80 illik yubileyə paytaxt derbisi ilə

Bu gün Topaz Premyer Liqasında 23-cü tura start veriləcək. Futbolinfo.az xəbər verir ki, hesabat turunun oyunları yenə iki gün ərzində baş tutacaq. İlk oyun gününə yenə iki görüş nəzərdə tutulub.

Gəncədə baş tutacaq turun açılış matçında “Kəpəz” “Sumqayıt”la münasibətlərinə aydınlıq gətirəcək. Günün digər matçında isə “Neftçi” “İnter”lə üz-üzə gələcək.

Topaz Premyer Liqası
23-cü tur
18 mart (şənbə)

“Kəpəz” – “Sumqayıt”

Hakimlər: İnqilab Məmmədov, Elman Musayev, İsgəndər Əliyev, Elvin Əsgərov.
AFFA nümayəndəsi: Əsgər Əmirəliyev.
Hakim-inspektor: Füzuli Nəcəfov.
Gəncə şəhər stadionu, 16:00.

Son turlarda özünə gəlməyə başlayan “Kəpəz” yenə Gəncədə meydana çıxacaq. Şahin Diniyevin komandası bu dəfə "Sumqayıt"ı qəbul edəcək. Samir Abasovun yetirmələri isə son dövrlər uğursuz çıxışı ilə diqqət çəkir. Bu üzdən sumqayıtlılar səfərdən ən azı bir xalla qayıtmağa çalışacaqsa, gəncəliləri yalnız qələbə düşündürür, desək, yanılmarıq. 

"Kəpəz" öz meydanında bu rəqibinə uduzmayıb. “Sumqayıt” isə son üç matçdan xalsız ayrılmayıb. Cari mövsümə təsadüf edən oyunlardan ikisi heç-heçə bitibsə, birində də "Sumqayıt" qalib gəlib. Bu oyun "Kəpəz"in son dövrəsi gedən cari mövsümdə sumqayıtlıları məğlub etməsi üçün son şansdı. 

Xatırladaq ki, komandaların birinci dövrədəki duelində Vaqif Cavadov Sumqayıt klubunu ev oyununda hesabda önə keçirsə də, Kərim Diniyev bundan cəmi 4 dəqiqə sonra bərabərlik qolunu vurmuşdu – 1:1. İkinci dövrədə Gəncədəki görüşdə həmin Diniyev qırmızı vərəqə almış, amma komandası qolsuz heç-heçəyə razılaşmışdı. Tərəflərin son qarşılaşması daha məhsuldar alınıb. Sumqayıtdakı qarşılaşmada Sergey Çernışev, Azər Salahlı, və Məhəmməd Qurbanovun vurduğu qolların müqabilində Kərim Diniyev gəncəlilərin təsəlli qoluna imza atmışdı – 3:1.

"Sumqayıt"la "Kəpəz" tarixində 16-cı dəfə üz-üzə gələcək. Əvvəlki 15 oyundan 4-də gəncəlilər, 5-də sumqayıtlılar qalib gəlib. Top fərqində də "Sumqayıt"ın cüzi üstünlüyü var.

Statistika: 15 oyun, +4=6-5, top fərqi 18-20

1-ci dövrə: 1:1
2-ci dövrə: 0:0
3-cü dövrə: 1:3

“Neftçi” – “İnter”

Hakimlər: Fariz Yusifov, Azər Əsgərov, Vüqar Bayramov, Əliyar Ağayev.
AFFA nümayəndəsi: Eldəniz Musayev.
Hakim-inspektor: Məlik Həsənov.
Bakı. “Bakcell Arena”, 19:37.

"Neftçi” və "İnter” arasında baş tutacaq paytaxt derbisi maraqla gözlənilir. Bu oyun "ağ-qaralar"ın 80 illik yubileyi gününə təsadüf edəcək. Təsadüfi deyil ki, "Bakcell Arena”da baş tutacaq görüş simvolik olaraq saat 19:37-də start götürəcək. Elxan Abdullayevin çalışdırdığı meydan sahibləri belə bir gündə mütləq qələbə qazanmaqla yubileyin kiçik töhfə verməyə çalışacaq. Lakin "İnter"in də meydana məğlub olmaq üçün çıxmayacağı şübhəsizdir.

Paytaxt klubları 51-ci dəfə üz-üzə gələcəklər. Əvvəlki 50 oyundan 23-də "ağ-qaralar"ın, 13-də "İnter"in qələbəsi var. Qalan 14 görüşdə heç-heçə qeydə alınıb. Top fərqində də "Neftçi"nin üstünlüyü var. Ardıcıl 4 oyunda hər iki komanda qol vurub. “Neftçi” son 5 matçdan 4-də qalib gəlib. “İnter” son üç səfərdə qalib gələ bilməyib.

Bu mövsüm baş tutan görüşlərdə heç-heçə qeydə alınmayıb. Həmin oyunlardan birində "İnter", ikisində isə "Neftçi" qalib gəlib. Halbuki, "sabiq bankirlər" üçüncü pillədə qərarlaşdığı halda, "ağ-qaralar" 6-cı sırada yer alır. 

Birinci dövrədə "İnter Arena"da baş tutan qarşılaşmanın 67-ci dəqiqəsində Araz Abdullayev penaltini dəqiq yerinə yetirməklə "Neftçi"ni hesabda önə keçirsə də, meydan sahibləri əzmkar qələbə qazanmışdı. Rauf Əliyev 87 və 90+3-cü dəqiqələrdə vurduğu qollarla həm dublunu, həm də komandasının qələbəsini rəsmiləşdirmişdi – 2:1. İkinci dövrədə isə Jonas Pesalli və Araz Abdullayevin vurduğu qolların qarşılığında Zurab Xizanişvili "İnter"ə yalnız təsəlli verən qola imza atmışdı – 2:1. Sonuncu paytaxt derbisi daha bol qollu alınıb. Daniel Seqoviya, Namiq Ələsgərov və İqnasio Herreranın qolları müqabilində "İnter" sadəcə, Rauf Əliyevin qoluna sevinə bilmişdi – 3:1.

Statistika: 50 oyun, +23=14-13, top fərqi 73-52

1-ci dövrə: 1:2
2-ci dövrə: 2:1
3-cü dövrə: 3:1