin azarkeşlərinin bu qarşılaşmalara qatdıqları rəngdən gedir. Ancaq məlum qarşıdurmalardan sonra İntizam Komitəsinin haqlı (!!!) qərarı futbolumuzda bu yöndə əsl süstlük yaratdı.
Köhnə yaranı təzələmək niyyəti güdmürük. Əksinə, hər iki tərəfi də köhnə umu-küsünü unutmağa çağırırıq. Kimin günahkar olması qoy keçmiş zamanda qalsın. Bu gün isə futbolumuzun bəzəyi sayılan fanatların geri qaytarılması zamanıdı.
Ancaq məsələnin müsbət həllini tapması üçün ilk növbədə 3 tərəfin mövqeyini öyrənməyə zərurət var. Yalnız bundan sonra problemi aradan qaldırmaq mümkündü. “Üç tərəf”in mövqeyini isə PFL-in mətbuat xidmətinin rəhbəri Aslan Şahgəldiyev, onun “Neftçi” və “Xəzər Lənkəran”dan olan həmkarları Mehman Rəsulov və Hüseyn Cəbrayıloğlu ifadə edəcəklər.
İlk olaraq, “Xəzər Lənkəran” tərəfinin mövqeyini öyrənək: “Hər birimiz “Böyük oyun”da hər iki komandanın azarkeşlərinin iştirak etməsini arzulayırıq. Mətbuat da hər oyundan əvvəl bu məsələni qabardır. Dəfələrlə şifahi söhbətlər zamanı PFL-ə bildirmişik ki, biz “Neftçi” azarkeşlərinin təhlükəsizliyinə təminat veririk. Necə olur, ölkəmizdə Avropa çempionatı keçirilir, bütün iştirakçılara təhlükəsizlik təminatı verilir, biz azərbaycanlılarımıza verə bilmirik? Bütün komandaların fanatları necə, “Neftçi”də həmçinin. Ən yüksək səviyyədə təhlükəsizliklərini təmin etməyə hazırıq”.
Daha sonra “Neftçi”nin sözçüsü – Mehman Rəsulova tribuna verdik: “Təəssüf ki, bu qərar hələ də qüvvədə qalır. Əlbəttə, istəyərdik ki, hər iki komandanın azarkeşləri səfər matçlarında sevimli futbolçularını dəstəkləyə bilsin. “Neftçi”nin cari mövsümdə ev oyunlarını dəfələrlə canlı izləmisiniz. Özünüz də, AFFA da, PFL də gözəl bilirlər ki, təhlükəsizlik işlərinə necə həssas yanaşırıq və heç bir xoşagəlməz hal yaşana bilməz. İnanıram ki, Lənkəran klubu da bizim fanatların təhlükəsizliyinə tam təminat verər. Ancaq son instansiya biz deyilik. Qərarı İntizam Komitəsi verib”.
Maraqlıdı ki, PFL-in mətbuat xidmətinin rəhbəri Aslan Şahgəldiyev də bu qadağanın götürülməsinin tərəfdarı olduğunu gizlətmədi. O, “əmma”lara toxundu, məsələnin müsbət həlli üçün hansı zəruri addımın atılmalı olduğunu da bildirdi: “Mövsüm sona çatır. Bu komandalar arasında bu çempionatda 1 oyun qalıb və onun da keçirilməsinə cəmi 1 gün var. Yəni, istənilən halda, indi qərarın dəyişdirilməsi mümkün deyil. Ancaq məsələnin digər tərəfi də var. Nə “Neftçi”, nə də “Xəzər Lənkəran” indiyədək qadağanın götürülməsi üçün rəsmi müraciət etməyiblər. Şifahi deyilən sözü qovluğa qoya bilməzsən. Tərəflər rəsmi müraciət etdikdən sonra məsələyə baxılacaq və ən uyğun qərar qəbul ediləcək”.
Şahgəldiyevlə danışdıqdan sonra yenidən hər iki klubun mətbuat xidməti ilə əlaqə qurduq. Həm Rəsulov, həm də Cəbrayıloğlu klub rəhbərliyinə bu barədə məlumat verəcəklərini və fanatların səfər qarşılaşmalarında sevimli komandalarını tribunadan dəstəkləməsi üçün bütün mümkün vasitələrdən istfadə edəcəklərinə dair söz verdi.
Bu qədər sadə. Bu yazıda biz kimisə tənqid etmək, günahkar çıxarmaq niyyəti güdmürük. Əksinə, azarkeşlərlə bağlı layihəmizin ilk tutarlı nəticəsi kimi fanatların tribunalara qaytarılması yönündə əməli iş görmək məqsədi güdürük. Bir neçə gün əvvəl ölkə klublarının azarkeşlərinin Qarabağ savaşında torpaqlarımızı geri qaytarmaq uğrunda döyüşən əsgərlərimizə dəstək yürüşünü xatırlatmaq istəyərdik. Bu aksiyada “Neftçi” və “Xəzər Lənkəran” fanatlarını nə canlı, nə də dəmir sədd ayırırdı. Onlar əl-ələ verib çiyin-çiyinə addımlayırdılar. Əsl azərbaycanlı ruhunu ortaya qoyaraq!
Kin-küdurəti unutdurmaq üçün hər birimiz əməli iş görməliyik, fanatları tribunalara qaytarmaq, qalmaqallardan yayınmaq üçün maarifləndirici işlər aparmalıyıq. Futbolinfo.az olaraq, bu qadağa götürüləcəyi təqdirdə, hər iki komandanın fanat orduları ilə görüş təşkil etməyi üzərimizə götürür, xoşagəlməz halların yaşanmaması üçün bütün mümkün mexanizmlərdən istifadə edəcəyimizə söz veririk. Eyni zamanda, “Xəzər Lənkəran”la “Neftçi” arasında keçiriləcək qarşılaşmalarda bayram ab-havası yaşanması üçün hər iki komandanın rəhbərliyinə təkliflər paketi təqdim etməyi də üzərimizə götürürük.
Təki futbolumuz bəzəksiz (azarkeşsiz) qalmasın!
CEYHUN ƏLİYEV
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?