Ölkə futbolu
Qriqorçukun həmin solğun "Qəbələ"si…
"Qəbələ" bu mövsümün hazırlığına başl…
"Qəbələ" bu mövsümün hazırlığına başlayanda ilk məşqlərindən birini izləmişdim. "Bakı"nın bazasında ilk sınaq matçlarını da görmüşdüm. Ruhsuz, dağınıq komanda idi.
Filip Ozobiç həmin oyunda qol vurmuş, amma xoşuma gəlməmişdi. Sonradan bəlli olacaqdı ki, Ozobiç imi "Qəbələ"nin də solğun görünməsinin səbəbi hələ Roman Qriqorçukun rəndəni əlinə almaması, istirahətdən gələn futbolçulara ütü çəkməməsidi. Halbuki bu heyətin nəyisə bacaracağına inanmır, bir daha güclü "Qəbələ" görməyəcəyimizi düşünürdüm.
Sonradan komandanın hazırlığı intensivləşdi, heyətdəki yararsız oyunçular göndərildi, yeni transferlər gəldi. Baş məşqçi axtardığı hücumçunu bugünədək sərəncamında görməsə də, "Qəbələ" yavaş-yavaş forma yığdı, oyundan oyuna artırdı. "Samtredia" keçildi, MTK hər iki oyunda məğlub edildi və…
Dünən də Fransa "Lill"i Bakıya gəldi. Özündənrazı, pley-offa vəsiqəni ciblərinə qoyub qayıdacaqlarmış kimi…
İndiki "Qəbələ" bu klub tarixindəki ən güclü komandadı. Qriqorçuk əla heyət formalaşdırıb və dirijorluq edir. Bəli, ehtiyat oyunçular skamyası zəngin deyil, say düzəlir, keyfiyyət baxımından axsama var. Amma bunun səbəbi klub rəhbərliyinin simicliyi deyil. Sadəcə, komanda 3 gündən sonra ölkə çempionatında limit üzündən bir çox əcnəbilərini ehtiyatda oturtmağa məcbur olacaq.
Avrokubokda əcnəbilər lazımdı, ölkə çempionatında yerlilər oynamalıdı – nonsesdi, klublar odla su arasındadı – yerlilərlə Avropada uğur qazanmaq olmaz, legioner isə onları Premyer Liqada oynada bilməyəndə artıq yükə çevrilir. Qrupa düşə bilmədikdə əcnəbilərə xərclənən milyonlar havaya sovrulmuş sayılacaq. Yaxşı olardı ki, AFFA İcraiyyə Komitəsi növbəti dəfə yığışanda limit məsələsinə yenidən baxsın. Yox, bizə avrokubokda uğur qazanan superklublar lazım deyilsə, o zaman Allah xeyir versin!
Fransa klubu ilə dünənki matçla bağlı başqa bir yazıda bəhs etmişik. Sadəcə, təkrarlamaqda fayda var ki, komandanın uğurunda sabitlik önəmli rol oynayır. Qriqorçuk – həmyerlilərini əzizləmə mərəzini çıxmaq şərti ilə – ideal məşqçilərdəndi. Bu adam son bir həftə elə bir rejimdə çalışıb ki, bunu hər adam özünə rəva görməz. Qidalanmasına, istirahətinə diqqət etmədən ancaq fransızlarla oyunu düşünüb və meydanda elə bir taktiki savaş apardı ki, "əhsən"dən aşağı qiyməti yoxdu. Hər bir detal nəzərə alınmış, hər saniyənin planı cızılmışdı. İfaşılar da əla olunca tarixi nəticə reallaşdı.
Azarkeşlər – möhtəşəm, təşkilatçılıq – ideal, oyun – gözoxşayan, nəticə – super. Qrupa vəsiqə təmin edilməyib, ancaq hətta bu, son qələbəsi də olsa, gələn mövsüm üçün ölkə çempionluğuna ciddi namizəd var. Qəbələ" Çempionlar Liqasına getmək üçün hər şey edəcək. Qriqorçukun taktiki uzaqgörənliyi "Lill"i dizə gətirməyə imkan verdi, üfüqdə yeni səhifələr açılacaq.
"Bakı"nın bazasında gördüyüm solğun "Qəbələ" belə komandaya çevrilibsə, oyundan oyuna artıran qara-qırmızılar" "Qarabağ" erasına son qoymağa da qadirdi.
FƏRİD