Qurban Qurbanov: "Elvin Yunuszadəni əvəzedici heyətə yollamışam"

"Qarabağ"ın baş məşqçisi Qurban Qurbanov Azərbaycan Premyer Liqasının 8-ci turu çərçivəsində "Sumqayıt"a qarşı keçirdikləri oyunu şərh edib. Futbolinfo.az xəbər verir ki, Ağdam klubunun çalışdırıcısı 3:0 hesabıyla bitən qarşılaşmadan sonra bunları söyləyib:

– Vacib qələbə qazandıq. Asan oyun olmadı. Hər oyunda bizə qarşı fərqli üslublardan istifadə edirlər. Fikrimcə, maraqlı oyun oldu. Əsas odu ki, azarkeşlərimizi sevindirə bildik. Futbolçular bir müddət idi bir yerdə deyildilər. Qarşıda bizi vacib oyun gözləyir. Buna baxmayaraq, tam olaraq bu oyuna köklənmişdik. PAOK-la oyuna 4 gün qalıb. Məşqlərdə diqqətli olmalı, bu komandayla oyuna ciddi hazırlaşmalıyıq. Bizi doğrudan da çətin oyun gözləyir. Samir Abasova uğurlar arzulayıram. O, daim öz üzərində işləyir, hər oyunda nə isə yenilik edir.

– Rəşad Sadıqovun vəziyyəti nə yerdədi? Samir Abasov “Qarabağ”ın meydanda məşq etdiyini dedi…
– Komandanın cəmi bir neçə gündür birgə olduğunu nəzərə alsaq, bu oyun futbolçular üçün asan deyildi. Qollarımızı da son dəqiqələrdə vurduq. Rəşadın ayağında ağrılar var. Çox da ciddi deyil. Zədəsini yeniləməməsi üçün həkimlər diqqətli olmalıdılar.

– İlqar Qurbanovun oyunundan razı qaldız?
– Oyunun gedişində istədiyimiz kimi hücumlar qura bilmirdik. Oyun zamanı 5-3-2-dən istifadə edirdik. Onun oyunundan razı qaldım. Ancaq öz üzərində bir az daha çalışmalıdı.

– Elvin Yunuszadə bu gün heyətdə yox idi. Maksimi mərkəzdə oynatmağınız onun yoxluğuyla bağlı idi, yoxsa, millidə bu mövqedə özünü yaxşı tərəfdən göstərdiyinə görə? 
– Elvinin qızdırması var. Digər tərəfdən onu əvəzedici heyətə göndərmişdim. Çünki intizamı pozmuşdu. Ancaq sağlam olsaydı da, bu gün oynamayacaqdı. Maksim ilk dəfə deyil ki, bu mövqedə oynayır. Onun bu mövqedə yığmada da oynaması, onu daha da inkişaf etdirir.

– Vüqar Nadirov əvəzedici heyətdə 2 qol vurub. Demək olar ki, artıq özünə gəlir?
– O, öz üzərində ciddi çalışır. Öz çalışqanlığını göstərir. İnşallah, belə davam etsə, qarşıdakı oyunlarda ona şans verməyə hazırıq.

ELMAR ABDULLA-ZADƏ