Ölkə futbolu
Samir Əliyev: “Mənə heç kim diqtə edə bilməz”
21 yaşadək futbolçulardan ibarət Azərbaycan millisinin hey?…
21 yaşadək futbolçulardan ibarət Azərbaycan millisinin heyəti açıqlandı və yenə müzakirəyə səbəb oldu. Heyətə dəvət olunan 5 legioner, eləcə də digər milliləşənlər sübut etdi ki, bu ölkədə uşaq futboluna diqqət yoxdu. Daha doğrusu, milyonlar xərclənir, amma iş düzgün qurulmadığından yeni nəsil yetişmir. Bunun nəticəsidi ki, türklərin, iranlıların və s. ümidinə qalmışıq.
Avropa çempionatının seçmə mərhələsində avqustun 31-də ilk oyununu İsrailə qarşı keçirəcək komandamız təlim-məşq toplanışına yollanıb. Elə bu üzdən Yaşar Vahabzadə ilə danışmaq, ondan açıqladığı siyahı ilə bağlı açıqlama almaq, mübahisəli məsələlərə aydınlıq gətirmək müşküldü.
Toplanışa çağırılan 22 futbolçudan biri xüsusi diqqət çəkir. Əmirhüseyn Nəcəfinin birdən-birə yığmada peyda olması, ümumiyyətlə, ölkəmizə hansı kanalla və niyə gəlməsi maraqlıdı. İrandan olan qolkiper yaxınlarda "Səbail"ə keçib və hələ də forma geyməyib. Amma birdən-birə U-21-ə dəvət alıb.
Heç bir xidməti olmadan ona milli pasport alması üçün təqdimat yazan AGİN-in futbol şöbəsinin rəhbəri Fikrət Hüseynov da suallarımızdan qaçır. Vahabzadə kimi, o da zənglərə cavab vermir. Amma bu şəxsləri yenə axtaracaq, prosesi diqqətdə saxlayacağıq.
Hələlik “Səbail”in baş məşqçisi Samir Əliyevlə danışdıq. Onun etimad göstərmədiyi, hətta adını iştirak ərizəsinə salmadığı bir futbolçunun milliyə çağırılması doğrudurmu? Əliyevi dinləyək: “Nəcəfi perspektivi olan qapıçıdı. Onu bizə menecerlər təklif edib, komandaya qoşulmasına etiraz etməmişik. Nəcəfi təbrizlidi və azərbaycan dilində bizim kimi səlis danışır. Xasiyyətimə bələdsiz, mənə heç kim diqtə edə bilməz. Mən istəməsəydim, Nəcəfi komandamızda ola bilməzdi. Onun heyətə götürülməsini mən istəmişəm. Mənə heç bir tapşırıq olmayıb. 1996-çı il təvəllüdlü olmasını, limitə görə bizə lazım ola biləcəyini nəzərə almışam. Həm də bizə daha bir qapıçı lazım idi. Onun adının iştirak ərizəsinə salınması zaman məsələsidi, sənədlərində müəyyən problem var. Onlar yoluna qoyulan kimi əvəzedicilərin çempionatında oyuna da çıxacaq”.
Bəs, onun ölkəmizə gələn kimi milliyə çağırılması nə dərəcədə doğrudu? “Sualınızda haqsız deyilsiz. Amma buna mən cavab verə bilmərəm. Nəcəfi istedadsız deyil. Bizim Bakıdakı toplanışda da iştirak etmişdi. Bildiyimə görə, əvvəlki klubunda – Tədriz təmsilçisində də təcrübə toplayıb. Onun burada oyun oynamadan milliyə çağırılması, qısa zamanda milli pasport alması haqda suala mən cavab verə bilmərəm. Amma “Səbail”in adı hallandığı üçün deyim ki, məni heç kim onu heyətə götürməyə məcbur etməyib”.
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Milli komanda2024-04-22 13:46
Fişer: “AFFA-dan təklif almamışam”
- Ölkə futbolu2024-04-23 08:00
“Səbail” “Sabah”a uduzsa…