Milli komanda
Şimali İrlandiyanın “qəbirqazan”ı: “Həmin əzmkarlığı nümayiş etdirmək lazımdı”
Noyabrın 13-də millimiz Belfastda Şimali İrlandiyanın qonağı ol…
Noyabrın 13-də millimiz Belfastda Şimali İrlandiyanın qonağı olacaq. Seçmə mərhələdə 7 xalla qrup 2-cisi olan yığmamız bu görüşdə ən azı 1 xala köklənib. Bu, həm də yığmamızın adıçəkilən ölkənin təmsilçisinə qarşı 5-ci matçı olacaq.
İlk duellərin üstündən 10 ildən çox vaxt keçib. DÇ-2006-nın seçmə mərhələsi çərçivəsində baş tutan oyunlarda rəqib yığmamızdan 4 xal almışdı (0:0, 0:2). Bundan sonra tərəflər bir də 7 il sonra üz-üzə gəliblər. Budəfəki matçlarda isə üstünlük bizim tərəfimizdə olub. DÇ-2014-ün seçmə mərhələsi çərçivəsində keçirilən oyunlarda Belfastadakı matç 1:1, Bakıdakı oyun isə 2:0 hesabı ilə millimizin qələbəsi ilə yekunlaşıb.
Bu matçlar yaxın keçmişdə baş verdiyindən həmin duellərin iştirakçılarından bəziləri yenə irlandlara qarşı meydana çıxmaq şansına malikdi. Millimizin adalılarla oyunlarında ön plana çıxan isimlərdən biri olan Rauf Əliyev isə təəssüf ki, əla forma yığmasına baxmayaraq, ilk matçı televizor önündə seyr edəcək.
Hücumçunun rəqibə vurulan hər 3 qolda əməyi var. O, 2012-ci ilin noyabrında Belfastda keçirilən qarşılaşmada millimizin tək qolunun müəllifi olub, cavab matçında hesabı açan Rüfət Dadaşova asissentlik edib. Elə digər qolda da onun əməyi danılmazdı. Belə ki, Raufun inadkarlığı sayəsində qazandığı cərimə zərbəsindən sonra həm rəqib azlıqda qalmış, həm də standart vəziyyətdən sonra Mahir Şükürov 2-ci topu qonaqların qapısından keçirmişdi.
Berti Foqtsun dövründə keçirilən bu oyunların qəhrəmanının bizim üçün həlledici olan qarşıdakı matçla bağlı fikirləri maraqlıdı. “İnter”in forvardı Belfasta getmədiyinə görə məyusdu: "Təəssüf ki, zədə səbəbindən bu dəfə millimizin sıralarında olmayacam. Ancaq inanıram ki, bu komandaya qarşı yenə də uğurlu nəticə əldə edə biləcəyik. Ötən tsikldə səfərdə son saniyələrdə qələbədən məhrum olsaq da, Bakıda onları məğlub edə bilmişdik. Budəfəki Şimali İrlandiya bizə qarşı oynayandan da güclüdü. Avropa çempionatının final mərhələsində çıxış ediblər, əksər oyunçuları İngiltərə Premyer Liqasında oynayır. Ancaq inanıram ki, futbolçularımız bu dəfə də uğurlu nəticəyə imza atacaqlar. Nəyin hesabına? Zənnimcə, ilk 3 qarşılaşma yığmamızın nəyə qadir olduğunu göstərib. Bax, həmin əzmkarlığı Belfastda da nümayiş etdirmək lazımdı. Bunu bacarsalar, uğur bizim tərəfimizdə olacaq. Millimiz səfərdə yenə qol vura bilər. Ümid edirəm ki, bu, belədə olacaq. Kimdən qol gözləyirəm? Meydana çıxacaq hər bir oyunçumuz buna qadirdi. Çox istəyərdim ki, klubda çiyin-çiyinə oynadığım Ağabala Ramazanov millimiz adına qələbə qolunun müəllifi olsun".
Vurulan qollarda Rauf Əliyevin əməyini qabardırıqsa, “çərçivə”nin təhlükəsizliyi baxımından da Kamran Ağayevin adını çəkməmək günah olardı. Əlcək sahibi ilk matçda iştirak etməsə də, Bakıdakı qarşılaşmada etdiyi seyvlərlə matça damğasını vurmuşdu.
ELMAR ABDULLA-ZADƏ
![blank](https://futbolinfo.az/wp-content/plugins/wp-fastest-cache-premium/pro/images/blank.gif)