Kapitanın etirafı: “200 manata Avropa çempionatını canlı izlədik”

Həvəskar komandalar arasında MFL Kubokunun ilk qalibi olan “Qaradağ Lökbatan” yenicə sona çatan Avropa çempionatının yarımfinalını izləmək şansı qazandı. Qurumun təsis etdiyi yarışın çempionu üçün bu cür mükafat göydəndüşmə oldu. Elə lökbatanlıların kapitanı Məmiş Nəzərov da söhbət əsnasında dediklərimizi təsdiqlədi. Uzaq, əlçatmaz olan Fransanı, qitə birinciliyinin yarımfinalını stadiondan izləmək lökbatanlı gənclərə nəsib oldu. Futbolinfo.az saytına verdiyi müsahibədə MFL Kubokunun ilk qalibinin kapitanı təşkilatçılıq barədə ağızdolusu danışdı.

– İlk olaraq, komandanızın yaranma tarixçəsi barədə məlumat verərdin…
– Heyətimizdə yer alan uşaqlardan bəziləri vaxtilə peşəkar futbolçu olmaq arzusunda olub. Ancaq müxtəlif səbəblərdən bu, baş tutmayıb. Elə daim toplaşıb birlikdə futbol oynayırıq. Olurdu məhəllələrarası, yaxud da hansısa bizim kimi toplaşan komandalara qarşı. İki ilə yaxındı ki, eyni heyətlə oynayırıq. 

– MFL Kuboku barədə necə xəbər tutdunuz?
– “Facebook” səhifəsində MFL-in bu cür yarış təşkil etdiyini oxuduqda, açığı, inanmadıq. Cəmi 200 manata belə bir mükafat!? Utanılası bir şey yoxdu, komanda üzvlərimizin maddi durumu elədi ki, heç həmin 200 manatı da toplamaqda çətinlik çəkirdik. Ancaq çempion komandanın alacağı mükafatı nəzərə alıb, kiçik bir məbləğdə borca da girdik. Ancaq sözü bir yerə qoyduq ki, gedək vəziyyətlə yerində tanış olaq. O qədər fırıldaq işlər görən olur ki. Hər şeylə yerində tanış olduqdan sonra əmin idik: burda hər şey şəffaf və ən yüksək səviyyədədi. Məmnuniyyətlə yarışa qatıldıq. Püşkatma da təxminlərimizdə yanılmadığımızı göstərdi. Özümüzü ən mötəbər yarışın iştirakçısı kimi hiss edirdik. Yekunda isə cəmi 200 manata bütün komandayla Fransanı gəzdik-gördük, Avropa çempionatının yarımfinalını izlədik.

– Turnirdə 8 qarşılaşmaya çıxdınız. Ən çətin, ən unudulmaz oyun kimi hansını göstərərdin?
– Əlbəttə, finalın öz yeri var. Amma ən çətini ¼ finalda oldu. Hesabda 3:1 öndə olsaq da, rəqib final fitinədək hesabı bərabərləşdirdi. Yalnız matçsonrası penalti zərbələri ilə yarımfinala adlaya bildik.

– Yəqin ki, məhz bu görüşdən sonra turnirin qalibi olacağınıza inam yarandı?
– Yarış start götürməmişdən əvvəl də çempionluq barədə düşünürdük. Komandamızda mehribançılıq hökm sürür. Heç bir paxıllıq, qısqanclıq yoxdu. Tez-tez çay süfrəsi arxasında oturub, müzakirələr aparırdıq. Ancaq biri var turniröncəsi, biri də var gedişatı. Qeyd etdiyiniz məqamla razılaşmamaq olmur. Məhz belə bir əsəb gərginliyi ilə zəngin görüşdən sonra Fransanın iyini hiss etməyə başladıq.

– Kuboku başın üzərinə qaldırdın. Artıq Fransaya səfər rəsmiləşmişdi…
– Yuxarıda da qeyd etdim ki, bizim maddi durumumuz bahalı səfərlər barədə düşünməyə belə imkan vermir. Komandamızın cəmi bir üzvü təyyarəyə minmişdi. Qalanlarımız isə heç vaxt təyyarə üzü görməmişdik. Ancaq belə bir gün bizə nəsib oldu ki, Fransanı da gəzdik, Portuqaliya – Uels matçını da canlı izlədik. Ayaz Əhmədov başda olmaqla, MFL-in təşkilatçılarının hər birinə dərin təşəkkürümü bildirirəm. Onların təşəbbüsü, işgüzarlığı olmasaydı, nə bu turnir baş tutardı, nə biz çempion olardıq, nə də Fransanı görərdik. Hər kəs yarışın necə yüksək səviyyədə təşkil olunduğunu gördü. Konkretləşdirsək, həvəskar futbolun təbliğində onların gördüyü işi misilsiz xidmət kimi dəyərləndirməliyik.

– Qarşıdan “San-Marino” Kuboku gəlir. Yenə eyni qurumun patronajı altında. Bəlkə çempionluğun sirrini açasan, yarışöncəsi?
–  Biz kollektiv olaraq bir idik. Hər birimizin sözü digərinin boğazından keçirdi. Hər oyundan sonra müzakirələr aparırdıq, çatışmazlıqları bir-birimizə deyirdik ki, aradan qaldıraq. Komandamızda mehribançılıq hökm sürürdü. Belədə, nəticə də olur. Ancaq bu yarışda da qalib gəlmək istəyirik.

– Və sonuncu sual. Növbəti yarışda qalib olmasanız, təşkilatçılıqla bağlı fikirlərin dəyişməyəcək?
– Siz nə danışırsınız!? Əsla! Kimin qismətindədisə, o da qalib olsun. Təşkilatçılar bizim yerimizə nə qol vurandı, nə də qələbə qazanan. Kim güclüdürsə, o da udsun. Qalib komandanı elə özüm birinci təbrik edərəm.

CEYHUN ƏLİYEV