Ölkə futbolu
“Neftçi”nin sabahı da satılıb – bəs, qazanc hanı?
“Neftçi” rəhbərliyi klubun gələcəyini də məh…
“Neftçi” rəhbərliyi klubun gələcəyini də məhv etməkdə israrlıdı. Komandanı tarixinin ən pis nəticələri ilə barışdıran, klubun 80 illiyinin ən bacarıqsız idarəçiləri olan bu şəxslər bakılıların sabahına da balta çalır.
5 illik kredit götürməklə klubu borclu vəziyyətinə gətirən prezident Orxan Hüseynzadə və ətrafı bunu nəticələri yaxşılaşdırmaq üçün etmişdi. Amma iş bacarıqsız məşqçi heyətinə və idarəçilərə tapşırıldığından onlar heç nəyə nail ola bilmədilər. Beləcə daha bir neçə milyon manat havaya uçdu, komanda isə hələ də 8 iştirakçı arasında “sevimli” 7-ci pillədədi.
Lakin indi bəlli olur ki, məhv edilən təkcə əsas komanda deyil, klub akademiyası da çökdürülüb. Klubun yetirmələrini müxtəlif komandalara dağıdan “Neftçi” rəhbərliyi onların hamısına görə müəyyən məbləğ alıb, əksəriyyəti üçün ödənilən para isə büdcəyə daxil olmayıb, ciblərə gedib. Ən son belə hadisə “Qarabağ”a göndərilən futbolçularla bağlı yaşanıb.
Belə ki, Çempionlar Liqasında mübarizə aparan “Qarabağ” U-19 komandasını gücləndirmək üçün heyətə bir sıra klublardan futbolçular dəvət edib. Ağdamlılar onların hamısına görə müəyyən xərcə düşüb və heç kimi pul ödəmədən almayıb. Anlaşma çərçivəsində bütün gələnlərə görə müəyyən haqq ödənilib. Klubdan aldığımız məlumata görə, onlardan bəzilərinə pul nəqd, bəzilərinə isə klubunun hesabına köçürmə yolu ilə çatdırılıb.
“Neftçi” də yetirmələrinə görə irəli düşən klublardandı. “Qarabağ” Elçin Əsədovu icarəyə götürüb, Pilağa Mehdiyev, İbrahim Əliyev, Musa Qurbanlı və daha bir neçə oyunçunu birdəfəlik alıb. Onların hər birinə görə də müəyyən transfer haqqı və ya yetişdirilməsinə görə kompensasiya ödənilib. Lakin bu pullar “Neftçi”nin büdcəsinə çatmayıb, kimlərinsə cibinə gedib. Sənədlərdə bu oyunçuların ÇL-də oynayan “Qarabağ”a təmənnasız göndərildiyi yazılıb, halbuki həqiqətdə belə deyil.
Məsələylə bağlı münasibət öyrənmək üçün “Neftçi”yə də müraciət etdik. Amma klubdan heç kim bu məsələyə görə başını ağrıtmaq istəmədi – rəhbərlər əlçatmaz oldu, aşağı vəzifəli şəxslər isə adlarının çəkilməməsini xahiş etdilər. Onlar əvvəlcə həmin futbolçulara görə pul aldıqlarını və bunun köçürmə yolu ilə həyata keçirildiyini bildirdilər. Daha sonra isə bu məsələlərə şərh vermək səlahiyyətləri olmadıqlarını bildirərək dediklərini təkzib etdilər.
Ümid edirik, bu yazıdan sonra bakılılar futbolçulara görə ödənilən pullarla bağlı rəsmi açıqlama verəcək. O zaman bəlli olacaq ki, bu oyunçular həqiqətən “Qarabağ”a bağışlanıb, yoxsa onlara görə rəsmən hansısa məbləğ ödənilib? Çünki ağdamlılar bütün futbolçulara görə müəyyən haqq ödənildiyini təsdiqləyir.
Bağışlanma və ya klub büdcəsinə gəlməyən pullara satılma – hər 2 halda zərbə “Neftçi”yə dəyir. Deməli, klubun gələcəyi də məhv edilir. Paytaxt təmsilçisi özü pul xərcləyərək futbolçu alır, onları kiməsə satanda isə həmin məbləğlər büdcəyə qayıtmır. Yaxşı biznesdi…
Belə “oyunlar” “Neftçi”də təzə deyil. Xatırlayırsızsa, mövsümün əvvəlində “Zirə”dən Elvin Məmmədov heyətə qatılmışdı. Lakin 3-4 gün sonra yarımmüdafiəçi “Qəbələ”də peyda oldu. O zaman rəsmi müqavilə bağlamış futbolçunun birdən-birə digər komandaya göndərilməsi qəribə alındı. Sonradan bəlli oldu ki, Elvin yeni imzaladığı müqavilənin pozulmasına görə “Neftçi”yə müəyyən haqq ödəyib. Lakin həmin pullar da büdcəyə yox, ciblərə gedib.
AĞA
P.S.: Klubun mövqeyini də işıqlandırmağa hazırıq. Qoy, sənəd-sübutla yazdıqlarımızın doğru olmadığını isbatlasınlar. Bunu edə bilməyəcəklərsə, təsisçilərin sorğularını cavablamalı olacaqlar.
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- I Liqa2024-04-30 14:45
“Araz Saatlı”nın məşqçisinə 2 oyunluq cəza
- Milli komanda2024-05-01 18:44
Milli komandamızın baş məşqçi postuna əsas namizəd bəlli oldu
- I Liqa2024-05-01 11:25
I Liqada 24-cü turun təyinatları müəyyənləşdi