Ölkə futbolu
Ayxan Abbasov – uğurlu debutant
Ötən mövsüm, debüt ilində Adil Şüküro…
Ötən mövsüm, debüt ilində Adil Şükürovun rəhbərliyi altında gümüş medallar qazanan “Zirə”dən azarkeşlər bu il də çox şey gözləyirdi. Amma mövsümün ilk yarısını onlar üçün şok saymaq olar. İmkanlarından qat-qat zəif çıxış edən “qartallar” fasiləyə 8 komandalı çempionatda 6-cı pillədə yollandı.
Təbii ki, burada ötən mövsüm komandanın əsas silahlarından olan Nelson Bonilya və Tatonun yoxluğunu da qabartmaq olar. Həm artıq rəqiblər “Zirə”ni daha yaxşı tanıyırdı, həm də ötən mövsüm gümüş medal qazanmasına baxmayaraq, avrokuboklardan kənarda qalması bəzi futbolçulara pis təsir etmişdi, ruh düşkünlüyü yaratmışdı.
Uğursuz nəticələrə baxmayaraq, qış fasiləsinə kimi səbr edən rəhbərlik məşqçi dəyişikliyinə əl atdı. Komandaya heç də yad olmayan biri – ötən mövsüm məşqçilər korpusunda yer almış Ayxan Abbasov gətirildi. 35 yaşlı çalışdırıcının məşqçilik karyerası zəngin olmadığından rəhbərliyin seçimini riskli adlandırmaq olardı. Amma gənc çalışdırıcı geridə qalan 10 tur ərzində ümidləri doğrulda bildi.
Ayxan bu müddətdə 4 qələbə, 4 heç-heçə və 2 məğlubiyyətlə yadda qalıb. “Qaratallar” onun rəhbərliyi altında yalnız “Qarabağ” və “Kəpəz”ə məğlub olub ki, ağdamlılara yenilgini normal qarşılamaq olar. Əvəzində ağdamlılardan ilk dəfə xal alması onun aktivinəyazılan nəticədi.
Abbasov həm də gəlişi ilə bəzi dəyişikliklərə əl atdı. İlk olaraq komandadan göndərilən legionerlər yeniləri və daha səviyyələri ilə əvəzləndi. Əla fiziki göstəriciyə malik Akrem Latifu, Riçard Qadze və Ben Sanqarenin gəlişi komandanın gücünə güc qatıb.
Abbasovun əsas dəyişiklik etdiyi mövqe hücum xəttidi. O, irəlidə Şükürovdan fərqli, Cavid Tağıyev və Nurlan Novruzovu məhz yenilərlə – Ben Sanqare və Riçard Qadze ilə əvəzlədi. Elə yenilərdən olan Latifu da daimi start heyətinin üzvlərindəndi. Bu da qış fasiləsində edilən transferlərin düzgün aparıldığını göstərir.
“Qəbələ”dən səfərdə xal aldıqdan, “Neftçi”ni rəqib meydanında yendikdən sonra Abbasova inam daha da artıb. Məhz bu nəticələrin sayəsində Şükürovun vaxtında əldən verilən mövqelər geri qaytarılır, komanda avrokuboa 4-cü vəsiqəyə ən real namizəddi.
Növbəti mövsüm avrokuboklarda ölkəmizi təmsil edəcək 3 komandanın adına artıq aydınlıq gəlib. “Qarabağ” və “Qəbələ” qitə səhnəsinə bilet qazanıbsa, “İnter” də böyük ölçüdə bu işin öhdəsindən gəlib. Qalıb yalnız sonuncu – 4-cü iştirakçının kimliyi. Hazrıda bu yerin iddiaçısı çox olsa da, əsas namizəd məhz “qartallar”dı.
Komanda həm də sərgilədiyi stabil oyunla buna layiqdi. “Zirə” istənilən anda qol vurmağa qadir kollektivdi, futbolçular hesabda geri düşərkən də silahı yerə qoymurlar. Bu döyüşkənlik də xüsusilə “Qəbələ” və “Neftçi” ilə səfəroyunlarında işə yarayıb.
Abbasov bəlkə də oyun planında çox şeyi dəyişməyib. “Zirə” Adil bəyin vaxtında yaradılan oyun üslubuna sadiqdi. Amma yeni məşqçinin əsas işi mövqelərə qoyulan oyunçuları düzgün seçməsində görünür. Abbasov komandanı daha müdafiəyəmeylli oynadır, lakin əks-hücumlarda, eyni zamanda standart vəziyyətlər zamanı “qartallar”ın şanslardan istifadə faizi yüksəlib.
İstənilən halda, “Zirə”nin Azərbaycan futboluna potensiallı məşqçi qazandırdığını deyə bilərik. Abbasov əldə etdikləri ilə kifayətlənməməli, daha da təkmilləşməlidi. Qismət olsa, Avropa Liqasında onun işinə yenidən qiymət verməli olacağıq.
ELMAR ABDULLA-ZADƏ