Müsahibə
Aqil Məmmədov: "Bu büdcə ilə oynamaq çox çətindi"
Topaz Premyer Liqasının 24-cü turu çərçivəsind?…
Topaz Premyer Liqasının 24-cü turu çərçivəsində keçirilən "İnter" – AZAL matçı qonaqların 1:2 hesablı məğlubiyyəti ilə başa çatdı. Oyundan sonra “təyyarəçilər”in qolkiperi Aqil Məmmədov jurnalistlərin suallarını cavablandırdı:
– Sizin üçün önəmli sayılacaq matçda məğlub oldunuz…
– Bu oyunu udsaydıq da, uduzsaydıq da çempionatdakı mövqeyimiz dəyişməyəcəkdi. Sadəcə, qalib gələrək psixoloji durumu yaxşılaşdırmaq istəyirdik. Nə vaxtdır ki, qalib gələ bilmirdik. Ancaq yenə də alınmadı.
– Qışdan sonra heyət hardasa gücləndi, amma yenə də qalib gələ bilmirsiz. Artıq qalibiyyətsizlik seriyası 10-a çatdı…
– Oyuna baxanda pis deyilik. Top saxlayırıq, hücum qururuq. Sadəcə, qapıya yaxınlaşanda cərimə meydançasına düşə bilmirik. Mənə elə gəlir ki, qol imkanlarından istifadə edə bilmirik. Əsas problemimiz də budu.
– Yəni səncə, komandaya bir güclü forvard gətirilsəydi, işlər qaydasına düşərdimi?
– Güclü hücumçu deyəndə ki, bu büdcə ilə nədi, onu da tapıb gətiriblər. Nə edə bilərik?
– Komandanın son pilləni tutması rəsmiləşdi. Birinci Diviziona yuvarlanan komandanın heyətində yer almaq yəqin yaxşı hiss deyil?
– AZAL-ın hər bir şəraiti var. Heç kim istəməz ki, bu cür komanda birinci liqaya düşsün. Amma hələ heç nə dəqiqləşməyib.
– Necə düşünürsən, AFFA sadaladığın məsələləri nəzərə alıb AZAL-a güzəştə gedərmi?
– Nə deyim? Heç nə deyə bilmərəm.
– Tərlan Əhmədov isə deyib ki, AFFA AZAL-ı liqada saxlasa belə bu büdcə ilə oynamaq bizə lazım deyil…
– Tərlan müəllim düz deyir. Bu cür büdcə ilə oynamaq çox çətindi.
– Bəs öz aqibətin necə olacaq?
– Mənim aqibətim? Öləcəm (gülür). Təkliflər var, mövsümün sonuna qədər AZAL-ın heyətində 1-2 qələbə qazanmaq istəyirik.
– AZAL-a gəldin ki, formadan düşməyəsən. Verdiyin qərara görə peşman olmadın ki?
– Xeyr, heç bir peşmanlıq olmadı.
– Yəqin ki, karyeranda bu qədər məğlubiyyət görməmişdin…
– Mən həmişə iddialı komandalarda oynamışam. Ancaq qismət bu dəfə belə gətirdi. Nə etmək olar?
– “Neftçi”də qapıçı problemi var. Bu haqda fikrin necədi?
– “Neftçi” haqda danışmaq istəmirəm. Köhnə komandam olub.
– Yenidən təzə komandan ola bilərmi?
– Bilmirəm. Gözləyək, görək necə olur.
NİCAT SALMANLI
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Ölkə futbolu2024-04-29 20:00
“Baku Sportinq”dən növbəti darmadağın
- Dünya futbolu2024-04-29 18:32
Palladino iddialı komandadan dəvət gözləyir