Layihə
Yeni təşəbbüs: Futbolun İnkişaf Fondu – LAYİHƏ
“AFFA-nın təsisçiliyi ilə Futbolun İnkişaf Fondu yar…
“AFFA-nın təsisçiliyi ilə Futbolun İnkişaf Fondu yaradılsın”. Bu, AFFA İcraiyyə Komitəsinin son yığıncağındakı qərarlardan biridi.
İlk baxışdan sıradan bir qərar təəssüratı bağışlasa da, bəlkə də assosiasiyanın tarixində ən mühüm addımdı. Futbolinfo.az bu qərara biganə qalmayaraq, yaradılan Fondun hansı ciddi islahatlara rəvac verə biləcəyini, futbolda hansı sanballı nailiyyətlərə imza atmaq ehtimalı, habelə infrastruktur və hüquqi baxımdan ölkə futboluna qazandıracaq potensiala dair Layihəyə start verir.
İlk yazıda Futbolun İnkişaf Fondunun (FİF) yaranmasının səbəbləri barədə bəhs edəcəyik.
Sirr deyil ki, AFFA həm Premyer Liqada, həm də 1-ci divizionda bir sıra klubların maliyyə xərclərini qarşılayır. Ölkənin ali futbol qurumunun bu addımı nəinki ölkəmizdə, hətta Azərbaycanın hüdudlarından kənarda da müsbət qarşılanmır. Çünki nə FİFA, nə də UEFA hansısa ölkənin ali futbol qurumunun klublar arasında ayrıseçkiliyini alqışlamır. Bu, bütün hallarda daxili narazılıqlara rəvac verir.
Məsələn, “Şəmkir”ə pul ayrılıb və bölgə təmsilçisinin MOİK-lə qarşılaşmasında hakim hansısa səhvə yol verir. Gəl indi kimisə inandır ki, ədalət təmsilçisi bunu tapşırıqla etməyib. Çünki dərhal fikir formalaşır: “AFFA pul buraxır və istəyir ki, komandası qalib gəlsin”.
Ancaq ortaya sual çıxır ki, “AFFA-nın komandası” qalib gələndə assosiasiya nə qazanır? Bu sualın cavabı üzdə olsa da, AFFA söz-söhbətləri özündən bir addım kənarlaşdırdı.
İndi FİF donor(lar)dan gələn vəsaiti Qeyri-Hökümət Təşkilatı olaraq, qəbul edəcək və istiqamətlər üzrə paylayacaq. QHT-nin ayırdığı vəsaitə bilavasitə İcraiyyə Komitəsində yer alan üzvlər nəzarət edəcək. Bu da ayrılan pulların ünvanı üzrə çatdırılması baxımından olduqca mühüm rol oynayır. Ali futbol qurumu de-yure ölkə klublarına pul xərcləmir, de-fakto isə həm vəsait ayıran əsas donor kimi fəaliyyət göstərir, həm də buna nəzarəti əlində saxlayır ki, kənardan yeyinti baş verməsin.
QHT-ni yaratmaq, onu Ədliyyə Nazirliyindən qeydiyyatdan keçirmək bir günün işi deyil. Böyük ehtimalla FİF rəsmi fəaliyyətə oktyabrın ortalarından başlayacaq. Ancaq qurum rəsmi “canlı” obrazı aldıqdan sonra kənar donorların da işə cəlb olunması istisna olunmur. İlk növbədə bura dövlət büdcəsindən daxil olan vəsaitlərin şamil olunması gözləniləndi.
Detallara növbəti yazılarda toxunacağıq. Eyni zamanda fonda əlavə yatırımlar edilməsi üçün yollardan, onun xərclənməsi istiqamətlərindən, dünya təcrübəsində oxşar layihələrdən bəhs edəcəyik.
CAVAD
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?