Layihə
Mundiala doğru: bizə daha 10 xal lazımdı – NİYƏ DƏ YOX?
Qonşudakı bayrama biganə qalmaq olmaz. Futbol bayramı burnumuzun u…
Qonşudakı bayrama biganə qalmaq olmaz. Futbol bayramı burnumuzun ucunda – Rusiyadadısa, nəyə görə orada olmayaq?
AFFA-nın cari seçmə mərhələ üçün seçdiyi “Niyə də yox?” devizi əladı. İnanmaq, mübarizə aparmaq, sonda nail olmaq lazımdı. Ola bilsin, dünya çempionatının final mərhələsinə vəsiqə qazanmaq çox çətindi, lakin buna cəhd etmək şansını heç kim əlimizdən almayıb. Həm də hər şey bu qədər uğurlu başlayıbsa, həqiqətən: niyə də yox?
Eyforiyaya qapılmaq, “xəyalplov” bişirmək lazım deyil. Hələ seçmə oyunlar yeni başlayıb, bir çox komandalar dişini göstərməyə macal tapmayıb, elə həmin Çexiya yenidənqurma mərhələsindədi. Bununla belə, bu da fürsətdi, rəqiblər ayılana kimi uzaqlaşmaq, xal ehtiyatını artırmaq lazımdı.
DÇ-2018-ə gedə bilərikmi? Çox çətindi!
Reqlamentə görə, hər qrupdan yalnız ilk pillənin sahibləri mundiala birbaşa vəsiqə qazanacaq. Bizim qrupda isə nəinki Almaniyaya bu işdə mane olan, hətta ondan xal alan tapılmayacaq. Bundestim çox güclüdü, bəlkə də final mərhələsinə itkisiz yollanan yeganə komanda olacaq. Ümid qalır qrup ikincisi kimi pley-offlara qatılıb, bəxtini sınamağa. Bəs, buna imkan varmı?
DÇ-2014-ün seçmə mərhələsinə nəzər salaq. İndiki kimi, o zaman da 9 qrupda ən zəif nəticə göstərən qrup ikincisi kənarda qalır, digər 8 komanda son döyüşə yollanırdı. Braziliya mundialı ərəfəsində Danimarka ən az xal toplayan qrup ikincisi oldu, digərləri isə 4 cütlük təşkil etdi. O zaman Danimarka 16 xalla arzularının üstündən xətt çəkdisə, qalan 8 komandadan 3-ü 17, 5-i daha çox xal yığa bildi.
Deməli, minimal hədd 17-di, daha çox xal yığmaq isə ziyan gətirmir. Bəs, bu psixoloji həddi keçmək imkanımız varmı?
3 oyuna 7 xalımız var və bu, o deməkdi ki, qalan 7 oyunda daha 10 xal lazımdı. İndiki halda millimiz 3 turun nəticələrinə görə Avropanın maksimum nəticə göstərən 4 komandasından geri qalır, daha 11 komanda kimi 7 xal toplayıb. Təqvimə baxırıq və məlum olur ki, daha 10 xal toplamaq üçün imkan var və böyük hədəfə doğru əsas addım Belfastda atılmalıdı. Çünki əsas izləyicimiz noyabrda qarşılaşacağımız Şimali İrlandiya olacaq. Ondan sonrakı matçda Almaniyaya uduzmağımız qaçılmaz olduğundan məhz bir ay sonrakı qarşılaşmada yenilməmək şərtdi.
Lakin hətta Şimali İrlandiyay məğlubiyyət də millimizi hədəfdən yayındırmamalıdı. Şimali İrlandiyanın da xeyli çətin oyunu var və hazırda əsas rəqibimiz kimi görünən bu komandanı üstələmək üçün şansımız olacaq.
Təqvimə nəzər salsaq, görərik ki, Almaniya ilə oyunlarda mümkün 2 məğlubiyyət də xal ehtiyatımızı 17-yə qaldırmağa mane olmamalıdı. Bu baxımdan ev oyunları vacibdi. San-Marino ilə oyunda qələbədən başqa nəticəni ağıla gətirməməli, Şimali İrlandiya və Çexiya ilə ev oyunlarında büdrəməməliyik. Son oyunlar göstərdi ki, bu, mümkündü. Şimali İrlandiya və Norveç səfərlərində isə qazanılan bircə xal bizi xoşbəxt sonluğa aparacaq. Təbii ki, Belfast və ya Osloda heç-heçə üçün oynamaq olmaz, heç kim Bakıda qəfil büdrəməyəcəyimizi deyə bilməz. Ona görə də ortabab və zəif rəqiblərlə bütün görüşlərdə maksimim nəticə üçün döyüşməliyik.
Eyni zamanda unutmaq olmaz ki, 17 xal həddi nisbidi. Bu, komandaların nəticələrindən asılı olaraq, azala və ya arta bilər. Hətta 17 xalın qrup ikincisi olmaq üçün yetmədiyi və ya 15 xalla da pley-offa qatılmağın mümkünlüyünü nəzərə almalıyıq.
Yuxarıdakı qeydlərimiz heç də eyforiyanın tablosu deyil, reallıqdı. Adi riyazi hesablama ilə perspektivi göz önünə gətirmək olur. Latviya, İslandiya, Albaniya da tarixi uğurlarını məhz belə qazanıb. Bu səbəbdən inanmaq, cəhd göstərmək lazımdı. Bir halda ki, yığmamız 3 turdan sonra top buraxmadan qrup ikincisidi, o zaman niyə də yox?
Bu layihəni başlamaqda məqsədimiz heç də utopik arzunun arxasınca düşmək deyil. Millimizin komanda kimi hələ çox çatışmazlığı var. Lakin klublarımızın Avropa arenalarındakı uğurlarından sonra əla stimul qazanmışıq, bunun milli komandaya da sirayət etməsi lazımdı. Futbolçular böyük hədəf üçün heç vaxt olmadığı qədər motivasiyalıdı və bəzən ustalığın çatışmadığı anlarda məhz əzmkarlıq ön plana çıxır. Ev oyunlarında tribunaları dolduracaq azarkeşlər də onlara dayaq olunca arzuları reallaşdıra bilərik. Gəlin, onları ruhdan salmayaq, növbəti 1 il ərzində birgə olaq, dəstək verək. Döyüşləri uduruq, müharibəni udmaq üçün bir hədəfə köklənməyimiz vacibdi. Çünki dəstək verdiyimiz Azərbaycan bayrağını ucaldan milli komandamızdı.
FƏRİD
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?