Layihə
“İnter”i ayaqda saxlayan yetirmələri
Ötən mövsüm başa çatar-çatmaz, “?…
Ötən mövsüm başa çatar-çatmaz, “İnter”in başının üstünü “qara buludlar” bürüdü. Özü də maliyyə problemləri ağuşuna tək əsas komandanı almadı: pulsuzluq əvəzedcililərdən tutmuş, aşağı yaş qruplarının komandalarınadək təsir mexanizmini işə saldı. Finiş xəttinə yaxınlaşdıqda sponsorun başının cəncələ düşməsi klubun bütün sahələrinə zərbə endirdi.
Doğrudu, “bankirlər” Avropa Liqasından çəkilmədilər, hətta tarixlərinin ən uğurlu nəticəsinə də imza atmağı bacardılar. Ancaq yol xərcini qarşılaya, futbolçuların məvaciblərini ödəyə bilməyən klubun uçuruma doğru əmin addımlarla irəlilədiyi göz önündəydi. Zaman hadisələrin proqnozlaşdırıldığı məcrada davam etdiyini göstərdi. “İnter” iştirak ərizəsinə salmağa futbolçu tapmırdı. Bax, bu məqamda komandanın dadına klub çatdı…
…Bu gün “İnter”in simasını müəyyənləşdirən əcnəbilər – Nika Kvekveskiri, Sezar Meza Kolli, Denis Silva, Zurab Xizanişviliylə yanaşı, Mirsahib Abbasov, Abbas Hüseynov, Fuad Bayramovdu. Əsas heyətin daimi üzvünə çevrilmək üçün qapını dabanı ilə döyən Sərtan Taşkın da diqqət çəkən simalardandı. Adlarını çəkdiyimiz futbolçular “İnter”in aşağı yaş qruplarından çıxan uşaqlardı.
Birdən-birə 4 oyunçunun elitar komandanın heyətində parlamasının başlıca 2 səbəbi oldu: klubun maliyyə durumunun qeyri-qənaətbəxş olması və aşağı yaş qruplarında işin düzgün qurulması. Əks təqdirdə “İnter” “Rəvan”dan heç nə ilə fərqlənməyəcəkdi.
Adlarını çəkdiyimiz gənc futbolçuların bəxti daha bir məqamda gətirdi ki, ölkə çempionatının səviyyəsi kəskin şəkildə aşağı düşdü və onlar rəqabətə davam gətirməklə yanaşı, Premyer Liqa təcrübəsi toplamaqda da çətinlik çəkmədilər. Ancaq əbəs yerə deməyiblər ki, “100 dəfə İmama ağlayanda, bir dəfə də Yezidə ağla”. Həm Mirsahib, həm Fuad, həm də Abbas üzərlərinə düşəni maksimum yerinə yetirməklə, gələcəkləri barədə nikbin rəy formalaşdırmaq üçün zəmin yaradıb.
Açığı, yeni nəslin nümayəndələri arasında daha çox Sərtan Taşkın diqqət çəkir. Doğrudu, baş məşqçi Zaur Svanadze gənc müdafiəçiyə hələ ki, az şans tanıyır. Ancaq böyük ehtimalla, artıq növbəti çempionatda Sərtan “bankirlər”in əsas heyətinin daimi üzvlərindən birinə çevriləcək.
Bəli, uzun illər idi “İnter” Azərbaycanda məskunlaşsa da, Azərbaycan klubu kimi tanınmırdı. Klub bir qədər yad təsir bağışlayırdı. Ancaq zaman hər şeyi müalicə edir. Klub yerli kadrlara möhtac oldu və az pula, bəzən isə pulsuz olanda belə komandaya arxa çevirməyən azərbaycanlı balaları oldu.
Bəli, “İnter”in əvəzediciləri bu mövsüm uğursuz çıxışla yadda qalır. Bunun da obyektiv səbəbi var. Məsələ burasındadı ki, maliyyə durumu pisləşdiyi dönəmdə “İnter”in yaşayıb-yaşamayacağı böyük sual altında idi. Bu cür vəziyyətdə karyeralarının zərbə altına düşəcəyindən çəkinən bir sıra perspektivli futbolçular “İnter”i tərk etdi. Aydın məsələdi ki, biz göz qırpımında yeni heyəti formalaşdırmaq qeyri-mümkündü və acı nəticə özünü çox gözlətmədi. Amma karyeralarını riskə atıb, sonadək “bankirlər”lə qalanlar uduzmadı. Elə adları üzərində qurduğumuz bu yazının qəhrəmanları kimi…
İndi “İnter”in qarşısında daha ciddi hədəf dayanmalıdı: yayda aşağı yaş qruplarında yaranan boşluqları aradan qaldırmaq və yeni nəslin yetişməsi üçün ən münasib işləri qurmaq. Çünki əbədi heç nə olmur, o cümlədən də sponsor pulları. Öz yetirmələrinə güvənib, nəticə əldə etmək isə vaqon-vaqon legionerlərlə əldə olunan uğurdan qat-qat şirin və ucuz olur.
“İnter” bir qədər məcburiyyət üzündən öz yetirmələrinə güvənir. Zaman göstərir ki, milyonların xərcləndiyi vaxtla müqayisədə indi – klub yetirmələrinə güvənildiyi vaxt nəticələrdə ciddi dəyişiklik yoxdu. Komandanın iştirak ərizəsində klub akademiyasından çıxan xeyli gənc var. Hələ digər klublara yollanan xeyli futbolçunun da adını çəkə bilərik. Deməli, ötə illər heç də boşa verilməyib. Ancaq uşaq qruplarında işi daha yaxşı qurmaq üçün rəhbərlik yayda diqqətini bu sahəyə yönəltməlidi. Yeni “İnter” klubun öz yetirmələrinin çiynində irəli getməlidi.
CEYHUN ƏLİYEV
- Milli komanda2024-05-03 08:00
Vay(ss) bizim halımıza?
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Digər idman növləri2024-05-03 13:25
Tanınmış idmançılarla – öncə master-klas, sonra birgə məşq