Son dövrəyə start: biri Gəncədə, digəri Bakıda

Bu gün Topaz Premyer Liqasında cari mövsümün sonuncu – 4-cü dövrəsinə start veriləcək. Futbolinfo.az xəbər verir ki, dövrənin açılış turunun qarşılaşmaları 2 gün davam edəcək.

Ənənəvi olaraq, ilk oyun günündə iki görüş baş tutacaq. Öncə Gəncədə “Kəpəz” “Zirə” ilə münasibətlərinə aydınlıq gətirəcək. Günün digər matçında isə “İnter” “Sumqayıt”ı qəbul edəcək.

Topaz Premyer Liqası
22-ci tur
13 mart

“Kəpəz” – “Zirə”

Hakimlər: Fariz Yusifov, Vüqar Bayramov, Cəmil Quliyev, İnqilab Məmmədov.
AFFA nümayəndəsi: Rauf Hüseynli.
Hakim-inspektor: Əhmədağa Cabbarov.
Gəncə şəhər stadionu, 15:00.

Dövrənin açılış matçı Gəncədə baş tutacaq. Burada yerli "Kəpəz" "Zirə" ilə üz-üzə gələcək. Avrokuboklara vəsiqə qazanmağı hədəfləyən zirəlilər növbəti qələbəsini qazanmağa ümid edir. Amma bu, heç də asan olmayacaq. Çünki uğursuzluq zolağından çıxmağa çalışan Gəncə təmsilçisi də doğma azarkeşlərinin dəstəyi sayəsində qələbə qazanmaq üçün əlindən gələni edəcək.

Bu komandaların oyunlarında maraqlı tendensiya var. Belə ki, meydan sahibi olan komanda indiyədək uduzmayıb. “Kəpəz”in ev oyunlarının hamısında 2 qol qeydə alınıb. Əvvəlki 8 oyundan 3-də heç-heçə qeydə alınıbsa, komandalar hərəyə 2 qələbə qazanıblar.

Son üç matçda qonaq tərəf qola və xala həsrət qalıb. Həmin oyunlar da cari mövsümə təsadüf edir. Birinci dövrədə Gəncədə keçirilən qarşılaşmada "Kəpəz"in 2:0 hesablı qələbəsi qeydə alınmışdı. Julien Ebahın ilk yarıda hesabı açdığı görüşdə Şəhriyar Rəhimov yekun nəticəni müəyyənləşdirmişdi. İkinci dövrədəki görüşdə isə "Zirə" bu məğlubiyyətin əvəzini oxşar hesablı qələbə ilə çıxa bilmişdi. Gəncəlilərin kapitanı Tural Axundovun meydandan qovulduğu bu matçda Cavid Tağıyev hesabı açmış, Elvin Məmmədov isə penaltini dəqiq yerinə yetirməklə qələbəni rəsmiləşdirmişdi. Bu klublar arasındakı son matç daha gərgin keçmişdi. "Zirə"nin yarımmüdafiəçisi Sezar Meza Kolli 28-ci dəqiqədə aqressiv hərəkəti nəticəsində meydandan qovulsa da, komanda yoldaşı Nurlan Novruzov 37-ci dəqiqədə qonaqları məyus edən qola imza atmışdı. "Kəpəz" isə azlıqda qalan rəqibinin qapısına yol tapa bilməməsi azmış kimi, əlavə vaxtda Renan da Silvanın da meydandan qovulmasına üzülmüşdü.

Statistika: 8 oyun, +2=3-2, top fərqi 9-8

1-ci dövrə: 2:0
2-ci dövrə: 0:2
3-cü dövrə: 0:1

“İnter” – “Sumqayıt”

Hakimlər: Əliyar Ağayev, Rza Məmmədov, Vüsal Qənbərov, Rəvan Həmzəzadə.
AFFA nümayəndəsi: Eldar Qasımov.
Hakim-inspektor: Şahin Cəfərov.
Bakı. “İnter Arena”, 18:00.

Üçüncü pillədə qərarlaşan “İnter”i bu turda "Sumqayıt"la duel gözləyir. Paytaxt təmsilçisi növbəti qələbəsini qazanmaqla iddiasını davam etdirməyə çalışacaq. Amma Samir Abasovun çalışdırdığı gənclik şəhəri təmsilçisi də avrokuboklara vəsiqə qazanmaq istəyindən əl çəkmək istəmir. Bunun üçün sumqayıtlılar çətin rəqiblə dueldə ən azı uduzmamağa çalışacaq.

"İnter"in meydanındakı son 3 oyunda 4 və ya daha çox qol vurulub. “Sumqayıt” 5 oyundur bu rəqibinə qalib gələ bilmir. “İnter” 8 görüşdür meydanı qolsuz tərk etmir. Bütövlükdə,əvvəlki 19 oyundan 11-də bakılılar 3 xalı bayram ediblər. 6 qarşılaşmada heç-heçə qeydə alınıbsa, "Sumqayıt" cəmi 2 dəfə qələbəyə sevinib. Elə top fərqində də "İnter"in ciddi üstünlüyü diqqət çəkir.

Cari mövsüm baş tutan görüşlərdə "Sumqayıt" qələbəyə həsrət qalıb. Birinci dövrədə Sumqayıtda baş tutan görüşün 2-ci dəqiqəsində Denis Silva hesabı açmış, fasilədən sonra isə Ağabala Ramazanov fərqi artırmışdı. Əlavə edilmiş dəqiqələrdə Vaqif Cavadovun vurduğu qol bir işə yaramamışdı – 1:2. İkinci dövrədəki oyunda hesabı 3-cü dəqiqədə Mirabdulla Abbasov açmışdı. Amma "İnter" buraxılan qolun əvəzini artıqlaması ilə çıxa bilmişdi. İlk yarıda Zurab Xizanişvili hesabı bərabərləşdirmiş, fasilədən sonra isə Nizami Hacıyev dubla imza atmışdı – 3:1. Tərəflər arasındakı son qarşılaşma isə daha gərgin və maraqlı alınmışdı. 19-cu dəqiqədə Mirabdulla Abbasov penaltidən vurduğu qolla "Sumqayıt"ı hesabda önə keçirmişdi. Fasilədən dərhal sonra İlkin Qırtımov hesaba tarazlıq gətirmişdi. Qarşılaşmanın son dəqiqələri daha maraqlı alınmışdı. Rauf Əliyev 90-cı dəqiqədə "İnter"i önə keçirsə də, əlavə vaxtda Nicat Muxtarov "Sumqayıt"a vacib 1 xal qazandıran qola imza atmışdı – 2:2.

Statistika: 19 oyun, +11=6-2, top fərqi 31-14

1-ci dövrə: 2:1
2-ci dövrə: 3:1
3-cü dövrə: 2:2