Ölkə futbolu
"Mexanizator"un komandası
“Lill”in Fransa versiyasını görənlər “Qəb?…
“Lill”in Fransa versiyasını görənlər “Qəbələ”nin hansı kabusla rastlaşacağını gözəl anlayırdılar. Roman Qriqorçukun yetirmələrini yaxşı halda 90, bəzi variantlarda isə 120 və daha artıq dəqiqəlik zülm gözləyirdi. “Qorxma-qorxma” deməklə deyildi, “qırmızı-qaralar”ı sıradan rəqib deyil, heyətində Portuqaliya yığmasına Avropa çempionluğunu qazandrmış futbolçunun oynadığı “Böyük beşlik” ölkəsinin təmsilçisi gözləyirdi.
“Qəbələ” bu oyuna xüsusi önəm verirdi. Klub rəhbərliyi tribunaları doldurmaq üçün xeyli kreativ addımlara əl atmışdı. Futbolinfo.az ailəsi də ötən axşam baş tutan görüşə biganə qalmamışdı. Təşkil etdiyimiz müsabiqə müəyyən sayda azarkeşin “qırmızı-qaralar”a dəstək olmasını təmin etmişdi.
Stadiona daxil olarkən, maraqlı hadisəylə rastlaşdım. Qapıdan keçmək istədikdə “Qəbələ”nin mühafizə xidmətinin əməkdaşı arxadan gələn avtomobili buraxmağımı istədi. Ancaq bu an pəncərə açıldı və klubun vitse-prezidenti Fariz Nəcəfov “ona olar” deyərək kreslonun hamını korlamadığını bariz şəkildə nümayiş etdirdi…
Tribunaların meydana yaxın olması əla auranın yaranmasını şərtləndirirdi. İnsafən, azarkeşlər də dünənki axşam möhtəşəm idilər. Bəlkə də ilk dəfə idi bu cür mənzərənin şahidi olurdum: fanatlar komandanı hiss edirdi. Ən lazımi anlarda futbolsevərlər “qırmızı-qaralar”a sahib çıxdılar: “Lill” təziyiqi artırdığı anlarda “Qəbələ”, “Qəbələ” sədaları fransızları “azlıqda qoyurdu”. Bu möcüzəni yaratmaqda gecə yarısınadək tribunalarda olan fanatlar futbolçular qədər pay sahibi oldu.
“Lill”in istənilən futbolçusu fiqurdu, amma Eder..! Voyislav Stankoviçsə qaradərili forvardın anasından əmdiyini burnundan gətirdi. Portuqaliyalı müdafiəçimizin əlindən tərpənə bilmirdi.
Ancaq dünənki axşama görə kimisə ümumiyyətlə, tənqid etməyə adamın dili gəlmir. Çünki dünənki axşam onların benefis gecəsi idi. Başlayaq Dmitri Bezotosnıdan. Komandasını bir neçə dəfə real qoldan xilas edən qolkiperin benefis anı Julien Palmerinin ötürməsi zamanı topun Vitali Verniduba dəydiyi epizod oldu. Təcrübəli əlcək sahibi sanki qırıcı təyyarə idi: havadaykən istiqamətini dəyişdi və Fransa nəhənginin arzusunu gözündə qoydu.
Məhəmməd Mirzəbəyov və Rikardinyo cinahlarda olduqca fəal idilər. Hücumlarımız zamanı daim komanda yoldaşlarına kömək edirdilər. Vitali Vernidub hava mübarizələrind soyuqqanlı davranışı ilə seçilirdi.
Sergey Zenyovu unutmamışıq. Sadəcə, belə bir gündə pis şeylərdən yazmaq istəmirik. Rəşad Sadiqov – veteran yarımmüdafiəçi lazımi epizodlarda lazımi nöqtədə peyda olmasıyla “Lill”in işini lilləyirdi. Rəqibin istənilən hücumu zamanı sipər olmağı bacaran Sadiqov komanda yoldaşlarının müdafiə redutlarını möhkəmlətməyə yetişməsi üçün qızıl saniyələr udurdu. Nika Kvekveskiri fərdi ustalığı hesabına xırda follar qazanır, bununla da tempi öldürməyə nail olurdu. Bir neçə dəfə Qafqaz texnikası nümayış etdirən Nika layiq olduğu alqışları aldı.
Fransızlar Teo Uiksin oyununu yaxşı təhlil etmişdilər. Qoleadorluq bacarığını nümayiş etdirməyə imkan vermədilər. Ancaq sən saydığını say, gör Teo nə sayır! Filipp Ozobiçiçə məhsuldar ötürmə edən Uiks arxasınca bir müdafiəçini aparmaqla komanda yoldaşına zərbə vurmaq üçün ərazi açdı.
Filip Ozobiç oyunun əvvəlində kölgəyə çəkilmişdi. Ancaq hər ötən dəqiqə onun açılışmasına təsirini göstərirdi. Vurduğu qol isə..! Buna “bilyard elminin incəlikləri” deyilir. Sərt, dəqiq, qarşısıalınmaz!
Baqali Dabo – meydanda onun qədər işləyən ikinci futbolçu olmadı. Özü də boş-boşuna yuxarı-aşağı qaçmadı. Dabo özünü hər yerə çatdırırdı. Faydalı iş əmsalı 100% civarında oldu. Son 13 dəqiqədə meydançada olan Asif Məmmədov oyuna yaxşı daxil oldu. Matçın son dəqiqələrində vizavisindən sıyrılaraq, qapı torunu silkələməyə yaxın oldu. Sürətli reydləri ilə “Lill”in böyük qüvvəylə irəli atılmasını əngəllədi.
Roman Qriqorçukun xoşladığı bir termin var: “Mexanizm”. Onun mexanizmi dünən əla işləyirdi. Kişi əsl mexanizatordu da!
CEYHUN ƏLİYEV
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?