Müsahibə
“Kim yaxşı hazırlaşsa, o da qələbə qazanacaq”
Futzal üzrə Yüksək Liqanın 5-ci turunda ötən mö…
Futzal üzrə Yüksək Liqanın 5-ci turunda ötən mövsümlərin daimi iki mükafatçısı – EKOL və “Neftçi” İK qarşılaşacaq.
Futbolinfo.az xəbər verir ki, əzəli rəqiblərin dueli öncəsi “Neftçi”nin kapitanı Rüfət Balakişiyevin Futzal Federasiyasının mətbuat xidmətinə müsahibə verib:
– “Xəmsə” ilə oyundan başlayaq. Birinci hissəyə məğlub yollansanız da, dönüş etdiniz. Oyunun bu cür axarı nədən irəli gəlirdi?
– Suala bir qədər əvvəldən cavab vermək istərdim. Yayda komandamızda xeyli dəyişiklik oldu. Əsas heyət oyunçularımızdan bir neçəsi başqa kluba keçdi. Əvəzində İrandan legionerlər dəvət olundu. Təbii ki, yeni gələn oyunçuların komandamıza adaptasiya olması üçün zaman lazımdı. Hələ ki oyunçular arasında anlaşma istənilən səviyyədə deyil. Amma yavaş-yavaş komanda özünə gələcək. “Xəmsə” ilə görüşə gəldikdə, hesabda geri düşməməli idik. Ancaq futboldu, bu cür hallarla da qarşılaşırsan. Vacib olan yekunda qalib gəlməkdi, biz də bunu bacardıq.
– Yeni gələnlər gedənləri əvəzləyə bilirmi?
– Təki bunu bacarsınlar. Ancaq yenilər onların yerini doldura bilməyəcəklər. Razıyam, istedadlı futzalçılardırlar. Ancaq çox işləməlidirlər. Ötənilki heyətimiz oturuşmuşdu, 5-6 il idi bir yerdə çıxış edirdik. Həmin heyətlə biz “Araz” kimi iddialı komandanı da udmuşduq. Bir-birimizi yaxşı başa düşürdük. Belə deyim də, bütün baş məşqçilərin arzuladığı bir heyətimiz vardi.
– Artıq çempionatda komanda olaraq ilk yenilginizi də passivinizə yazdırmısınız. Debütanta məğlubiyyəti yuxarıda sadaladığın amillərlə bağlayırsan?
– Cari mövsüm çox maraqlı keçir. Yeni gələn komandalar çempionata yeni nəfəs gətiriblər. Onların bu səviyyədə rəqib olacaqlarını gözləmirdik. “FK.İD.Futsal”ın bizi udmasının səbəbi oyunumuzun alınmaması ilə bağlıdır. Ardıcı 3 qol vurdular. Bundan sonra toparlana bilmədik. Qarşıdakı oyunlara baxmalıyıq. Bütün rəqiblərlə 4 dəfə üz-üzə gələcəyik.
– Son mövsümlərdə elə vəziyyət yaranmışdı ki, 3 medaldan birinin “Neftçi” İK-nın olacağı şübhəsiz idi. Hazırkı çempionatın gedişi buna növbəti dəfə nail olacağınıza ümid verirmi?
– Bu dəfə asan olmayacaq. Əvvəldən düşünürdük ki, ilk 3 yerdən biri bizimdir. Ancaq oyunlar göstərdi ki, vəziyyət fərqlidir. Heyətimiz yeni qurulub, üzərimizdə çox işləməliyik. “Neftçi”nin adı hər zaman yuxarı sıralarda olub, çalışacağıq bunu davam etdirək.
– Növbəti rəqibiniz EKOL-dur. Əzəli rəqiblərin dueli haqda nə düşünürsən?
– Həqiqətən də EKOL əzəli rəqiblərimizdən biridir. O qədər qarşılaşmışıq ki, bir-birimizin oyun üslubunu, taktikasını əzbərdən bilirik. Bu dəfə dueli 40 dəqiqəyə kim yaxşı hazırlaşsa, o qazanacaq.
– EKOL da çempionata yaxşı başlamayıb. Mərkəzi oyunöncəsi hansı məqam “Neftçi”nin xeyrinə işləyəcək?
– Rəqibimizin zəif tərəfləri var, amma bunu deməyim düzgün olmaz. Çünki biz baş məşqçinin tapşırığı ilə oynayacağıq. Bildiyim odur ki, kim yaxşı hazırlaşsa, o da qələbə qazanacaq. Yeri gəlmişkən, artıq medianın da çempionata marağı artıb. CBC Sport oyunları canlı yayımlayır, digər televiziya kanalları videoreportajlar hazırlayır, saytlarda, qəzetlərdə yazılar dərc olunur. Bunlar bizi ruhlandırmaya bilməz. Federasiyanın rəsmi facebook səhifəsi hər qarşılaşmadan sonra fotoreportajlar yayımlayır. Bilirsiz, bu vəziyyət əvvəllər çempionatda yaşanmayıb. Ancaq millinin oyunları vaxtı bunun şahidi olmuşuq. Təbii ki, medianın parketə yaxın olması bizə marağı və bizim məsuliyyətimızı artırır.