Premyer-liqa
İddialılar ilk dövrədə darmadağın etdikləri komandalara qarşı
Bu gün Topaz Premyer Liqasında 10-cu tura start veriləcək…
Bu gün Topaz Premyer Liqasında 10-cu tura start veriləcək. Futbolinfo.az xəbər verir ki, ilk oyun günündə iki oyun baş tutacaq.
Çempionluğa əsas namizədlər – “Qəbələ” ilə “Qarabağ” birinci dövrədə böyük hesabla məğlub etdikləri “Neftçi” və AZAL-ı sınağa çəkəcəklər.
Topaz Premyer Liqası
10-cu tur
15:00 “Qəbələ” – “Neftçi”
Hakimlər: Əliyar Ağayev, Zeynal Zeynalov, Rza Məmmədov, Rahil Ramazanov.
Əlavə köməkçi hakimlər: Rəvan Həmzəzadə, Rauf Cabbarov.
AFFA nümayəndəsi: Mübariz Hüseynov.
Hakim-inspektor: Vüsal Əliyev.
Qəbələ şəhər stadionu (3500 yerlik).
“Neftçi” 80 illik tarixində ən ağır zərbələrdən birini məhz “Qəbələ”dən alıbdır" desək, mübaliğəyə yol vermiş olmarıq. Həqiqətən də, ilk dövrədəki 0:8 hesablı yenilgi “ağ-qaralar”ın tarixinə qara hərflərlə yazıldı. Roman Qriqorçukun rəhbərlik etdiyi kollektiv Baqali Dabonun 3, Ruslan Qurbanovun 2, Vitali Vernidubla Filip Ozobiçin 1 qolu və Jayronun avtoqolu ilə rəqibinin daşını daş üstə qoymamışdı. Təsadüfi deyil ki, bu darmadağından sonra “Neftçi”nin həm rəhbərliyində, həm də məşqçilər korpusunda dəyişiklik baş verdi – icraçı direktor Elnur Məmmədovla baş məşqçi Vəli Qasımov işlərini itirdilər.
İndi paytaxt təmsilçisinin yeni idarəçiləri və çalışdırıcısı var. Ancaq heyət yenilənsə də, nəticələr dəyişmək bilmir ki, bilmir. “Ağ-qaralar” hələ də “qara zolaq”dan çıxmağın yolunu tapa bilməyiblər.
Lider “Qəbələ” isə cari mövsümdə məğlub olmayan 2 komandadan biridir. Ötən turadək heç qol da buraxmamışdı. Lakin “Sumqayıt”la səfər matçı 2:2-lik heç-heçə ilə yekunlaşdı ki, bunun da əsas səbəbi zədə üzündən heyətdəki itkilər idi. Ancaq artıq həmin zədəlilərdən bir qismi sağalaraq, sıraya dönüblər.
Statistikaya nəzər salsaq, “Neftçi”nin son 3 matçda qalib gəlmədiyini görərik. Lain 11 oyundur meydan sahibi komanda qələbə qazana bilmir ki, bu da önəmli məqamdır.
STATİSTİKA: 33 oyun, +11=8-14, top fərqi 40-43
İLK DÖVRƏ: 8:0
OYUNDAN NOTLAR
– Ötən tur “Sumqayıt”la səfər matçında qırmızı vərəqə alan Sadiq Quliyev cəzalı durumdadır. O, bir oyun istirahət edəcək. Ürfan Abbasov, Rafael Santos və Voyislav Stankoviçin aktivində isə 3 sarı vərəqə var. Növbəti xəbərdarlıq onları cəzalı duruma salacaq.
– “Qəbələ”nin zədəlilər baxımdan işləri yolunda getmir. Baqali Dabo ilə Sergey Zenyova Rafael Santos da qoşulub.
– “Qarabağ”la matçda azarkeşi vuran Katalin Tira İntizam Komitəsinin qərarı ilə 5 oyunluq cəzalanıb. Əvəzində, Rahil Məlikov cəzasını başa vurduğu üçün bu gün “Qəbələ”yə qarşı forma geyinə bilər.
– “Neftçi” düşərgəsində ciddi zədədən əziyyət çəkən yoxdur.
REFERİ
Turun açılış oyunu cari mövsümdə ən çox təyinat alan hakimlərdən birinə – Əliyar Ağayevə həvalə olunub. Yeni çempionatda 6 görüşdə fit çalan FIFA referisi “Qəbələ”nin oyununu ilk, “Neftçi”nin matçını isə 2-ci dəfə idarə edəcək. Ağayevin söz sahibi olduğu “Qarabağ” – “Neftçi” görüşü meydan sahiblərinin 3:0 hesablı qələbəsi ilə yekunlaşıb.
17:00 AZAL – “Qarabağ”
Hakimlər: Orxan Məmmədov, Knyaz Əmiraslanov, Azər Əsgərov, Akif Əmirəli.
Əlavə köməkçi hakimlər: Ramil Diniyev, Ömər Paşayev.
AFFA nümayəndəsi: Eldar Qasımov.
Hakim-inspektor: Məlik Həsənov.
“AZAL Arena” (3500 yerlik).
Liderdən 3 xal geri qalan “Qarabağ”la AZAL arasında ciddi uçurum var. “Təyyarəçilər” son çempiona tən rəqib deyil və çətin ki, bugünkü matçda güclü rəqib önündə duruş gətirsinlər.
Cari mövsümdə qələbə üzü görməyən yeganə komanda olan meydan sahibləri ilk dövrədə “Qarabağ”a 0:6 hesabı ilə uduzmuşdular. Həmin dueldə Reynaldo Silva ilə Maksim Medvedev dubl etmiş, Migel Madera ilə Dani Kintana hərəyə bir qol vurmuşdu.
Ümumiyyətlə, “Qarabağ” AZAL-la son duellərdə ardıcıl iki böyük hesablı qələbə qazanıb. Son 4 qarşılaşmada isə meydan sahibi komanda “quru” hesabla qalib gəlib.
STATİSTİKA: 31 oyun, +6=6-19, top fərqi 25-47
İLK DÖVRƏ: 0:6
OYUNDAN NOTLAR
– Komandalardan heç birinin heyətində cəzalı və zədəli futbolçu yoxdur.
– AZAL-ın futbolçuları – Adan Koronado ilə Tural Hümbətovun balansında 3 sarı vərəqə var. Bu görüşdə də “sarı” alsalar, cəzalı duruma düşəcəklər.
REFERİ
Ötən mövsüm yol verdiyi nöqsanlardan dolayı etimadı itirən Orxan Məmmədov cari çempionatda nadir hallarda baş hakim kimi təyinat alır. O, 3 matçda fit çalıb ki, bunlardan biri də 4-cü tur çərçivəsində baş tutan “Qarabağ” – AZAL dueli olub (6:0). Onun idarə etdiyi AZAL – “Kəpəz” matçında da “təyyarəçilər” uduzub (0:1).
FƏRİD