Ölkə futbolu
AZAL Premyer Liqada qalır, I diviziondan 4 klub gəlir
AFFA prezidenti Rövnəq Abdullayev İcraiyyə Komitəsinin iyunun…
AFFA prezidenti Rövnəq Abdullayev İcraiyyə Komitəsinin iyunun 13-də keçirilən iclasından sonra 2017/2018 mövsümündə Premyer Liqada iştirak edəcək komandaların sayının artırılacağını bəyan etmişdi. Lakin assosiasiya rəhbəri dəqiq rəqəm söyləməmişdi.
Toplantıdan sonra jurnalistlərin suallarını cavablandıran Abdullayev, gələn ilə Premyer Liqa üçün 4 komandanın hazır olmasına dair baş katibə göstəriş verdiyini açıqlamışdı. Qərara alınmışdı ki, növbəti mövsümündə çempionat 10, imkan olsa, 12 komandanın iştirakı ilə keçirilsin.
Rövnəq bəy həmin vaxt I divizionda çıxış edən 3 komandanın növbəti çempionatda elitada mübarizə aparacağına eyham vurmuşdu: “Zaqatala” klubu artıq ictimailəşib. Dedim ki, o kluba diqqət ayrılsın. Bundan əlavə, İmişlinin klubu ictimai səviyyədədir. Onun da gələn ilə hazır olmasını tapşırdım. Növbəti mövsümdən I divizionda “Səbail” klubu iştirak edəcək. O rayondakı stadion bu komandanın ixtiyarına veriləcək və “Səbail” ictimai səviyyəli klub olacaq”.
Futbolinfo.az saytının əldə etdiyi məlumata görə, artıq 2017/2018 mövsümündə Premyer Liqada iştirak edəcək komandaların sayı və adları müəyyənləşib. Belə ki, gələn il ölkə çempionatında 12 komanda iştirak edəcək.
Cari birinciliyin yekunlarından asılı olmayaraq, Premyer Liqanı heç bir klub tərk etməyəcək. Yəni, sonucu pillədə qərarlaşan AZAL klubu artıq rahat nəfəs ala bilər. Hərçənd “təyyarəçilər”in vitse-prezidenti Fikrət Hüseynov bu barədə bizdən öncə məlumatlandırılıb. Təsadüfi deyil ki, o, Klublar Komitəsinin toplantısından sonra AZAL-ın I diviziona düşməyəcəyinə eyham vurmuşdu.
Digər 4 komandaya gəlincə, I divizion təmsilçilərindən “Səbail”, “Zaqatala” və MOİK-in növbəti mövsümdə elitada yer alacağına qərar verilib. Bir yerin sahibi barədə isə mövsümün sonunda hökm çıxarılacaq. Həmin yerə 2 namizəd var: “Turan Tovuz” və “Mil-Muğan”.
Bizə gələn bilgiyə görə, AFFA rəhbərliyi növbəti mövsümün tərkibini müəyyənləşdirərkən 2 amili əldə rəhbər tutub: infrastruktur və maliyyə.
AZAL-ın elitada saxlanılması klubun müəyyən şəraitə və infrastruktura malik olmasıdır. Elə “təyyarəçilər”in vitse-prezidenti də bir müddət öncə verdiyi açıqlamada da bu amilə diqqət çəkmişdi: “Bilinmir divizionun komandaları hansı şəraitdə gələcək, onların infrastrukturu necədir? AZAL-ın infrastrukturu isə yaxşıdır”.
Aydın məsələdir ki, I diviziondan elitaya namizəd klublar AFFA-dan maliyyələşək. Bu səbəbdən federasiya infrastrukturu olmayan klubu qanadı altına almaqla ikiqat xərcə düşmək istəmir.
“Səbail”lə bağlı məsələ aydındır. Klubda Müşahidə Şurası təsis olunub, sədri də AFFA prezidentinin oğlu Rəşad Abdullayevdir. Komanda beynəlxalq standartlara cavab verən “Bayıl Arena”da məşq edir, ev oyunlarını orada keçirir. Yəni, infrastruktur baxımından sıxıntı yoxdur. Həmçinin maliyyə cəhətdən də dara düşməməlidirlər.
Ev oyunlarını “Bayıl Arena”da keçirən MOİK-in də infrastruktur sarıdan çətinliyi yoxdur. Lakin “hərbiçlər”in elitaya çəkilməsinin səbəbləri başqadır: Əvvəla, klub Müdafiə Nazirliyi tərəfindən maliyyələşir. Ola bilər ki, AFFA da müəyyən köməklik göstərsin, lakin istənilən halda assosiasiyanın üzərinə böyük yük düşməyəcək. Digər tərəfdən, MOİK-in Premyer Liqada çıxış etməsi milli komandalara dəvət alan futbolçuların əsgərlik probleminin çözülməsi deməkdir, hansı ki, bu təcrübəni yaxın keçmişdə görmüşük. Sadəcə olaraq, “hərbiçilər” son illər I divizionda çıxış etdiyindən əksər, xüsusən də aparıcı klublar öz oyunçularına MOİK-ə buraxmaq istəmirdilər. İndiki halda isə nazirlik klubunun elitaya çıxarılması əsgərlik probleminin həlli deməkdir.
Tarixin yaddaşına köçən “Simurq”un bazasında formalaşan “Zaqatala”nın yaxşı infrastrukturu var. AFFA yalnız illik büdcə ayıracaq, vəssalam. Klubda Müşahidə Şurası təsis edilib, sədri də Musa Qurbanovdur. Bu səbəbdən də Zaqatala futbol məktəbinin yetirməsi olan Qurban Qurbanovun da əli bu komandanın üstündədir. “Qarabağ”ın çalışıdırıcısı Qurban Qurbanov da müəllimi Şaban Şirdanovun baş məşqçisi olduğu kollektivdən dəstəyini əsirgəmir.
Əsasən yerli – zaqatalalı futbolçulardan təşkil olunan komanda hazırda etimadı doğrultmaqdadır. Əyalət təmsilçisi hazırda turnir cədvəlinin 2-ci pilləsində qərarlaşıb və liderdən cəmi 2 xal geri qalır.
Sonuncu komandaya gəlincə, əslində, AFFA prezidenti yayda “Mil-Muğan”ı Premyer Liqaya namizəd kimi göstərmişdi. Lakin İmişli klubunun hazırkı durumu federasiya rəhbərliyinin ürəyincə deyil. Komandanın cari mövsümdəki çıxışı və klubdakı şəraitsizlik yetkili şəxsləri düşünməyə vadar edib. Bu səbəbdən hazırda I divizionun lideri olan “Turan Tovuz”un namizədliyi ön plana çəkilib. Hər halda, Əsgər Abdullayevin çalışdırdığı Tovuz təmsilçisi daha yaxşı infrastruktura malikdir. Ən başlıcası isə sözügedən bölgədə futbola olan maraq və potensialdır.
AFFA-nın növbəti mövsümdə Premyer Liqada çıxış edən klubların sayı və adlarını indi müəyyənləşdirməsinin də səbəbi var. İş ondadır ki, assosiasiya rəhbərliyi tərəfindən adları qeyd olunun klublara ismarıc göndərilib: Premyer Liqaya hazır olun. Qarşıdan qış “transfer pəncərəsi” dövrü gəldiyindən klublara heyətlərini gücləndirmək, indidən yeni mövsümdə elitada mübarizə apara biləcək kollektiv formalaşdırmaq tövsiyə olunub.
CAVAD
P.S.: "Şəmkir" də elitaya can atır. Bu komandanın stadion problemi olduğundan iddialarının reallaşması çətin məsələdi. Amma problemi həll edə bilsələr, planlar dəyişə də bilər.
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”
- Ölkə futbolu2024-04-23 08:00
“Səbail” “Sabah”a uduzsa…