Ölkə futbolu
FİFA “İnter” üçün cığır açdı: bütün diqqət əvəzedicilərə yönəlməlidi
“İnter” yenə çalxalandı. “Bankirlər&rdquo…
“İnter” yenə çalxalandı. “Bankirlər”in əvvəlki rəhbərliyin dövründə yaranan borcları bağlamaq üçün xeyli iş görən klub başbilənləri 1 avrokubok mövsümü byraxmaqla canını qurtardı. Ancaq yeni mövsümə olduqca iddialı başlayan klub bu dəfə FİFA tərəfindən cəzaya məruz qaldı: “ağ-göylər” növbəti 2 “transfer pəncərəsi”ndə heç bir oyunçunu transfer edə bilməz!”
“İnter”in bu cəzaya məruz qalmasında müəmma axtarmaq üçün kifayət qədər əsas var. Əvvəla, klub bütün borclarını veribsə, bu, nə vaxtın cəzasıdı? İkincisi, klub UEFA tərəfindən cəzalandırılıbsa, “ikinci seriya” haradan çıxdı?
Məsələyə aydınlıq gətirən “İnter”in prezidenti Rəşad Qasımov futbolinfo.az-a verdiyi açıqlamada kəsilən cəzaya o qədər də təəccüblənmədiyini bildirdi: “FİFA-ya daxil olan şikayətlərin sayı-hesabı yoxdu. Onlar bütün müraciətlərə dərhal baxa bilmirlər. Ovaxtkı borclara görə xeyli sayda oyunçumuz dünyanın ali futbol qurumuna müraciət etmişdi. Aydın məsələdi ki, FİFA bir futbolçuya görə belə sərt cəza tətbiq etməzdi. Sadəcə, 4-5 oyunçunun şikayətinin məhz “İnter”dən olması yekunda belə sərt cazaya səbəb olub”.
Ancaq məsələnin ikinci tərəfi – cəzanın yubanması – sadəcə, texniki məsələlərlə bağlı imiş: “Buna təəcüblənmirəm. FİFA-nın cəzaya məruz qoyduğu o qədər klub var ki! Bəlkə də qərar hələ yayda verilib, ancaq məktubun göndərilməsi yubadılıb. Nəzərə alsaq ki, FİFA-nın qərarı 6 sentyabr tarixində bizə çatıb, qanun isə arxa tarix qüvvəsinə malik deyil, yayda həyata keçirdiyimiz transferlərə qadağa qoyula bilməz. Bu, UEFA-nın bizə qarşı tətbiq etdiyi cəzayla bağlı deyil. Avropanın ali futbol qurumu bizi qitəmiqyaslı yarışlardan məhrum etmişdi. FİFA isə, loru dildə desək, 2 “transfer pəncərəsi” dönəmi, qulağının dinc olmasına təminat verən qərara imza atıb. Onlar üçün maraqlı deyil ki, “İnter”də nələr baş verib? Fakt budu ki, bir neçə oyunçudan eyni vaxtda maliyyə şikayəti daxil olub”.
Bütün hallarda, “İnter” ölkə futbolunun üzündə qalmaq üçün indi ikiqat əziyyətə düşməlidi. Bəli, heyət kifayət qədər sanballıdı. Ancaq heç kimə sirr deyil ki, Azərbaycan klubları qış “transfer pəncərəsi” zamanı heyətlərinə əl gəzdirməyi sevir. “Bankirlər” isə həmin vaxt “fil qulağında yatmalı” olacaqlar. Belədə, əllərindəki kadrları saxlamalı olan “İnter” növbəti mövsümə də ən yaxşı halda eyni heyətlə çıxmalı olacaq.
Ancaq məsələ burasındadı ki, “ağ-göylər” böyük ölçüdə heç nə uduzmadılar. Niyə? Çünki hazırki heyət kifayət qədər döyüşkəndi. Eyni zamanda, kluba öz yetirmələrinin xidmətindən istifadə etmək qadağası qoyulmayıb. Son 2 ildə əvəzedicilərdən xeyli sayda futbolçu əsas komandaya cəlb olunubsa, deməli, bu tendensiyanı davam etdirmək olar. Yetər ki, əvəzedici komandanın hazırki baş məşqçisi Füzuli Məmmədov əvvəlki illər açılan cığırı palçığa döndərməsin. Deməli, əlindəki heyəti qoruyub saxlaya və öz yetirmələrindən bir neçəsini də əsas komandaya cəlb edə bilsə, “İnter” tamamilə “əcnəbi klub” imicindən qurtulacaq və “Qarabağ-2008”-in protatipi olacaq: yerli futbolçulara güvənən Azərbaycan klubu.
CEYHUN ƏLİYEV
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-23 08:00
“Səbail” “Sabah”a uduzsa…