“Kəpəz” rəhbərliyindən növbəti biganəlik

Bu gün Avropa Liqasının ikinci təsnifat mərhələsinin cavab oyunu çərçivəsində Avstriya “Admira”sını qəbul edəcək “Kəpəz” ciddi problemlə üzləşib. Futbolinfo.az xəbər verir ki, “Dalğa Arena”da baş tutacaq görüşə çox az sayda azarkeşin gələcəyi gözlənilir.

Buna səbəb isə “Kəpəz” rəhbərliyinin komandaya laqeyd münasibətidi. Belə ki, Gəncədə yaşayan futbol həvəskarlarının birinci təsnifat mərhələsində “Daçiya” ilə paytaxtımızda keçirilən oyunu izləməsi üçün klub tərəfindən 11 avtobus ayrılmışdı. Bu isə 550 nəfərin tribunalarda yer almasını təmin etmişdi. 

Lakin nədənsə klub rəhbərliyi bu dəfə nəqliyyat problemini həll etməyi, “Admira” ilə oyun üçün avtobus ayırmağı lazım bilməyib. Bakıya səfər etmələri üçün klubdan xəbər gözləyən azarkeşlər dünən üzücü xəbər alıblar: pul yoxdu, avtobus olmayacaq! Belə vəziyyətdə isə çox az sayda adamın şəxsi imkanı hesabına “Kəpəz”in avstriyalılarla duelini izləməyə gələcəyini təxmin etmək çətin deyil. Komanda indiki halda əsasən paytaxtda yaşayan gəncəlilərin və digər vətəndaşlarımızın dəstəyinə ümid edə bilər. Bu isə o deməkdi ki, əyalət klubunu avstriyalılarla dueldə ən yaxşı halda 1000 nəfər dəstəkləyəcək.

Görəsən, klubun Müşahidə Şurasının sədri Elmir Vəliyev “Kəpəz”in meydança tapa bilməməsindən xəbərsiz olduğu kimi, bu məsələdən agah deyil? Xəbəri yoxdusa, niyə yoxdu? Varsa, niyə problem həllini tapmayıb. Gəncə Şəhər İcra Hakimiyyəti 10-15 avtobus tapmayacaq qədər aciz durumdadımı? Axı, “Kəpəz” Bakını, Yevlaxı, Şəmkiri deyil, Gəncəni təmsil edir. Belə olan halda, kluba qarşı bu biganə münasibətin səbəbi nədi? 

FƏRİD