İlk “təzək”, ilk bəzək, ilk kələk

Mövsümün 1/28-i arxada qaldı. Premyer Liqanın ilk turu kifayət qədər zəngin material təqdim etdi. Ümumiləşdirdikdə, 1-ci turu “baxımlı” adlandırmaq olar. Komandaların hələ oturuşmadığını, fiziki kondisiyalarının idealdan uzaq olmasını nəzərə alsaq, təqdim etdikləri “menyu”nu uğurlu hesab etməliyik.

“AZAL Arena”da baş verən hakim səhvi “ilk turun təzəyi” statusuna layiqdi. Xaqani Məmmədovun çempionat öncəsi keçdiyi təlim-məşq toplanışının bəhrəsi çempionatın açılış oyunundaca göründü. Bu cür laysman və əlavə hakimlərlə haralara gedəcəyimizi deyə bilmərəm, amma ən düzgün qərar Ramil Diniyevin qonorarının AZAL-ın hesabına keçirilməsi olar. Bir-iki dəfə pulu kəsilsə, üçüncüdə ya hakimlikdən imtina edər, ya işinə məsuliyyətlə yanaşar.

“Neftçi”nin oyunu barədə hələ ki, bir söz deməyə tələsməyək. Çünki “ağ-qaralar” hələ çempionatda mübarizə aparacaq heyəti yığıb qurtarmayıb. Əlbəttə, gecikirlər. Ancaq komandaya real qiymət vemək üçün azı 4-5 tura ehtiyac var.

Tərlan Əhmədovun “təyyarəsi” isə “yanacağı”na uyğun idarə olunur. Aydın məsələdi ki, simic AZAL rəhbərliyi mütəxəssisdən hansısa əlahiddə nəticə tələb edə bilməz. 

Günün və ilk turun ikinci qarşılaşmasında ötən mövsümün gümüş mükafatçısı gözlənilmədən evdə “Sumqayıt” qarşısında “ağ bayraq qaldırdı”. Statistikaya əsaslanaraq, bu cür fikir irəli sürmək olar. Ancaq unutmayaq ki, “Zirə”nin hələ 3 yaşı yoxdu. Komandanın ötəinlki uğuru daha çox rəqiblərinin onları ciddiyə almamasıyla əlaqədardı. Hərçənd, ilk tura görə də “qəsəbəlilər”i sıradan çıxarmaq olmaz.

“Sumqayıt” isə ifaçılara görə ötənilkindən zəif olsa da, deyəsən, Samir Abasov bilərəkdən bu cür seçim edib. O, ustalıq səviyyəsi aşağı olan, lakin verdiyi tapşırıqları əməl edən oyunçular toplumu qurmaq niyyətini göstərdi. “Sumqayıt”ın vizit kartı da böyük ehtimalla “döyüşkənlik” olacaq.

Turun mərkəzi qarşılaşması olduqca maraqlı alındı. “Qarabağ”ın səfərdə aldığı məğlubiyyəti komandanın fiaskosu, düşüşü və s. kimi qələmə verməzdik. Sadəcə, Ağdam klubunun formaya düşməsi üçün hələ 10-12 gün vaxt tələb olunur. Bundan sonra “süvarilər” əvvəlkitək “atlarını çapacaqlar”. “İnter”ə isə əhsən! “Bankirlər” ölkə çempionunun ideal formasından uzaq olmasından məharətlə yararlana bildilər.

İlk turun son qarşılaşmasında üz-üzə gələn “Qəbələ”ylə “Kəpəz”in duelində birincilər qalib gəlsələr də, gəncəlilər ən xoş sözlərə layiqdi. Şahin Diniyevin komandası mobil kollektiv təsəvvürü yaratdı. Əlbəttə, bütün cihazlar avtomatlaşmayıb. Elə bunun nəticəsi idi ki, komanda əks-hücumda yaxalandıqda, müdafiədə cəmi 1 (!!!) oyunçuları qalmışdı. Ancaq detallar yerini tutacaq və onda “Kəpəz” istənilən rəqibi üçün başağrısına çevriləcək. Bütün hallarda, bu oyunu turun bəzəyi kimi qələmə verə bilərik.

Görüşün baş hakimi Fariz Yusifov meydandakı futbolçuların bir neçə dəfə simulyasiya edərək, ona kələk gəlmək istəmələrini “oxumaq” bacarığını nümayiş etdirsə də, bəzi hallarda qonaqlara sarı vərəqə verməli epizodlara loyal yanaşdı.

CEYHUN ƏLİYEV