Ruhid Usubov: “Lazımi yerlərə də bildirsinlər ki, burada belə oyunçular var”

“Mil-Muğan”ın U-14 komandasının çalışdırıcısı Ruhid Usubovun futbolinfo.az saytına müsahibəsi:

– Hazırda zona yarışlarında ilk pillədəyik, final mərhələsinə vəsiqə qazanmışıq. Hər şey normaldı. Çempionatın 2 bombardiri var, hər ikisi də bizim komandanın üzvüdü.

– “Mil-Muğan”ın əsas komandasına və ya milliyə cəlb edilən oyunçularınız varmı?
– Artıq 6 aydı ki, bu komandadayam. Buna baxmayaraq, artıq 5-6 nəfər namizəd oyunçum var. Hansı ki, mən onları gələcəkdə milli komandada görürəm. 

– Millinin məşqçilərindən gəlib, oyunlarınızı izləyənlər varmı?
– AFFA-nın buradakı nümayəndəsinə demişəm, diqqət ayrılır. Demişəm, lazımi yerlərə də bildirsinlər ki, burada belə oyunçular var. 

– Çətinlikləriniz nədən ibarətdi?
– Hələ ki, heç bir çətinliyimiz yoxdu. Mirheydər müəllim hər şərait yaradıb. Bütün ləvazimatlarla təmin edir, süni meydançamız da var, orada məşqlərimizi keçirik. 

– Uşaqların təhsillə bağlı vəziyyəti nə yerdədi? Futbolla təhsil bir-birinə mane olmur?
– Sistemi elə qurmuşuq ki, heç bir problem olmur. Səhər növbəsində oxuyanlara günorta məşq keçirik, günorta oxuyanlara səhər. Yetirmələrimin çoxu səhər növbəsində oxuyur deyə, məndə bu cür problemlər olmur. 

– Zona yarışlarında çox vaxt böyükhesablı nəticələr qeydə alınır. Bəzən komandaların biri digərinə 20-dən çox qol vurur. Belə rəqiblərlə oyunlarda inkişaf etmək nə dərəcədə mümkündü?
– Bizim də oyunlarımızda hərdən belə hesablar qeydə alınır. Regionumuzda yeganə bizik ki, peşəkar klubu təmsil edirik. Çalışıram klublara qarşı oynayım ki, gücümü bilim. Təəssüf ki, bizim regionda da başqa klub yoxdu. Rəqabət güclü olmalıdı ki, inkişafa təkan versin. Yəqin ki, Saatlı, Sabirabad, Beyləqan, Füzuli kimi rayonlarda 1-ci dəstə komandaları yaradılsa, rəqabət güclü olar. Bəzi komandalar var ki, oyun günü bir yerə yığışırlar. Uşaqlar güclü rəqiblərlə oynamalıdı ki, inkişaf etsin.

ELMAR ABDULLA-ZADƏ