Müsahibə
Tiranı Skarlatake həvəsləndirib: “Neftçi”də oynamaq maraqlı çağırışdı”
Dünən “Neftçi” rumıniyalı legioner Katalin …
Dünən “Neftçi” rumıniyalı legioner Katalin Tirayla 1 illik müqavilə imzaladı. Bundan öncə isə o, 1 saylı Şəhər Kliniki Xəstəxanasında tibbi müayinədən keçdi. Saat 20.00 radələrində Katalinlə söhbətləşmək üçün yollandığımız xəstəxananın qarşısında götürülən müsahibənin lakonik alınmasının səbəbi futbolçunun bazaya tələsməsi ilə əlaqədar oldu.
– İlk olaraq “Neftçi”yə keçidinin tarixçəsini danışardın…
– Xeyli müddətdi Azərbaycanda oynayan Adrian Skarlatakeylə agentimiz eynidi. Keçidimdən əvvəl də Skarla mənə Azərbaycan haqda çox danışmışdı. Ölkəniz xoş təəssüratlar yaratmışdı. İndi də deyilənləri real həyatda görmək şansı qazanmışam.
– Skarlatakenin ölkəmiz barədə dedikləri maraqlıdı.
– Adrian Azərbaycan futbolunun son illərdə nəzərəçarpacaq dərəcədə inkişaf etdiyini deyib. O, insanların istiqanlığını da xüsusi vurğulayıb. Güclü çempionatda qüvvəmi sınamaq şansı qazanmışam. Əlbəttə ki, bu, bir çağırışdı, özü də maraqlı çağırış. Eyni zamanda, azarkeş amilini də xüsusi vurğulamaq istəyirəm. Eşitdiyimə görə, komandamızın müdhiş fanat ordusu da var.
– Paytaxtımıza gələnə qədər “Neftçi” barədə hansı məlumatların var idi?
– “Neftçi” barədə xeyli əvvəldən məlumatım var idi. Avropa Liqasının qrupunda oynamış komandadı. Tarixi ənənələri var. Ölkədə ən qocaman klubdu.
– Ötən mövsüm rəqib qapılarının torunu silkələyə bilməmisən. Özünü “Neftçi” üçün saxlayırdın?
– Son klubum olan Buxarest “Rapid”i ilə aramızda problemlər yaşandı. Futbolçuların məvaciblərini ödəyə bilmirdilər. Bu üzdən 6 ay oynamadım. Ancaq indi fərqli məkan, fərqli ab-hava, fərqli motivasiyam var. Əlimdən gələnin ən yaxşısını edəcəm ki, “Neftçi”nin qollarını sıralayım, komanda yoldaşlarımla uğur qazanaq.
– “Ağ-qara” heyətlə tanış olmaq imkanın olub?
– Yeni komanda yoldaşlarımın yalnız bir hissəsiylə məşqdə iştirak etmişəm. Digərləri ilə, o cümlədən baş məşqçiylə söhbətim olmayıb. Tibbi müayinədən indi çıxdım. Bax, bu, axşam saatlarında da Vəli Qasımovun yanına yollanıram.
– Və sonuncu sual. Ev problemin necə həll olundu?
– Hazırda Jayro ilə bir evdə qalıram. Ancaq klub rəhbərliyi yaxın günlərdə mənim üçün ayrıca ev tutacaq.
CEYHUN ƏLİYEV
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?