Ölkə futbolu
Dumanla gedən xallar
8 komandanın yarışdığı və iştirakçıların böy&uum…
8 komandanın yarışdığı və iştirakçıların böyük əksəriyyətinin Abşeron yarımadasında yer aldığı Topaz Premyer Liqasının 24-cü turunda budəfəki səfərim Qəbələyə oldu. Bakıdan 225 km aralıda yerləşən bu şəhərin yollarını artıq su yoluna döndərmişəm. Ramiz Rövşən demişkən: “Neyləyək, ayrıca şəhərimiz yox”. 2 əyalət təmsilçisindən biri – Kəpəz” Bakıda “Qarabağ”ın qonağı olduğundan paytaxtdan kənarda oyun izləmək üçün seçim sayı avtomatik məni “Qəbələ” – “Zirə” matçına apardı.
Yəqin ki, “Dumanlı Albion” deyənlər Qəbələni heç vaxt görməyib. Əminəm ki, nəvaxtsa burada olsaydı, çətin ki, o sözü dilinə gətirərdi.
Bəli, dağların qoynunda yer alan şəhər yenə həmişəki libasında idi. Amma göz-gözü, daha doğrusu, qaydalara əsasən, meydanın mərkəzindən qapını görürdü deyə, oyunun təxirə salınmasından söhbət belə gedə bilməzdi.
Matçın başlaması üçün heç bir əngəl olmadığından baş hakim İnqilab Məmmədov start fitini səsləndirdi. İlk dəqiqələrdən üstünlüyü ələ alan meydan sahibləri 7-ci dəqiqədə hesabda önə çıxdı. Cərimə meydançasından çöldə, topu havada ram edən Sergey Zenyov gözəl zərbə ilə fərqləndi. Estoniyalı hücumçunun vurduğu qol 16 il əvvəl ÇL-in yarımfinalından “Bavariya”lı Ciovanni Elberin “Real”a vurduğu qola çox bənzəyidi.
Bu qoldan sonra isə şou başladı. Xeyr, bu, komandaların yox, dirəklərin şousu idi. Hissənin sonuna kimi “qırmızı qaralar” topu 2 dəfə dirəyə, 1 dəfə tirə vurdusa, “qartallar” da 1 dəfə bu mənada “fərqləndi”. Ümumiyyətlə, fasiləyə kimi tərəflər, əsasən də meydan sahibləri, çoxsaylı hücumlar etsə də, sanki dumanda “çərçivə”nin yolunu heç cür tapa bilmirdilər.
İkinci yarıda da eyni ssenari yaşandı. İlk 15 dəqiqədə hərəyə bir dəfə qol şansı qaçırılıdı. Amma nəhayət, 61-ci dəqiqədə topu tora qovuşduran tapıldı. Təxminən, Zenyovun fərqləndiyi nöqtədən – bu dəfə “Zirə”li Sezar Meza Kolli məharətini göstərdi – 1:1.
Bundan sonra rəqibi qapısı qarşısına sıxan Roman Qriqorçukun yetirmələri oyunda üstün tərəf olsa da, ilk hissədəkindən fərqli olaraq, təhlükəli qol epizodu yaratmaqda çətinlik çəkirdi. Bu dəqiqələrdə ən yaddaqalan an Yovan Krnetanın müdaxiləsindən sonra Cavid Hüseynovun cərimə meydançasında yerdə qalması oldu. Lakin hakim hər şeyin qaydalar çərçivəsində olduğunu bildirib, “davam” işarəsi verdi.
Əvəzində “Zirə” son saniyələrdə qəbələliləri ümumiyyətlə, xalsız qoya bilərdi. Amma qapıçı ilə üzbəüz qalan Vüsal İskəndərli real şansı qaçırdı.
Hakimin final fiti həm də “Qəbələ”nin çempionluq şansının azalmasına gətirib çıxardı. “Qırmızı-qaralar” mövsüm ərzində ilk dəfə “Qarabağ”dan bu qədər çox – 4 xal geri qaldı.
Qarşılaşmadan sonra “Qəbələ” rəsmilərinin məyusluğunu başa düşmək olardı. Onlar da bundan sonra ağdamlıları ilk pillədən aşağı salmağın çətinliyini anlayırdılar. Qurban Qurbanovun komandasını cari mövsümdə 2 dəfə üstələyən komanda məhz nisbətən zəif sayılan rəqiblərlə görüşdə itirilən xalların güdazına getdi. Çox güman ki, “Qəbələ” bu mövsüm Premyer Liqada tarixinin ən böyük nəticəsinə imza atıb, gümüş medalları qazanacaq. Amma çətin ki, tarixinin ən böyük nəticəsini kimsə uğur kimi qiymətləndirsin…
ELMAR ABDULLA-ZADƏ, Bakı – Qəbələ – Bakı
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Ölkə futbolu2024-04-29 20:00
“Baku Sportinq”dən növbəti darmadağın
- Dünya futbolu2024-04-29 18:32
Palladino iddialı komandadan dəvət gözləyir