Sergey Zenyov: “Qəbələ” heç bir klubdan zəif deyil”

“Qəbələ”nin estoniyalı hücumçusu Sergey Zenyov ölkəsində jurnalistlərin suallarını cavablandırıb. Futbolinfo.az həmin müsahibəni təqdim edir:

– Sergey, artıq ardıcıl 2-ci dəfə Avropa Liqasının qrup mərhələsində çıxış edəcəksiz. Qrupdakı şanslarınızı necə dəyərləndirirsən?
– Komandamızda yaxşı abu-hava var. Bu, çox möhtəşəm uğurdur. Turnirin bütün oyunlarına ciddi hazırlaşdıq və məqsədimizə nail olduq. Ötən il qrupumuz daha güclü idi. Amma bu mövsüm qrupda hər üç komandaya qarşı oynaya bilərik. Avropa Liqası mənim turnirimdir!

– “Anderlext”, “Maynts” və “Sent Etyen”i zəif hesab edirsiz?
– Qətiyyən! Avropa Liqasında zəif rəqib yoxdur. Sadəcə, ötən il qrupumuz daha güclü idi. Hər 3 komanda ilə mübarizə apara bilərik. Biz heç bir klubdan zəif deyilik.

– Avropa Liqasında öz çıxışını necə qiymətləndirisən?
– Əlbəttə, yaxşı qiymətləndirirəm. Qol və məhsuldar ötürmələrlə yadda qalmışam. Amma əsas komandanın uğurudur.

– “Qəbələ” ardıcıl 2 dəfə Avropa Liqasının qrupuna vəsiqə qazanaraq çoxlarını təəccübləndirdi…
– Ötən mövsüm yaxşı təcrübə qazandıq. Bu, yaxşı nəticədir. Azərbaycan futbolu üçün böyük uğur deməkdir. Azərbaycanda futbol inkişaf edir.

– Azərbaycan futbolu inkişaf edir? Orada 8 klub var və hətta “Qəbələ”nin son matçı təxirə salındı… Uzun müddətli fasilə elan edilib…
– 8 komandalı çempionat olsa da, rəqabət olacaq. Biz Avropa Liqasında “Maribor”la çətin oyun keçirəcəkdik. Bu səbədən oyunumuz təxirə salındı. Sentyabrın 10-da çempionat yenidən bərpa olunacaq.

– Komandanızın Premyer Liqadakı şanslarını necə dəyərləndirirsən?
– Fikrimcə, bu il çempion ola bilərik.

– Millinin Malta və Bosniya və Herseqovina ilə matçlarını necə dəyərləndirirsən?
– Malta üzərində qələbə qazanaraq seçmə mərhələyə yaxşı start vermək istəyirik. Bu oyunda hamı bizdən yalnız qələbə gözləyir. Bosniya və Herseqovinaya qarşı da yaxşı oynamalıyıq.

– Millidə qol vurmağa söz verirsən?
– Buna hazıram. Bu öhdəliyi götürmək istəyirəm.