Nazim Süleymanov: "Futbolda qaçmaqla heç nə alınmır"

Bu gün belaruslu həmyaşıdları ilə qarşılaşan 19 yaşadək futbolçulardan ibarət Azərbaycan yığması 2:1 hesablı qələbə qazanmaqla 2 gün əvvəlki yenilginin (1:4) revanşını almış oldu. Oyundan sonra U-19-un baş məşqçisi futbolinfo.az saytının əməkdaşının suallarını cavablandırıb.

– Qalib gəldiyiniz oyunu necə şərh edə bilərsiniz?
– Oyun pis alınmadı. İndiki məqamda bizim üçün vacib olan gənclərin beynəlxalq oyun təcrübəsinin artmasına nail olmaqdı. Əlbəttə, qələbə əhval-ruhiyyəni yüksəldir, bərpa prosesini də yaxşı keçirməyinə səbəb olur. Qələbələrin sayının çox olması futbolçuların potensialını açmağa kömək edir. Hücuumda pis oynamadıq, amma ilk oyunda olduğu kimi, müdafiədə yenə boşluqlar var idi.  

– Maraqlıdır, birinci oyundan sonra futbolçulara nə dediniz ki, bu dəfə qələbə qazana bildilər?
– İki gün əvvəl keçirilən oyunu izlədik. Onlara dedim ki, elə oynamalıyıq ki, azarkeşlər bu yenilginin təsadüfi olduğunu görsünlər. Çünki birinci oyunda da pis oynamadıq. Düzdü, rəqib azlıqda qalmışdı. Amma həmin matçın qırılma nöqtəsi var idi.

– Qaçırılan penalti epizodunu nəzərdə tursunuz?
–  Bəli, biz qaçırdıq, amma onlar qol vurdular. Nəticədə psixoloji baxımdan üstünlük qazandılar. Bu gün futbolçularımda əzmkarlıq gördüm. Amma verdiyimiz tapşırıqları tam yerinə yetirə bilmədilər. Futbol zəka oyunudu. Nə qədər qol epizodları yaradırıq, ancaq qapıya düşə bilmirik. Buna baxmayaraq, futbolçuları təbrik edirəm.

– Hər iki oyunda futbolçularınız 11 metrlik cərimə zərbəsini dəqiq yerinə yetirə bilmədi. 
– Deməli, penalti zərbələrini dəqiq yerinə yetirmək üzərində işləmək lazımdı. Bu daha çox psixoloji hazırlıqla bağlıdı. 

– Makedoniyadakı birinci oyundan sonra 11 yox, 14 nəfərə qarşı mübarizə apardığınızı dediniz. Necə düşünürsüz, analoji halla belaruslar üzləşmədi?
– Elə deməzdim. Hakimin təyin etdiyi penalti yanlış idi?

– Bizim baxdığımız yerdən şübhəli göründü..
– Künc zərbəsi zamanı topu uzaq cinaha ötürdük. Bu da ev tapşırığı idi. Rəqib də Əlini tutub, saxladı. Amma Makedoniyadakı oyunda qapımıza 3 penalti təyin edildi. Onlardan birini qaytardıq, ikisi qol oldu. Ona görə də Belarusun 14 nəfərə qarşı oynadığını deməzdim.

– Son 4 beynəlxalq oyundan sonra sizi narahat edən məqamlar hansılardı?
– Müdafiədə boşluqlarımız var. Hücumda isə “vuran ayağa” ehtiyac var. Yarımmüdafiə xətti normaldı. Sütərli hücumların qurulmasında fəal iştirak edirlər. 

– Futbolçular verdiyiniz tapşırıqları niyə qavraya bilmirlər? 
– Tapşırıqlar oyun meydanında yaddan çıxır. Çünki top onları aparır. Yenə deyirəm, futbol zəka oyunudu. Qaçmaqla heç nə alınmır. Qaçmaq lazımdı, amma top səni aparmamalıdı.

ELMAR ABDULLA-ZADƏ