Dünya futbolu
Rüşvətxorun oğlu Respublika stadionunda
“Qarabağ” – “Fiorentina” oyununu idarə…
“Qarabağ” – “Fiorentina” oyununu idarə edəcək xorvatiyalı İvan Bebek azarkeşlərimizə yaxşı tanışdı. Futbolinfo.az xəbər verir ki, o, daha əvvəl 3 dəfə də təmsilçilərimizin oyununda fit çalıb.
40 yaşlı referi ilk dəfə bizimkilərin matçında 2005-ci ildə Çempionlar Liqasının 1-ci təsnifat mərhələsi çərçivəsində təyinat alıb. “Neftçi”nin evdə İslandiya “Hafnarfyordor”unu məğlub etdiyi (2:0) qarşılaşmada o, bakılıların 1, rəqibin isə 2 oyunçusuna xəbərdarlıq edib. “Ağ-qaralar”ın yeganə “sarı”sını alan Zaur Tağızadə indi Ağdam klubunun məşqçilər korpusunda yer alıb.
Bebek 2 il sonra növbəti dəfə Bakıya səfər edib. O, bu dəfə millimizin Portuqaliyaya yenildiyi (0:2) matçda ədalət qoruyub. Fit sahibi bu görüşdə Aslan Kərimovun Kriştiano Ronaldoya qarşı kobudluğunu “qırmızı” kimi dəyərləndirib. Bundan başqa, referi həmin görüşdə yığmamızın 1, prineylilərin 2 futbolçusuna sarı vərəqə göstərib.
“Qarapaltarlı” ötən mövsüm “Qəbələ”nin evdə Dortmund “Borussiya”sı ilə matçında almanların qələbəsini qeydə alıb – 1:3. O, “Bakcell Arena”dakı qarşılaşmada hər komandanın 2 futbolçusuna xəbərdarlıq edib.
Xorvatiyalı hakim karyerası ərzində 1 dəfə də “Fiorentina”nın oyununa təyinat alıb. O, AL-in 2013/14 mövsümünün pley-off matçı çərçivəsində florensiyalıların evdə “Qrashoppers”ə məğlub olduğu (0:1) görüşü idarə edib.
2003-cü ildən FİFA referisi statusunu daşıyan Bebek indiyə kimi 103 beynəlxalq oyun idarə edib. O, bu qarşılaşmalarda futbolçulara 482 sarı, 34 qırmızı vərəqə göstərib. Həmçinin 28 dəfə də qapılara penalti təyin edib. İxtisasca sığortaçı və iqtisadiyatçı olan Bebekin əsas hobbisi səyahət etməkdi. Ədalət təmsilçisi ingilis və italyan dillərində də danışa bilir.
İvan Bebek 23 yaşında hakimliyə başlayanda onun atası – Veselko Bebek Xorvatiyada Hakimlər Komitəsinin sədri idi. Amma ata Bebek heç də “təmiz” deyil. Belə ki, o, işlədiyi müddətdə 25 min avro rüşvət aldığına görə 4 illik futboldan kənarlaşdırlıb. Ümumiyyətlə, Xorvatiya mətbuatına inansaq, görərik ki, heç oğul Bebek də atasından geri qalmır. Yerli mətbuat onu “Osiyek” klubunun adamı kimi təqdim edir. Deyilənlərə görə, onun FİFA referiliyinə kimi yüksəlməsində əsas pay sahibi məhz bu klubdu.
Referinin karyerasındakı qalmaqallar heç də bununla bitmir. O, ötən mövsüm AL-in 1/8 final mərhələsi çərçivəsində keçirilən “Braqa” – “Fənərbaxça” matçında verdiyi şübhəli qərarlarla yadda qalmışdı. Bebek istanbulluların qapısına mübahisəli penalti təyin etmiş, 3 futbolçusuna isə qırmızı vərəqə göstərmişdi. Bu oyundan 4 ay sonra isə Türkiyə mətbuatı Bebekin bu oyunu Sinqapurdakı mərc kontorlarına qoyduğu haqda məlumat yaymışdı.
Buna baxmayaraq, haqqında bu qədər söz-söhbət gəzən Bebek hələ də oyunlara təyinat alır. “Qarabağ” – “Fiorentina” görüşü artıq onun cari mövsümdə təyinat aldığı 5-ci avrokubok matçıdı.
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?