Layihə
BAŞLADI: Türkiyə yığması da bizimlədi
Vədə tamamdı. Az sonra 17 yaşadək futbolçular arasında n&…
Vədə tamamdı. Az sonra 17 yaşadək futbolçular arasında növbəti Avropa çempionatı start götürəcək. Final mərhələsinə ev sahibliyi edən Azərbaycanın milli komandası da ilk oyun günündə qüvvəsini sınayacaq.
Bütün dəstəyimiz Azərbaycan millisi üçündü. Hesabat istəmək üçün tezdi. Öncə millimizin uğurlu çıxışını arzulayıb, futbolçuların yanında olmalı, daha sonra Bakının çətin sınaqdan üzüağ çıxması üçün bir vətəndaş kimi əlimizdən gələni etməliyik. Tribunalarda say düzəltmək üçün deyil, komandamıza dəstək vermək üçün olmalıyıq.
Turnir artıq başlayır. Ancaq ajiotaj istənilən səviyyədə deyil. Təbii ki, bunun əsas səbəbi təşkilatçıların işi istənilən kimi qurmamasına bağlıdı. Təbliğat o qədər də uğurlu aparılmayıb. Amma təkcə təşkilat komitəsini qınamaqla iş bitmir.
Dünən millimizin son axşam məşqinin ilk 15 dəqiqəsi mətbuat üçün açıq elan olunmuşdu. Təkcə futbolçulardan açıqlama almaq üçün deyil, həm də komandaya məsuliyyətlərinin anlatmaq üçün media əhli orada olmalı idi. Çox təəssüf ki, Bakı Olimpiya Stadionunda cəmi 3 saytın əməkdaşı gözə dəydi. Nə qəzet, nə televiziya nümayəndələri milliyə diqqət göstərmədi. Hətta AFFA-nın payçı olduğu, eyni arenada məskunlaşan CBC də kameralarını məşq meydançasına tuşlamadı.
Bu məqamı qeyd etməklə heç də “Futbolinfo”nun açıq məşqdə olduğunu qabartmaq istəmirik, biz onsuz da bütün futbol tədbirlərində öndə gedirik. Sadəcə, Avropa çempionatı üçün akkreditasiya alanların sayının 200-ü keçdiyini xatırladaq. Mətbuatı AFFA-nın yanında olanlara, “düşmən cəbhəsi”nə bölənlər belə məsələlərdə diqqətli olsun, biz də monitorinq aparırıq.
Jurnalistlər üçün ayrılan vaxt bitərkən baş katib Elxan Məmmədov da məşq meydançasına yaxınlaşdı. O, bir sıra hökumət işçiləri ilə açılış mərasimi üçün hazırlıq işlərinin gedişini yoxlamağa gələn AFFA prezidenti Rövnəq Abdullayevi yenicə yola salmışdı. Assosiasiya rəhbərinin ətrafındakı adamların siyahısından bəlli olurdu ki, ilk oyunumuza dövlət başçısının da gəlmək ehtimalı var. Bununla bağlı sual verərkən baş katibin mimikasını görməyə dəyərdi. Cavab verməməsi bir yana, əli ilə öz ağzını tutub “sus” işarəsi verdi. Bu jest maraqlı idi. Cavab verməmək, bu haqda danışmamaq olar, amma “sus” işarəsi?..
Milli komandamızın məşqinə gəlincə, jurnalistlərin önündə futbolçular yalnız isinmə hərəkətləri ilə kifayətləndilər. Adlar, sifətlər isə “göz oxşayırdı”. Heyətin dünənə kimi gizli saxlanılmasının səbəbi elə təxmin etdiyimizdi. Ola bilsin, nəticə vermək naminə AFFA 7 legionerə qucaq atıb. Onlardan 6-sı türkiyəlidi və azərbaycanlı balalarının yerini tutacaq. Bəri başdan deyim ki, öz uşaqlarımızın qazanmayacağı qələbəyə, xallara o qədər də sevinməyəcəyik. O nəticələr də milli komandamızın özü kimi bizə yad gələcək.
Ehtiyat heyəti də saysaq, bu turnirdə “Neftçi” 4, “İnter” 3, “Xəzər Lənkəran”la “Qəbələ” 2, “Qarabağ” və “Sumqayıt” hərəyə 1 futbolçu ilə təmsil olunacaq. Vəssalam! Digər klublar hara baxır; uşaq liqalarında nə iş görülür; xərclənən bu qədər pulun qarşılığı niyə yoxdu? Bütün bu suallara yarış başa çatdıqdan sonra mütləq cavab axtaracağıq.
Hələliksə millimizin ŞƏRƏFİNİ qoruyacaq milliləşdirilmiş futbolçuların siyahısına diqqət edin:
Atlam Ege – Beşiktaş (Türkiyə)
Seyliğli Hüseyin – Beşiktaş (Türkiyə)
Karakaş İsmayil – Trabzonspor (Türkiyə)
Ekincier Barış – Rot-Weiss Essen (Almaniya)
Güler Metin – Beşiktaş (Türkiyə)
Öksüz Doğukan – Trabzonspor (Türkiyə)
Sözün bitdiyi yerdi. Bundan sonra adətən zəlzələ olur. Amma hələ gözləyək, “Azərbaycan adına Türkiyə yığması“ da çıxışını yekunlaşdırsın, öküzün tükünü tərpədərik…
CAVAD
- Milli komanda2024-05-03 08:00
Vay(ss) bizim halımıza?
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Digər idman növləri2024-05-03 13:25
Tanınmış idmançılarla – öncə master-klas, sonra birgə məşq