Ölkə futbolu
Lideri dəyişən populyar hesab
Azərbaycan çempionatları tarixində heç vaxt belə şe…
Azərbaycan çempionatları tarixində heç vaxt belə şey olmamışdı. Turun bütün oyunlarında meydan sahiblərinin yeganə qolla qalib gəlməsi bəlkə də əsrdə bir dəfə reallaşan hadisədi.
"Kəpəz"in "Zirə"ni, "İnter"in "Sumqayıt"ı yenməsindən sonra Topaz Premyer Liqasının cari mövsümündə son dövrənin ilk turu eyni ssenari ilə davam etdi. Dünən ilk öncə meydana çıxan "Qarabağ" da AZAL-ı ikinci hissədə vurduğu tək qolla keçdi. "Təyyarəçilər" ağdamlılara zirvəyə qalxmağa mane olmasalar da, oynadıqları futbolla alqış qazandılar.
Düzdü, "Qarabağ" oyun boyu üstün futbol sərgilədi və daha çox qol vəziyyəti yaxaladı. Futbolçular 90 dəqiqə boyunca intizamı pozmadılar, baş məşqçi Qurban Qurbanov da oyun stilini dəyişmədi. O, yalnız bəzi ifaçıları əvəzləməklə hücum potensialını artırdı, nəticədə qələbə qolu vuruldu.
Günün ikinci matçı daha maraqlı alındı. "Qəbələ"nin mövsümdə ikinci məğlubiyyəti öz səhvlərindən və "Neftçi"nin daha istəkli oynamasından qaynaqlandı. Filip Ozobiç hesab açılanadək əldə etdiyi 2 real şansı dəyərləndirsəydi, komandası yenə zirvədə olardı. Lakin dünən xorvatın günü deyildi, tərslikdən zədəli yerli futboıçuların bolluğu da qonaqlara mane oldu.
"Neftçi"nin də haqqını yemək olmaz. Bakılılar bəlkə də mövsümdə ən yaxşı oyununu keçirdi. Komandanın arxa xətti etibarlı oynadı, qapıya qayıdan Boyan Baykoviç də səviyyəsini göstərdi. Axsayan orta sahənin eyibini isə əla oynayan hücum xətti örtdü. İkinci dövrədəki 0:8 də daxil olmaqla "Qəbələ"yə 3 məğlubiyyətin əvəzini onu zirvədən endirməklə çıxan paytaxt klubu özünə də gün ağladı. Bir gün əvvəl əldən çıxan 6-cı pilləyə qayıdan Elxan Abdullayevin yetirmələri bununla "Zirə" yenilgisini də unutdurdu.
İndi mübarizə yeni mərhələyə qədəm qoydu. Çempionluq yarışında "Qarabağ" yenidən üstün duruma keçdi. Qarşıda daha 6 oyun var və "Neftçi" eyni aqibəti ağdamlılara da yaşada bilər. Hətta 4-cü pilləyə yüksəlmək üçün buna məhkumdular. Lakin yəqin ki, qızıl medalların taleyini bu rəqiblərin şəxsi dueli həll edəcək. Avropa Liqasına son vəsiqəyə isə namizəd çoxdu və kubok mübarizəsi ilə yanaşı, çempionatda da gərgin görüşlər qarşıdadı.
AĞA