Ölkə futbolu
Qurban Qurbanov: "İntiqam barədə düşünmürük"
“Avroliqa oyunlarında həddindən artıq diqqətli olmalıyıq….
“Avroliqa oyunlarında həddindən artıq diqqətli olmalıyıq. Kiçik turnirdi. Sabah ən doğrusunu etməyə çalışacağıq”.
Futbolinfo.az saytının məlumatına görə, bu sözləri “Qarabağ”ın baş məşqçisi Qurban Qurbanov deyib.
Avropa Liqasının qrup mərhələsi çərçivəsində Ağdam klubu sabah “Slovan”ı qəbul edəcək.
Matçdan öncə mətbuat konfransı keçirən ağdamlıların çalışdırıcısı maraqlı fikirlər səsləndirib. O bildirib ki, sabahkı görüşdə yaxşı nəticə əldə etməklə, azarkeşləri sevindirməyə çalışacaqlar: “Rəqibimiz ciddidi. Bu il Avroliqanın qrup mərhələsinə qədər 4 oyun keçiriblər və 4 qələbələri var. Son 3 ildə 2 dəfə qrupda oynayıblar. “Sevilya” kimi komandaya qarşı matçda çox yaxşı nəticə əldə ediblər. Belə bir rəqibə qarşı oynamaq bir tərəfdən çətin, digər tərəfdən maraqlı olacaq. Uğurlu nəticə əldə etməyə çalışacağıq”.
– Sabah meydanda AZAL-la oyundakı ilk “11-liy”i görəcəyik?
– Ola bilər ki, dəyişiklər olsun. Amma elə də ciddi dəyişiklik etməyəcəyik. Bir neçə dəyişiklik olacaq.
– Matçın baş tutacağı stadionun son durumu ilə maraqlanmısız?
– Dünən məşq keçdik. Yaxşıdı, pis deyildi.
– Stadion problemi komandaya necə təsir edə bilər?
– Bu məqamları böyütmək lazım deyil. Oyuna çox az vaxtımız qalıb. Stadion barədə düşünməyə vaxtımız yoxdu. Əlimizdə hansı şərait varsa, ondan düzgün yararlanmalıyıq.
– Sabahkı oyunda hansı nəticəyə ümid edirsiz?
– Çalışacağıq ki, öz düşüncələrimizi meydanda yerinə yetirək. Ola bilsin, meydanda çox mübarizə olsun. Rəqib belə komandadı, kombinasiyalı oyuna imkan vermir. Bir-iki qol vəziyyətləri olsa belə, ondan istifadə etməyə çalışacaqlar. Biz çalışırıq ki, “Qarabağ” olaraq, əlimizdə imkan varsa, ondan istifadə edək.
– “Slovan”ın heyətində Milan Baroş kimi hücumçu var…
– Ona xüsusi diqqət ayrılacaq. Baroşun öz oyun üslubu var. Hücumun tamamlanması və davam etdirilməsi rolu böyükdü. Topa yaxşı nəzarət edir. Ondan topu almaq çətindi. Mənim düşüncəmdə hansısa futbolçuya qarşı tək müdafiəçini oynatmaq yoxdu. O, hansı zonada olsa, həmin mövqedə qərarlaşan futbolçumuz Baroşa imkan verməməlidi.
– Artıq 3-cü dəfə Avroliqanın qrup mərhələsində iştirak edəcəksiz. Əvvəlki həyəcan varmı?
– İdmanda təcrübə artdıqca həyəcan daim çoxalır. Təki həmişə bu səviyyədə qalaq. Həyəcan varsa, deməli, işimizdə məsuliyyətliyik. Avroliqadan əlavə, çempionat görüşlərində də bizdə həyəcan olur. Çünki avrokuboklara vəsiqə çempionatda qazanılır.
– Çempionlar Liqasına gedən yolunuzu məhz Çexiya klubu kəsdi. Bu amil sabahkı görüş öncəsi sizə əlavə stimul verirmi?
– Fikrimizdə intiqam yoxdu. Çexiyalı futbolçular Avropada ən intizamlılardan sayılır. Bu ölkənin idmançılarında intizam həddindən artıqdı. İdmanda intiqam yoxdu. Düşdüyün vəziyyətdən düzgün şəkildə çıxmalısan. Biz bu gün intiqam barədə düşünsək, rəqib haqda düşünməyə vaxtımız az olacaq. O oyunu uduzduq, keçdi. Bir də “Viktoriya” ilə düşsək, onda onlardan revanş almaq barədə düşünmək olar.
– Hakimlər briqadası İsveçrədən olacaq. Sizcə, bu hakimlər İsveçrə saatları kimi dəqiq işləyə biləcəklərmi?
– Mən heç kimə cavabdeh deyiləm. Hakimləri ölkələrə bölmək düzgün çıxmaz. Bizim işimiz futbol oynamaq, onların işi oyunu idarə etməkdi. Bir-birimizin işinə qarışmaq olmaz. Biz çalışacağıq ki, fikrimiz ancaq oyunda olsun.
– Sizə elə gəlmir ki, bəzən rəqibi həddindən artıq ciddiyə alırsız?
– Niyə də ciddiyə almayaq? Hər bir işdə ciddiyyət olmalıdı. Rəqibdən-rəqibə fərq var. Dünən bir toplantımız oldu, fikirlər söylədim. Bu gün də rəqibin oyunlarına baxdım və əlavə fikirlər ortaya çıxdı. Ola bilər ki, çox dərinə getmək bəzən xeyrimizə olmayıb, amma bəzən də xeyrimizə olub.
– Sabiq komandanız “Neftçi”nin “Qəbələ”yə 0:8 hesablı məğlubiyyətini necə qarşıladız?
– Məni hansısa klub yox, Azərbaycan futbolu narahat edir. Daim istəmişəm ki, komandalarımız həmişə uğurlu nəticələr əldə etsinlər. Həm “Qəbələ”, həm də “Neftçi” bizim rəqibimizdi. Futbolçulara daim demişəm ki, bizim işimiz öz oyunumuza fikir verməkdi. Hər klubun öz idarə heyəti, başbilənləri var. Bizim müdaxilə etməyimiz düz çıxmaz, hörmətsizlik olar. “Qarabağ” olaraq, biz də böyükhesablı məğlubiyyətə uğramışıq. Bəzən belə məğlubiyyətlərin komanda və klub üçün böyük faydası olur.