Layihə
FİF: Təməl üçün keyfiyyətli “betonqarışdıranlar” – LAYİHƏ
AFFA-nın İcraiyyə Komitəsində verilən qərara əsasən yaradıla…
AFFA-nın İcraiyyə Komitəsində verilən qərara əsasən yaradılacaq Futbolun İnkişaf Fonduna (FİF) dair növbəti yazını təqdim edirik. Budəfəki material ayrılacaq vəsaitin daha bir istiqamətə yönəldilməsinə həsr olunacaq.
Futbolçuların təməli uşaq yaşlarından qoyulur. Həddən artıq yüklənmə onların gələcək karyerasının üzərindən xətt çəkə bilər. Elə yüklənmənin lazım olandan az verilməsi də yeniyetmə futbolçunun gələcək karyerasının uğursuz alınmasını şərtləndirəcək.
Azyaşlı futbolçuların qidalanması, psixoloji cəhətdən düzgün hazırlanması, taktika sarıdan savadlı yetişməsi, habelə onlarla xırda detallar onların üst yaş qruplarında sanballı oyunçuya çevrilməsinin bünövrəsi rolunu oynayır. Bu gün hansı uşaq məşqçisini dindirsən, öz metodologiyasının ən uğurlu olduğunu iddia edəcək. Bəs, belədirsə, nəyə görə istedadlar üzə çıxmır? Deməli, nələrisə düzgün etmirlər ki, yekun da acınacaqlı olur.
Ölkəmizdə yetərincə uşaq futbol məktəbləri olduğu bir zamanda, yenilərinin açılması sadəcə, kütləviliyə fayda verəcək. Deməli, uşaqların sayının artırılması ilə böyük uğurlara ümid elə də çox deyil. Bəs, nə etməli? Yerli uşaq məşqçiləri gözlənilən nəticəni vermir. Əcnəbiləri bura gətimək də çıxış yolu deyil. Deməli, alternativ axtarılmalıdı.
Bu yol da gənc uşaq məşqçilərini ölkə xaricinə, uşaq futbolunun beşiyi sayılan klublara göndərməkdən keçir. Özü də 1 həftə – 10 günlük təcrübəyə yox, 1-2 illik müddətə. Bu addımı eyni vaxtda 20-30 gənc, perspektivli məşqçiylə atmaq lazımdı. 2 il ərzində onlar Portuqaliya, Fransa, İspaniya, Belçika, Serbiya, İngiltərə, İslandiya modellərini yaxından öyrəndikdən sonra Vətənə qayıtdıqda, uşaq futbol məktəblərində gördüklərini Azərbaycanda yeridə bilərlər.
Futbolun İnkişaf Fondunun bu istiqamətdə ayıracağı vəsait gələcək üçün atılmış ən uğurlu addımlardan biri olar. Çünki həmin mütəxəssislər yeniyetmə uşaqları yetişdirməklə yanaşı, yeni-yeni uşaq məşqçilərinin püxtələşməsinin təməl daşı rolunda da çıxış edəcəklər.
Biznesin istənilən inkişaf yolu bugündən deyil, sabahdan keçir. Təməl düzgün qoyulduqda, bina da möhkəm olur. Ancaq təməlin “betonu, qumu” kimi, “betonqarışdıran”ı da keyfiyyətli olmalıdı.
CEYHUN ƏLİYEV
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”