"Neftçi"ni dayandıran səbəblər

"Neftçi"nin qələbə, "Kəpəz"in məğlubiyyət seriyası bitdi. "Bakcell Arena"dakı qolsuz bərabərliyə nə çox üzülən oldu, nə sevinən.

Bəlkə də bu tur sülh turu olacaq. "İnter" "Zirə" ilə mövsümdə 3-cü dəfə 1:1 etdi, "Neftçi" – "Kəpəz" oyununda hesab açılmadı; bu gedişlə ilk 2 oyunda xal bölmüş "Sumqayıt"la AZAL da ənənəni pozmaya bilərlər, Qəbələdəki zirvə döyüşü də yəqin ki, hər iki tərəfi razı salan hesabla yekunlaşar. İkisi reallaşan, ikisi təxmin olunan nəticədi.

Qış fasiləsindən sonra yüksəlişə keçən "Neftçi" bu matçın da favoriti idi. Lakin "Kəpəz" dönüş nöqtəsi kimi baxdığı oyundan xalla ayrılmağı bacardı. Topa daha çox sahib olan bakılılar rəqibiylə müqayisədə qol şanslarında da üstün idi. Gəl ki, yekun nəticə meydan sahiblərinə sərf edən olmadı.

Hələ 14-cü dəqiqədə "Neftçi" hesabı aça bilərdi. Ancaq Zdenek Folprextə görə aşkar qayda pozuntusunu hakim penalti kimi dəyərləndirmədi. Bəlkə də Tural Axundovun topa toxunuşu Rauf Cabbarovu yanıltdı, halbuki gəncəli futbolçu çex legioneri iki ayağının arasına alaraq qazondan üzdü. Bu ehtiyatsız sürüşmə fəndinə görə Axundova vərəqə də verilməliydi.

"Neftçi"nin qola yaxınlaşdığı daha bir epizod ikinci hissədə qeydə alındı. Renan Silvaya dəyən yopun avtoqola çevrilməsinə Şəhriyar Rəhimov mane oldu. Videotəkrarda da görünür ki, top qapı xəttini tam keçməmişdi.

"Kəpəz"in də real qol şansları oldu. Matçın əvvəlində Nicat Qurbanov, sonda isə Ebah bir qədər dəqiq oynasaydı, meydan sahibləri bir xaldan da olacaqdı.

Gəncəlilərin bəxti Ruslan Abışovun erkən əvəzlənməsi zamanı da gətirdi. Əzələsi dartılan "Neftçi"nin kapitanı hələ fasiləyə kimi Cavid İmamverdiyevlə əvəzləndi. O Cavidlə ki, meydanda olduğu müddətə komandasının oyununu gücləndirə, müdafiə ilə hücumu əlaqələndirə bilmədi – Abışov bu baxımdan daha fəal idi.

İstənilən halda, "Neftçi" rəqibini yenməyə borclu idi, hətta hakimin qeyd etdiyimiz səhvi də bəhanə sayılmamalıdı. Bakılılar heyət baxımından daha güclü ehtiyat oyunçular skamyasına sahibdi, büdcəyə görə isə "Kəpəz"i 6-7 qat üstələyir. Sadəcə, gəncəlilər daha çox döyüşdü və məşqçi amili həlledici oldu. Qışda heyətinə bir futbolçu belə qata bilməyən qonaqlar ızmkarlıq hesabına 2017-də ilk xalını qazandı.

Elxan Abdullayevin bəhanəsi var. Onun yığdığı heyət hələ tam oturmayıb, oyun planında çatışmazlıqlar hiss olunur – kəsəsi, ideal oyun üçün zamana ehtiyac var. Bakılılar hələlik müdafiə qabiliyyətini yaxşılaşdırıb, orta sahədə anlaşma yaxşı deyil, hücum planında isə ciddi sızıntılar var. "Neftçi"nin monoton hücumlarını dəf etmək rəqibləri üçün çətin deyil, hücumda çoxalmalar, müdafiədən cinah keçidləri, yarımmüdafiənin irəli uca dəstəyi qaydasına düşməlidi. Hücumda çoxalmalar yaxşı olmadığından çoxsaylı təhlükəli vəziyyətlərdən danışa bilmirik. Komanda 2 real təhlükə yaratdı: birində rəqibin ehtuyatsız hərəkəti penaktiyə, digərində topa səhv toxunuş avtoqola səbəb ola bilərdi. Vəssalam. Hansısa kombinasiyalı hücumdan danışa bilmirik.

Abdullayevin oyuna müdaxiləsi də görünmədi. O, nəticə üçün nə taktikanı dəyişdi, nə də risk etdi. Eyni amplualı oyunçuları bir-biri ilə əvəz etməklə "Kəpəz"ə hər hansı çətinlik yaradılmadı. Bəlkə də ehtiyat qüvvə yetərsizdi, lakin buna qalsa, gəncəlilərin çatışmazlığı daha çoxdu.

Məhdud heyətlə maksimuma can atan Şahin Diniyevi alqışlamaq lazımdı. Çünki qazanılan bir xalda onun müstəsna rolu oldu. Hətta 2 legionerdən imtina etməklə də heyət qurmağı bacaran "Kəpəz"in çalışdırıcısı nüdafiəçi Tural Axundovu dayaq yarlmmüdafiıçisi qoymaqla riskə getmişdi. Amma bunun sayəsində rəqibin bütün hücum planlarını pozdu. Futbolçularının əzmkarlığı isə çatışmazlıqları sığortaladı.

Bu nəticə "Neftçi"ni eyforiyadan ayıltmalıdı. 3-cü dövrədə sərgilənən oyun hər nə qədər əvvəlki ilə müqayisədə yaxşı olsa da, komanda hələ avrokuboklara vəsiqə qazanmağa hazır deyil. Təcrübəli legionerlərin fərdi bacarığı sayəsində qazanılan xallar aldadıcı ola bilər.

AĞA