Əla Ələsgərov seçimi və 12 klub dəyişən Navalovski

Cari mövsümü uğursuz keçirən "Neftçi” gözləniləni edir. Paytaxt klubu fasilə yaranan kimi heyətə ciddi əl gəzdirir.

Artıq 2 transfer rəsmiləşib, bir neçəsi də gözlənilir. Və adı çəkilən bütün oyunçular komandanın simasının dəyişməsinə töhfə verməlidi.

“Neftçi”nin hələlik ən “gözəgirən” transferi Namiq Ələsgərovdu. “Bakı”da parlayan, ötən mövsüm “Kəpəz”də də özünü sübut edən cinah oyunçusu “Qarabağ”dakı rəqabət üzündən forma şansını az qazanırdı. Amma müəyyən fasilələrlə ağdamlıların düşərgəsində olduğu zamanlarda səviyyəsini ortaya qoya bilirdi.

Güman ki, “Qarabağ”ın baş məşqçisi Qurban Qurbanov belə bir oyunçunu itirmək istəməzdi. Lakin milli komandada oynamaq arzusunda olan Namiq daha çox oynamaq istədiyindən, Qurbanov onun gedişinə əngəl olmayıb. Onun “Neftçi”də vaxtilə əfsanələrin geydiyi 9 nömrəli futbolkanı seçməsi isə boynuna ciddi məsuliyyət qoyur. Ələsgərov bəlkə də yeni qurulacaq komandanın siması olacaq.

Əslində, bu transferi Elşən Abdullayevlə “barter” də saymaq olar. Çünki bir gün öncə istedadlı yarımmüdafiəçi əks marşrutla “Qarabağ”a yolanmışdı. Fərq ondadı ki, bakılılar formada olan hazır futbolçu, ağdamlılar isə zədədən heç cür qurtula bilməyən bir gənc alıb. Abdullayevin sağlamlığında problem yoxdusa, zədəsi deyildiyi kimi xroniki deyilsə, “Qarabağ” bu dəyiş-düyüşdə uduzmayıb.

Namiq “Neftçi”nin “Qarabağ”dan qoparmaq istədiyi yeganə futbolçu olmayıb. Bildiyimizə görə, Coşqun Diniyev də Elxan Abdullayevin əsas hədəflərindən olub. Lakin nə klubu, nə də futbolçu təklifi yaxına buraxmayıb. Son zamanlar heyətə düşməkdə çətinlik çəkən Reynaldoya maraq isə “maraq həddi”ni keçməyib. Çünki “Neftçi”nin bu futbolçunun maaşını ödəyəcək gücü yoxdu.

Ümumiyyətlə, maddi durum “Neftçi”yəsəs-küylü transferlər etməyə imkan vermir. Kamran Ağayevin “Boavişta”dan ölkəmizə qayıdışı da elə buna görə baş tutmadı. Qapıçının istədiyi maaşa bakılılar normal səviyyəli 2-3 əcnəbi ala bilər ki, hazırda elə bununla məşğuldular.

Jonas Pessali ilə anlaşmayan, Boban Baykoviçlə müqaviləni yeniləyən, Eltun Yaqublunu “Səbail”ə icarəyə verən “Neftçi”nin rəsmiləşdirdiyi növbəti transfer “sirli qutu”du. Bəlkə də Gürcüstan millisinin üzvü olması faktı müsbət məqamdı. Lakin Georgi Navalovskinin klub karyerasında parlaq adlar görmürük. 3 Gürcüstan, 6 Rusiya klubunda oynamış futbolçu 1 dəfə Yunanıstana da baş çəkib. İstənilən halda 30 yaşlı futbolçu üçün 12 klub həddindən artıq çoxdu. Onun “SKA Energiya”ya 2 dəfə baş çəkdiyini, son klubu “Veria”da cəmi 6 matça çıxdığını da unutmayaq. Bu, faktiki hər mövsüm komanda dəyişmək deməkdi. Necə ki, 2010-cu ildə Bakı "İnter”ində olan zaman da cəmi 13 matça çıxıb, Rusiyaya yollanmış, lakin “Volqa”da möhkəmlənməyib “Ximki”yə icarəyə verilmişdi.

"Ağ-qaralar"ın növbəti hədəfi Çexiya millisinin üzvü, Rusiyanın "Tom" klubundan ayrılan Lukaş Droppadı. Bu oyunçu oktyabrda millimizə qarşı matçda (0:0) 90 dəqiqə meydanda olub. Onun gəlişi danışıqlar aparılan digər futbolçularla məsələlərin aydınlaşmasından asılı olacaq. Çünki bakılılar 4 əcnəbi almaq niyyətinddi və elə futbolçular seçməlidilər ki, komandanın nəticələrində dönüş yaratmaq mümkün olsun.

FƏRİD