Layihə
Böyümək üçün GROW 2020: I yazı
“Azərbaycan Respublikasında futbolun inkişafına dair dö…
“Azərbaycan Respublikasında futbolun inkişafına dair dövlət proqramı” çoxdan tarixin yaddaşına köçüb. 2005-2015-ci illəri əhatə edən bu proqram çərçivəsində bir sıra işlər görülsə də, əsas vəzifələr unuduldu.
Düzdü, 10 il ərzində infrastruktur baxımından futbolumuz çox şey qazandı, xeyli stadion tikildi, güclü futbol klubları yaradıldı, uşaq futboluna diqqət artırıldı. Lakin təəssüf ki, layihənin müddəti bitən kimi yaradılan gülüstanın yerində xarabalıqlar qalıb: idman qurğularının əksəriyyəti yararsız vəziyyətdədi, bir sıra stadionlar hansısa biznesmenin şəxsi mülkiyyətinə çevrilib, bölgələrdəki arenalar baxımsızlıqdan sıradan çıxıb, mövcud olanların istismarı lazımi səviyyədə deyil, saxta görüntü naminə inşa olunan bəzi arenaların ot örtüyü tez-tez sıradan çıxır, varlı klubların əksəriyyəti dağılıb, sponsorlar bu sahəyə pul qoymağın mənasızlığını görərək aradan çıxıb, milliləşdirmənin kölgəsində qalan uşaq futbolunda yetərincə problem var, həmin dövrdə yetişib indi əsas komandanın üzvü olmalı gənclər çox azdı, əsas komandada, eləcə də ümumi futbol təsərrüfatında cidd kadr problemləri var.
Məhz elə bu səbəbdəndi ki, növbəti dövlət proqramının qəbul olunması yubanır. AFFA bir neçə dəfə bununla bağlı cəhd etsə də, indiyədək layihəni təsdiqlətmək mümkün olmayıb, hər dəfə proqram yenidən işlənmək üçün geri göndərilib. Proqramın düzgün tərtib ounmaması, əsasən də inandırıclığı “yuxarılar”ı qane etmədiyindən yeni dövlət proqramı masa üzərində qalıb.
Ancaq AFFA inadından ən çəkmir. “Futbolinfo” qurumun hazırladığı ən son layihənin bir nüsxəsini ələ keçirib. Bugündən başlayaraq, həmin plan-sənədi diqqətinizə çatdıracaq, mühakimənizə verəcəyik. Bu proqramı bənd-bənd incələyib, detallar haqda fikirlərimizi bölüşəcəyik.
GROW 2020 (İnkişaf strategiyası 2016/17 – 2020/21) adlanan sənəd 3 hissədən ibarətdi:
1. İştirakçıları artırmaq (oyunçu iştirakını 20% artırmaq)
2. 2020/21-ci ilə qədər stabil futbol klubu yaratmaq (Premyer Liqada 10 davamlı klub)
3. Qalib gələn Azərbaycan komandaları (Kişilərdən ibarət peşəkar komandanın 2020-ci il UEFA Avropa çempionatı final mərhələsinə vəsiqə qazanması; Qadın liqası komandalarımızdan birinin UEFA Çempionlar Liqasına vəsiqə qazanması; Futzal – böyük nəticələr; Çimərlik futbolu – daha yaxşı nəticələr)
Göründüyü kimi, 3-cü hissə özündə 4 bəndi birləşdirir.
İlk dövlət proqramında infrastrukturla bağlı bir çox məsələlər həllini tapdığından indi əsas hədəf say artımı, stabillik yaratmaq, daha sonra isə nəticə verməkdi. AFFA imtina olunmasından ehtiyatlanaraq, risk edərək 10 illik proqramın təsdiqini istəmir, işlərin daha qısa müddətdə yekunlaşmasını, 5 ilə nəticə verməyi nəzərdə tutur. Yekunda şirnikləndirici hədəf – AVRO-2020 olduğundan proqramın qəbul olunacağına ümid edir.
Bəri başdan qeyd edək ki, layihə ciddi qrammatik və məna-məntiq səhvləriylə doludur, ümid edirik ki, yuxarı instansiyalara təqdim olunmamış ciddi redaktə olunub.
Proqramın adı çox da uğurlu seçilməyib. Bəlkə də “GROW” daha elitar səslənir, azərbaycanca qarşılığı olan “böyümək” sözü qıcıq doğurardı, ağız büzənlər olardı. Bununla belə, daha yaxşı nümunə tapmaq olardı. “İrəli”, “Tərəqqi”, “Zəfər yolu” və s. bizim təklif etdiklərimizdi. Ad önəmli olsa da, ən əsası məqsəd, hədəfdi. İstiqamət böyüməkdisə, işi də buna uyğun qurmaq lazımdı.
Milli komandanın tsiklə uğurlu başlaması, klublarımızın avrokubokarda ardıcıl uğurları, ölkə başçısının futbolumuz haqda səsləndirdiyi son açıqlamalar nikbin sonluğa əsas verir. Proqramın qəbul olunması üçün ilkin zəmin hazırlanıb, indi sənədin rəsmiləşməsi qalır.
Ancaq sanki AFFA bu proqramın qəbul olunacağına çoxdan əmin imiş. Çünki assosiasiyanın pay sahibi olduğu “CBC Sport” əməkdaşları, eləcə də AFFA işçiləri çoxdandı üzərində “GROW” yazıları olan geyimlərdə gəzir, “böyümək” layihəsini təbliğ edirlər.
Bundan başqa, “Yuventus” məktəbinin fəaliyyətə başlaması, Ronaldinyo akademiyasının açılması da proqrama daxil olan məsələlərdi və növbəti yazılarımızda bu haqda bəhs edəcəyik.
FUTBOLİNFO.AZ
- Milli komanda2024-05-03 08:00
Vay(ss) bizim halımıza?
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Digər idman növləri2024-05-03 13:25
Tanınmış idmançılarla – öncə master-klas, sonra birgə məşq