Zaur Svanadze: "Oyundan öncə uşaqlarda qorxu olur"

Premyer Liqanın 3-cü turu çərçivəsində keçirilən "İnter" – "Kəpəz" oyunundan sonra meydan sahiblərinin baş məşqçisi Zaur Svanadzenin mətbuat konfransı olub. Futbolinfo.az xəbər verir ki, gürcü mütəxəssis penalti statistikasıyla Hakimlər Komitəsinə eyham vurdu.

– Hər şeyi özünüz gördünüz. Qapımıza təyin olunan penaltiyədək meydanda bir komanda var idi. İkinci hissəyə də yaxşı başladıq. Sonra yenə səhvə yol verdik. Ancaq uşaqlara minnətdaram ki, sonda toparlana və yekunda 1 xalı xilas edə bildilər. Ötən mövsümün son 6 oyununda qapımıza penalti təyin edilmişdi. İndi 3-cü turdu və artıq 2-i 11 metrəliyi görürük. Hakimin sonrakı üzrxahlığı heç kimə gərək deyil.  Artıq oyundan öncə uşaqlarda qorxu olur ki, mütləq qapımıza penalti təyin edəcəklər.

– Standart vəziyyətlər üzərində xüsusi hazırlıq keçirsiniz?
-Məşqlərdən sonra uşaqlar əlavə hazırlaşırlar.

– 25 günlük fasilə planlarınız nədən ibarətdi?
– Tiflisdə 1 həftəlik toplanış keçəcəyik və 2 yoxlama görüşündə qüvvəmizi sınayacağıq.

– Sözlərinizdən belə çıxdı ki, qapınıza təyin olunan penalti oyunun dönüş nöqtəsi oldu. Ancaq aşkar sezilirdi ki, meydanın mərkəzində ciddi problemlər yaşayırsınız…
– Əlbəttə, qışadək çətin olacaq. Bütün hallarda əlimizdəki futbolçularla kifayətlənəcəyik. Ola bilər qışda heyətə 1-2 yeni oyunçu qatdıq.

CEYHUN ƏLİYEV