Divizionda “bazar” davam edir

AFFA-nın tərtib etdiyi “24-lər siyahısı”ndan soraq-ətər çıxmır. Adları çəkilənlərin 22-nin 1-ci divizionda top-top oynaması aşağı liqada müəyyən çaxnaşma yaratsa da, hələ ki, ali futbol qurumu “akulalar”dan söz açmır. Top-topçular da müxtəlif mətbu orqanlarında verdikləri açıqlamalarda daş atıb, başlarını tutur. Onların dediklərini ümumiləşdirsək, iki növ cavab variantı ortaya çıxır:

1) “Namaz qılıram, mən bu cür oyunlarda iştirak etmərəm”
2) “Özləri əsas izi yayındırmaq üçün təmiz uşaqları vururlar”

Bu yerdə bir xatırlatmaya ehtiyac duyuruq. Bir neçə ay öncə PFL prezidenti Ramin Musayev Klublar Komitəsinin növbəti iclasından sonra bəndənizin danışılmış oyunlara dair verdiyi suala rus atalar misalı ilə cavab vermişdi: “Tutulmayan oğru deyil”.

Dialoqumuzun növbəti hissəsi isə uzun sürmədi:
– Tutulana guya nə etdiniz ki?
– Kimə?
– Hakimlər Komitəsinin sədri Xaqani Məmmədovun “15 dənə verirlər” məşhur videoyazısı…
– Mən bilirəm bu sualı kimlər verdirir (Sualı verdirən daxili çağırışım idi. Rüşvət alması dəfələrlə sübuta yetirilən birisinin Hakimlər Komitəsinin sədri olması futbol adına rüsvayçılıqdı – müəl.)… Əcəb eləyib!

O vaxt mətbuat çağırışlarını qulaq ardına vuranlar indi FİFA-ya da eyni münasibəti göstərə bilmirlər. İndi araşdırmalar gedir. Və ən əsası, suçlu bilinənlər eyni taktikadan istifadə edirlər: “Tutulmayan oğru deyil”.

Əlbəttə, hüquq-mühafizə orqanlarına müraciət edib, şübhəli bilinən şəxslərin telefon danışıqlarını dinləmək variantı var. Ancaq məsələ burasındadı ki, oyun alqı-satqısına görə məsuliyyətə cəlb olunmaq haqda qanun hələ qüvvəyə minməyib. Deməli, diviziondakı danışılmış oyunlara görə, hazırda heç kimi “dəmir barmaqlıqlar” arxasına göndərmək mümkün deyil.

Maraqlıdı ki, bu boyda həngamənin qabağında yenə də şübhələrə əsas verən oyuna rast gəldik. Söhbət noyabrın 25-də baş tutan “Şahdağ” – “Rəvan” görüşündən gedir. İlk yarının bitiminə 1 dəqiqə qalmış meydan sahibləri hesabda öndə idilər – 1:0. Lakin…

PFL-in təqdim etdiyi videonun dəqiqəölçən 3:17-ni göstərdiyi epizoda baxın. Top meydanı tərk etməyə doğru getdiyi bir vaxtda meydan sahiblərinin qapıçısı Adil Əlimməmədov Samir Abdulovu qucaqlayıb, iki əli ilə yerə çırpır. Nəticədə qapıya təyin olunan penalti ilk 45 dəqiqənin 1:1 bitməsini şərtləndirir. El arasında buna “ilk hissədə qol-qol” deyilir.

Biz heç nə demirik. Çünki “tutulmayan oğru deyil”. Ancaq yəqin ki, danışılmış oyunları araşdıran komissiya üzvləri “ilk hissədə qol-qol”un hansı formatda gəlməsinə göz yummayacaqlar. Hər halda, işbazlar yenə fəaliyyətdədi və “24-lər siyahısı” deyəsən, bəzilərinə dərs olmayıb.

CEYHUN ƏLİYEV