Müsahibə
Roman Qriqorçuk: “Avrokubok missiyamız başa çatmayıb”
Ardıcıl 2-ci dəfə Avropa Liqasının qrup mərhələsinə vəsiqə…
Ardıcıl 2-ci dəfə Avropa Liqasının qrup mərhələsinə vəsiqə əldə etməklə, “Qəbələ” ölkə futbolsevərlərini məmnun etdi. Seçmə mərhələlərdə də püşklə bağlı bəxti gətirməyən əyalət təmsilçisi qrupda da eyni aqibətlə üzləşdi. “Anderlext”, “Maynts” və “Sent-Etyen” kimi qitədə sözünü demiş rəqiblərlə üz-üzə gələcək “qırmızı-qaralar”, baş məşqçiləri Roman Qriqorçuk demiş, şanslarını az da olsa qoruyurlar. Ukraynalı mütəxəssis futbolinfo.az saytına verdiyi müsahibəyə Odessa toplanışından başladı.
– Hazırlıq məhsuldar alındı. Söhbət heç də məşq və yoxlama oyunundan getmir. Mövsümün əvvəli bizim üçün ağır idi. Avroliqadakı 4 mərhələ, daxili çempionat – bütün bunlar futbolçulara təsirsiz ötüşə bilməzdi. Uşaqlar məşqlərdə də bütün tapşırıqlarımı yerinə yetirdilər, yaxşıca dincəlməyə də vaxtları oldu. Hesab edirəm ki, Ukraynada hər şey ürəyimizcə oldu.
– Avroliqadakı rəqiblərinizin adına baxdıqda, vahimələnmirsiniz?
– Əlbəttə, “Anderlext” də, “Maynts”da, “Sent-Etyen” də əlavə təqdimata ehtiyac duymurlar. Bu klubların hər birinin qitəmiqyaslı yarışlarda təcrübəsi bizdən qat-qat çoxdu. Oynadıqları çempionatlar da hər kəsə bəllidi. Ancaq şanslarımız yox deyil. Azdı, əlbəttə, azdı. Faizlə deyə bilmərəm hansısa rəqəmi. Ancaq biz şansımız 1 faiz olanda da qələbə uğrunda mübarizə aparırıq. Hər bir azarkeşi əmin edirəm ki, qrup mərhələsinin hər oyununda uğur qazanmaq üçün meydanda canımızı qoyacağıq.
– Qrup mərhələsinin startı olduqca əhəmiyyətli olur. “Anderlext”ə qarşı səfərdə yenə hücumameylli “Qəbələ” görəcəyik, yoxsa daha çox strateji məqsədlər güdən səfər komandası modeli?
– Əlbəttə, müdafiədə etibarlı oynamaq həmişə xoşdu. Ancaq yenə də fikrimdə qalıram ki, bu cür rəqiblərlə oyunda hücumda necə çıxış edəcəyimiz həlledici rol oynayacaq. Başqa sözlə, seçmə tsikllərdəki oyun modelini qoruyub saxlayacağıq. İstədiyimiz dəst-xətti ortaya qoya bilsək, Belçikadan müsbət nəticəylə dönmək şanslarımız olacaq.
– Komandanızın yeni transferləri – Ruslan Qurbanov və Petar Franyiç barədə nə deyə bilərsiniz?
– Ruslanı Azərbaycan çempionatından yaxşı tanıyıram. Düşünürəm ki, yerli futbolçu statusu daşıması işimizə ikiqat yarayacaq. O, hücum xəttimizin gücünə güc qatacaq. Petara gəlincə, bu futbolçunun potensialı hələ açılmayıb. Onun əsl istedadının məhz “Qəbələ”də açacağına böyük ümidlər bəsləyirəm.
– Sabah ölkə çempionatının qarşılaşmasına da çıxacaqsınız. Legioner limitini nəzərə almasaq, Avroliqaya görə, heyətdə hansısa rotasiyalara əl atacaqsınız?
– Xeyr, ən hazırlıqlı futbolçular sabahkı oyunda meydana çıxacaqlar. “Neftçi” istənilən rəqibi məğlub etmək gücündədi. Bu səbəbdən də bütün diqqətimizi sabahkı görüşə səfərbər edəcəyik.
– Sonuncu sual. Roman Qriqorçuk necə hesab edir, “Qəbələ” cari mövsüm üçün avrokubok missiyasını yerinə yetirib?
– Yox-yox, siz nə danışırsınız?! Bəli, qarşımıza qoyulan qrupa düşmək vəzifəsinin öhdəsindən gəldik. Uşaqlar əla çıxış edərək, qrupda oynamağı haqq etdilər. Bəli, rəqiblərimiz olduqca çətindi. Bunu heç kim inkar etmir. Lakin qarşıda 6 oyunumuz var. Hər qarşılaşma lokal xarakter daşıyacaq. Hər oyundan maksimum nəticə ilə ayrılmağa çalışacağıq. İndi “Neftçi”ni düşünürük. Ardınca Belçika səfərini təhlil edəcəyik. Bax, belə addım-addım məqsədlərimizə doğru irəliləməliyik.
CEYHUN ƏLİYEV
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”