Ölkə futbolu
Sabiqlərin qarşılaşması
Premyer Liqada II tur davam edir. Bu gün ölkə çempio…
Premyer Liqada II tur davam edir. Bu gün ölkə çempionatının daha bir oyunu keçiriləcək. Təqvimə əsasən, axşam saatlarında “İnter” – “Qəbələ” matçını izləməliydik. Lakin Qəbələ təmsilçisi Peşəkar Futbol Liqasına məktub ünvanlayaraq, II turda üz-üzə gələcəyi “İnter”in stadionunun süni örtüklü olmasını əsas gətirərək, matçın yerinin dəyişdirilməsini xahiş edib. Buna səbəb kimi komandanın Avropa Liqasının pley-off mərhələsində “Maribor” klubu ilə hər iki görüşünün təbii örtüklü stadionda keçiriləcəyi göstərilib.
“Qəbələ”nin beynəlxalq miqyaslı oyunlarını nəzərə alan PFL “İnter” klubunun razılıq məktubuna əsasən təqvimdə dəyişik edib. Beləliklə, bu gün “Dalğa Arena”da “Qəbələ” “İnter”i qonaq edəcək.
20:00. “Qəbələ” – “İnter”
Hakimlər: RAUF CABBAROV, Nahid Əliyev, Knyaz Əmiraslanov, Namiq Hüseynov.
Əlavə köməkçi hakimlər: Fariz Yusifov, Rəvan Həmzəzadə.
AFFA nümayəndəsi: Məmmədəli Məmmədov.
Hakim-inspektor: Vüsal Əliyev.
“Dalğa Arena” (6700 yerlik).
Ötən mövsüm “Qəbələ” ilə “İnter” bir-birləri üzərində üstünlük əldə edə bilməyiblər: hərəyə 1 qələbə və 2 heç-heçə. Lakin bu kollektivlərin son 3 duelində cəmi 3 qolun vurulması diqqət çəkir. Son çempionatda rəqibinə səfərdə uduzmayan “bankirlər” bu dəfə onlar üçün daha uyğun məkanda – “Dalğa Arena”da qonaq olacaqlar ki, bu da rəqibin xahişi ilə bağlıdı.
Hər iki komanda mövsümə qələbə ilə başlayıb. Avropa Liqasında möhtəşəm çıxışı ilə rəğbət qazanan “Qəbələ” “Kəpəz”i, “İnter” isə son çempion “Qarabağ”ı məğlub edib. Özü də ağdamlılarla dueldə əldə edilən əzmkar qələbədə əsas pay sahibi ötən mövsümü Qəbələ təmsilçisinin heyətində keçirən Ruslan Abışov oldu. Millimizin üzvünün vurduğu 2 qol paytaxt klubuna 3 xal qazandırdı. Elə bu səbəbdən də Abışov bugünkü oyunda da diqqət mərkəzində olacaq. Lakin aydın məsələdi ki, qələbə yalnız bir futbolçunun səyi ilə deyil, komandanın birgə əziyyəti sayəsində əldə olunur. Bu mənada, axşam saatlarında qələbə instinkti güclü olan iki kollektivin üz-üzə gələcəyini söyləyə bilərik.
STATİSTİKA: 32 oyun, +7=11-14, top fərqi 26-44
ÖTƏN MÖVSÜM…
12.09.2015 İnter – Qəbələ 2:1
09.11.2015 Qəbələ – İnter 1:1
07.02.2016 İnter – Qəbələ 0:1
03.04.2016 Qəbələ – İnter 0:0
OYUNDAN NOTLAR
* Yay fasiləsində “İnter”in gürcü yarımmüdafiəçisi Nika Kvekveskiri “İnter”ə keçib. Samir Zərgərovla Ruslan Abışov isə əks marşrut üzrə hərəkət ediblər.
* Hər iki komandanın heyətində cəzalı futbolçu yoxdu.
* Kapitan Rəşad Sadiqov zədə üzündən “Qəbələ”yə kömək edə bilməyəcək.
REFERİ
AFFA-nın Hakimlər Komitəsi turun mərkəzi oyunu sayılacaq “Qəbələ” – “İnter” matçına Rauf Cabbavrovu baş hakim təyin etməklə risk alıb. Çünki sözügedən şəxs ən qalmaqallı referilərimizdən biri hesab edilir. Düzdü, bir neçə dəfə idarəçiliyi etirazla qarşılandığı üçün azarkeşlər tərəfindən fiziki təzyiqə məruz qalan Cabbarovun bu gün oxşar halla üzələşəcəyini düşünmürük. Çünki ölkə çempionatına marağın az olması öz yerində, görüşün “Dalğa Arena”da keçirilməsi və saat 20:00-da başlaması tribunaların boş olacağını söyləməyə əsas verir.
Statistik göstəricilərə gəlincə, ötən mövsüm Cabbarov “Qəbələ”nin 4 oyununda fit çalıb və heç birində “qırmızı-qaralar” uduzmayıb, 2 dəfə bərabərə qalıb. Qəbələ təmsilçisinə 13 sarı, rəqiblərinə 10 sarı və 1 qırmızı vərəqə göstərən referi 1 dəfə də əyalət klubunun lehinə penalti qərarı çıxardıb.
Rauf bəy “İnter”in 3 matçında fit çalıb ki, bunlardan 2-də qələbə qazanan “bankirlər” 1 dueldə uduzublar. Baş hakim “İnter”ə 9, rəqiblərinə isə 7 “sarı” verib.
FƏRİD